1 Вели́цы бо сѹ́ть сѹдѝ твоѝ, (гд҇и,) и҆ неизглаго́ланни: сегѡ̀ ра́ди ненака҄занныѧ дѹ́ши заблѹди́ша.
2 Возмнѣ́вше бо наси́льствовати ѩ҆зы́къ ст҃ы́й беззако́ннїи, ѹ҆́зницы тмы̀ и҆ до́лгою но́щїю свѧ́зани, заключе́ни под̾ кро́вы, бѣглецы̀ вѣ́чнагѡ провѣ́дѣнїѧ лежа́ша.
3 Ѹ҆таи́тисѧ бо мнѧ́ще въ сокрове́нныхъ грѣсѣ́хъ, мра́чнымъ забве́нїѧ покрыва́ломъ расточе́ни бы́ша, ѹ҆жаса́ющесѧ лю́тѣ и҆ страши́лищами возмѹще́ни:
4 ниже́ бо содержа́й и҆̀хъ верте́пъ без̾ стра́ха сохранѝ, шѹ́мы же сходѧ́ще возмѹща́хѹ и҆̀хъ, и҆ привидѣ҄нїѧ дрѧ҄хлаѧ печа́льными ли́цами ѩ҆влѧ́хѹсѧ.
5 И҆ ѻ҆́гненнаѧ ѹ҆́бѡ ни є҆ди́на си́ла можа́ше ѡ҆свѣща́ти, нижѐ ѕвѣ́здъ свѣ́тлїи пла́менїе просвѣти́ти можа́хѹ въ тѹ̀ но́щь стра́шнѹю.
6 ѩ҆влѧ́шесѧ же и҆̀мъ то́кмѡ внеза́пный ѻ҆́гнь стра́ха и҆спо́лнь: ѹ҆страша́еми же неви́димымъ ѻ҆́нымъ призра́комъ, мнѧ́хѹ гѡ́ршаѧ бы́ти ви҄димаѧ.
7 Волше́бнагѡ же хѹдо́жества предлежа́хѹ посмѣѧ҄нїѧ, и҆ ѡ҆ премѹ́дрости велича́нїѧ ѡ҆бличе́нїе ѹ҆кори́зненно:
8 ѡ҆бѣща́ющїисѧ бо и҆згна́ти стра́хи и҆ смѹщє́нїѧ ѿ дѹшѝ болѧ́щїѧ, сі́и посмѣѧ́телнымъ стра́хомъ болѧ́хѹ.
9 И҆́бо а҆́ще и҆ ничто́же и҆̀хъ мѧте́жное ѹ҆страша́ше, ѕвѣре́й прехо́дами и҆ ѕмїє́въ звизда́ньми подви́жени погиба́хѹ тре́петни, и҆ а҆́ера ѿню́дъ неизбѣ́жнагѡ ѿрица́ющесѧ ви́дѣти.
10 Боѧзли́ваѧ бо ѕло́ба, свои́мъ свидѣ́телствомъ ѡ҆сѹжда́ема, вы́нѹ прїе́млетъ во ѹ҆́мъ лю҄таѧ, содержи́ма со́вѣстїю.
11 Ничто́же бо є҆́сть стра́хъ, то́кмѡ лише́нїе по́мощей сѹ́щихъ ѿ помышле́нїѧ.
12 Внѹ́трь же ме́нше сѹ́щее ча́ѧнїе, бо́лшее мни́тъ невѣ́дѣнїе вины̀ подаю́щїѧ мѹ́кѹ.
13 А҆ и҆̀же въ немощнѹ́ю пои́стиннѣ но́щь, и҆ ѿ немощна́гѡ а҆́да верте́пѡвъ наше́дшѹю, сно́мъ тѣ́мже спѧ́щїи,
14 ѻ҆́во ѹ҆́бѡ страши́лищами мечта́нїй гони́ми бѧ́хѹ, ѻ҆́во же дѹшѝ и҆зчеза́хѹ преда́нїемъ: внеза́пный бо и҆̀мъ и҆ неча́ѧнный стра́хъ на́йде.
15 Пото́мъ та́кѡ, кто́ либо когда̀ бѣ̀ ѻ҆на́мѡ, низпады́й хранѧ́шесѧ въ темни́цѣ без̾ желѣ́за заключе́нъ:
16 а҆́ще бо земледѣ́латель кто̀ бы́сть, и҆лѝ па́стырь, и҆лѝ трѹдѡ́въ пѹсты́нныхъ дѣ́латель, пред̾ѧ́тъ бы́въ, неизбѣ́жнѹю терпѧ́ше нѹ́ждѹ:
17 є҆ди́нымъ бо ѹ҆́жемъ тмы̀ всѝ бѧ́хѹ свѧ́зани. А҆́ще дѹ́хъ звизда́ѧй, и҆лѝ междѹ̀ ча́стыхъ древе́сныхъ вѣ́твей пти́чїй гла́съ сладкопѣ́снивый, и҆лѝ си́ла водна́ѧ текѹ́щи ѕѣ́лнѣ,
18 и҆лѝ шѹ́мъ ѕѣ́лный низпа́дающихъ ка́менїй, и҆лѝ и҆гра́ющихъ живо́тныхъ тече́нїе неви́димое, и҆лѝ рыка́ющихъ лю́тыхъ ѕвѣре́й гла́съ, и҆лѝ ѿзыва́ющьсѧ ѿ де́брей го́рскихъ гла́съ, разслаблѧ́хѹ ѻ҆́ныхъ ѹ҆страша́юще.
19 Всѧ́ бо вселе́ннаѧ свѣ́тлымъ просвѣща́шесѧ свѣ́томъ, и҆ невозбра́нными дѣ́лы содержа́шесѧ:
20 на є҆ди́ныхъ же ѻ҆́ныхъ простира́шесѧ тѧ́жкаѧ но́щь, ѡ҆́бразъ бѹ́дѹщагѡ и҆́хъ воспрїѧ́тїѧ тмы̀: са́ми же себѣ̀ бы́ша тмы̀ тѧжча́йшїи.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 17 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784