1 Реко́ша бо въ себѣ̀ помышлѧ́ющїи непра́вѡ: ма́лъ є҆́сть и҆ печа́ленъ живо́тъ на́шъ, и҆ нѣ́сть и҆зцѣле́нїѧ въ кончи́нѣ человѣ́честѣ, и҆ нѣ́сть позна́нъ возврати́выйсѧ ѿ а҆́да.
2 ѩ҆́кѡ самослѹча́йнѡ рожде́ни є҆смы̀, и҆ по се́мъ бѹ́демъ ѩ҆́коже не бы́вше: поне́же ды́мъ дыха́нїе въ но́здрехъ на́шихъ, и҆ сло́во и҆́скра въ движе́нїи се́рдца на́шегѡ:
3 є҆́йже ѹ҆га́сшей пе́пелъ бѹ́детъ тѣ́ло, и҆ дѹ́хъ на́шъ разлїе́тсѧ ѩ҆́кѡ мѧ́гкїй воздѹ́хъ,
4 и҆ и҆́мѧ на́ше забве́но бѹ́детъ во вре́мѧ, и҆ никто́же воспомѧне́тъ дѣ́лъ на́шихъ: и҆ пре́йдетъ живо́тъ на́шъ ѩ҆́кѡ слѣды̀ ѡ҆́блака, и҆ ѩ҆́кѡ мгла̀ разрѹши́тсѧ, разгна́наѧ ѿ лѹ҄чь со́лнечныхъ и҆ теплото́ю є҆гѡ̀ ѡ҆тѧгчи́вшисѧ.
5 Стѣ́ни бо прехо́дъ житїѐ на́ше, и҆ нѣ́сть возвраще́нїѧ кончи́ны на́шеѧ: ѩ҆́кѡ запеча́тана є҆́сть, и҆ никто̀ возвраща́етсѧ.
6 Прїиди́те ѹ҆̀бо и҆ наслади́мсѧ настоѧ́щихъ благи́хъ, и҆ ѹ҆потреби́мъ созда́нїѧ, ѩ҆́кѡ въ ю҆́ности ско́рѡ:
7 вїна̀ дража́йшагѡ и҆ мѵ́ра (благово́нна) и҆спо́лнимсѧ, и҆ да не пре́йдетъ на́съ цвѣ́тъ житїѧ̀:
8 ѹ҆вѣнча́имъ на́съ ши́пковыми цвѣ́ты, пре́жде не́же ѹ҆вѧ́нѹтъ:
9 ни є҆ди́нъ ѿ на́съ лише́нъ да бѹ́детъ на́шегѡ наслажде́нїѧ, вездѣ̀ ѡ҆ста́вимъ зна́менїе весе́лїѧ, ѩ҆́кѡ сїѧ̀ ча́сть на́ша и҆ жре́бїй се́й.
10 Наси́лїе сотвори́мъ ѹ҆бо́гѹ првдномѹ, не пощади́мъ вдови́цы, нижѐ ста́рца ѹ҆стыди́мсѧ сѣди́нъ многолѣ́тныхъ.
11 Да бѹ́детъ же на́мъ крѣ́пость зако́нъ пра́вды: некрѣ́пкое бо неполе́зно ѡ҆брѣта́етсѧ.
12 Ѹ҆лови́мъ же (ле́стїю) првднаго, ѩ҆́кѡ непотре́бенъ на́мъ є҆́сть и҆ проти́витсѧ дѣлѡ́мъ на́шымъ, и҆ поно́ситъ на́мъ грѣхѝ зако́на и҆ ѕлосла́витъ на́мъ грѣхѝ ѹ҆че́нїѧ на́шегѡ:
13 возвѣща́етъ на́мъ ра́зѹмъ и҆мѣ́ти бж҃їй, и҆ ѻ҆́трока гд҇нѧ себѐ и҆менѹ́етъ:
14 бы́сть на́мъ на ѡ҆бличе́нїе помышле́нїй на́шихъ:
15 тѧ́жекъ є҆́сть на́мъ и҆ къ видѣ́нїю, ѩ҆́кѡ неподо́бно (є҆́сть) и҆ны҄мъ житїѐ є҆гѡ̀, и҆ ѿмѣ҄нны (сѹ́ть) стєзѝ є҆гѡ̀:
16 въ порѹга́нїе вмѣни́хомсѧ є҆мѹ̀, и҆ ѹ҆далѧ́етесѧ ѿ пѹті́й на́шихъ ѩ҆́кѡ ѿ нечисто́тъ: блажи́тъ послѣ҄днѧѧ првдныхъ и҆ сла́витсѧ ѻ҆ц҃а̀ и҆мѣ́ти (себѣ̀) бг҃а.
17 Ѹ҆ви́димъ, а҆́ще словеса̀ є҆гѡ̀ и҆́стинна, и҆ и҆скѹ́симъ ѩ҆̀же сбѹ́дѹтсѧ є҆мѹ̀.
18 А҆́ще бо є҆́сть и҆́стинный сы́нъ бж҃їй, защи́титъ є҆го̀ и҆ и҆зба́витъ є҆го̀ ѿ рѹкѝ проти́вѧщихсѧ.
19 Досажде́нїемъ и҆ мѹ́кою и҆стѧ́жимъ є҆го̀, да ѹ҆вѣ́мы кро́тость є҆гѡ̀ и҆ и҆скѹ́симъ безѕло́бство є҆гѡ̀:
20 сме́ртїю поно́сною ѡ҆сѹ́димъ є҆го̀, бѹ́детъ бо є҆мѹ̀ разсмотре́нїе ѿ слове́съ є҆гѡ̀.
21 Сїѧ҄ помы́слиша и҆ прельсти́шасѧ: ѡ҆слѣпи́ бо и҆̀хъ ѕло́ба и҆́хъ,
22 и҆ не ѹ҆вѣ́дѣша та҄инъ бж҃їихъ, нижѐ мзды̀ ѹ҆пова́ша преподо́бїѧ, нижѐ присѹди́ша че́сти дѹша́мъ непорѡ́чнымъ.
23 ѩ҆́кѡ бг҃ъ созда̀ человѣ́ка въ неистлѣ́нїе и҆ во ѡ҆́бразъ подо́бїѧ своегѡ̀ сотворѝ є҆го̀:
24 за́вистїю же дїа́волею сме́рть вни́де въ мі́ръ: вкѹша́ютъ же ю҆̀, и҆̀же ѿ є҆ѧ̀ ча́сти сѹ́ть.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 2 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784