1 Сѹ́етни ѹ҆̀бо всѝ человѣ́цы є҆сте́ственнѣ, въ ни́хже ѡ҆брѣта́етсѧ невѣ́дѣнїе ѡ҆ бз҃ѣ, и҆ ѿ ви́димыхъ бла҄гъ не возмого́ша ѹ҆разѹмѣ́ти сѹ́щаго, ни дѣлѡ́мъ вне́млюще позна́ша хитреца̀:
2 но и҆лѝ ѻ҆́гнь, и҆лѝ дѹ́хъ, и҆лѝ ско́ръ воздѹ́хъ, и҆лѝ крѹ́гъ ѕвѣ́здный, и҆лѝ ѕѣ́лнѹю во́дѹ, и҆лѝ свѣти҄ла небє́снаѧ, строи́тєли мі́рѹ бо́ги (бы́ти) возмнѣ́ша.
3 И҆́хже а҆́ще ѹ҆́бѡ красото́ю ѹ҆слажда́ющесѧ, сїѧ҄ бо́ги возмнѣ́ша, да ѹ҆вѣ́дѧтъ, коли́кѡ си́хъ влдка є҆́сть лѹ́чшїй: красоты́ бо родонача́лникъ созда̀ ѧ҆̀.
4 А҆́ще же си́лѣ и҆ дѣ́йствїю ѹ҆диви́шасѧ, да ѹ҆разѹмѣ́ютъ ѿ ни́хъ, коли́кѡ сотвори́вый сїѧ҄ си́льнѣйшїй є҆́сть:
5 ѿ вели́чества бо красоты̀ созда́нїй сравни́телнѡ рододѣ́латель и҆́хъ познава́етсѧ.
6 Но ѻ҆ба́че на си́хъ є҆́сть ѹ҆ничиже́нїе ма́ло, и҆́бо са́ми сі́и не́гли прельща́ютсѧ, бг҃а и҆́щѹще и҆ хотѧ́ще ѡ҆брѣстѝ:
7 въ дѣ́лѣхъ бо є҆гѡ̀ живѹ́ще и҆зслѣ́дѹютъ и҆ ѹ҆вѣщава́ютсѧ зра́комъ, ѩ҆́кѡ бла҄га ви҄димаѧ.
8 Па́ки нижѐ сі́и проще́нїѧ досто́йни:
9 а҆́ще бо толи́кѡ возмого́ша вѣ́дѣти, да возмо́гѹтъ ѹ҆разѹмѣ́ти вѣ́къ, си́хъ же влдкѹ ка́кѡ скорѣ́е не ѡ҆брѣто́ша;
10 Ѡ҆каѧ́нни же сѹ́ть, и҆ въ ме́ртвыхъ ѹ҆пова҄нїѧ и҆́хъ, и҆̀же назва́ша бо́ги дѣла̀ рѹ́къ человѣ́ческихъ, зла́то и҆ сребро̀, хи́трости ѹ҆мышле́нїе, и҆ подѡ́бїѧ живо́тныхъ, и҆лѝ ка́менїе неключи́мо, дѣ́ло рѹкѝ дре́внїѧ.
11 А҆́ще же кто̀ дровосѣ́чецъ тектѡ́нъ, ѹ҆го́дное дре́во ѿсѣ́къ, ѡ҆те́шетъ благохѹдо́жнѣ всю̀ корѹ̀ є҆гѡ̀, и҆ хи́трствѹѧ благолѣ́пнѣ сотвори́тъ ѹ҆го́денъ сосѹ́дъ во ѹ҆потребле́нїе житїѧ̀,
12 ѡ҆ста́нки же дѣ́ла на ѹ҆гото́ванїе бра́шна и҆знѹри́въ насы́тисѧ:
13 ѡ҆ста́нокъ же и҆́же ѿ ни́хъ ни во что̀ благопотре́бенъ, дре́во кри́во и҆ сѹ́чїѧ по́лно, прїи́мъ и҆зваѧ̀ съ прилѣжа́нїемъ пра́здности своеѧ̀ и҆ и҆скѹ́сствомъ ра́зѹма и҆з̾ѡбразѝ є҆го̀, и҆ ѹ҆подо́би є҆го̀ ѡ҆́бразѹ человѣ́чѹ,
14 и҆лѝ нѣ́коемѹ живо́тномѹ ничто́жномѹ ѹ҆подо́би є҆го̀, пома́завъ ша́рами разли́чными и҆ ѡ҆червлени́въ ви́дъ є҆гѡ̀, и҆ всѧ́къ поро́къ, и҆́же на не́мъ є҆́сть, и҆зма́завъ,
15 и҆ сотвори́въ є҆мѹ̀ досто́йное є҆гѡ̀ ѡ҆бита́нїе, на стѣнѣ̀ поста́ви є҆̀, ѹ҆крѣпи́въ желѣ́зомъ.
16 Да не ѹ҆́бѡ паде́тъ, пред̾ѹмы́сли ѡ҆ не́мъ, вѣ́дый, ѩ҆́кѡ не мо́жетъ помощѝ себѣ̀: и҆́бо їдѡлъ є҆́сть и҆ тре́бѹетъ по́мощи.
17 Ѡ҆ стѧжа́нїихъ же и҆ ѡ҆ бра́цѣхъ и҆ ча́дѣхъ свои́хъ молѧ́сѧ, не стыди́тсѧ къ бездѹ́шномѹ глаго́лѧ,
18 и҆ ѡ҆ здра́вїи ѹ҆́бѡ немощно́е призыва́етъ, и҆ ѡ҆ животѣ̀ ме́ртвое мо́литъ, и҆ въ по́мощь неключи́мое призыва́етъ,
19 и҆ ѡ҆ пѹтеше́ствїи (про́ситъ) нижѐ ходи́ти могѹ́щаго, и҆ ѡ҆ притѧжа́нїи и҆ дѣѧ́нїи и҆ ѡ҆ рѹ́къ подтвержде́нїи некрѣ́пкаго рѹка́ми, мѹ́жества про́ситъ ѿ тогѡ̀, є҆́же всѣ́хъ є҆́сть немощнѣ́йшее.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 13 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784