1 Яна 5 раздзел — Біблія — Большая частка Новага Запавета ў перакладзе П. Татарыновіча

¹ Кажны, хто верыць, што Езус ёсьць Хрыстусам, з Бога радзіўся; і кажны, хто любіць Радзіўшага, любіць і зь Яго народжанага.

² З таго пазнаём, што любім дзяцей Божых, калі Бога любім ды выконваем Ягоныя прыказанні;

³ бо-ж любасьць да Бога — гэта й ёсьць спаўнянне прыказанняў Яго; а Ягоныя прыказанні не цяжкія.*

⁴ Усё бо з Бога народжанае перамагае сьвет; а перамогай, паканаўшай сьвет, ёсьць вера наша.

⁵ Бо хтож паконывае сьвет, як ня той, каторы верыць, што Езус Хрыстус ёсьць Сынам Божым?

⁶ Той самы Езус Хрыстус, што прыйшоў праз воду, праз кроў і праз Духа ; не ў вадзе толькі, але ў вадзе й крыві; а Дух сьветчыць аб Ім, бо Дух ёсьць праўдай.

⁷ Трох бо сьветчаць на небе; Айцец, Слова й Дух Святы; і гэныя трох ёсьць адно.

⁸ І тры сьветчаць на зямлі; дух, вада і кроў; і гэтыя тры ёсьць адно.*

⁹ Калі мы прыймаем сьветчанне людзкое, дык сьветчанне Божае — большае, бо гэта ёсьць сьветчанне Божае, якім Бог сьветчыць аб сваім Сыне.

¹⁰ Хто ў Божага Сына верыць, мае Божае пасьветчанне ў сабе; хто ня верыць Сыну, прадстаўляе Яго лгарскім, бо ня уверыў у сьветчанне, якім Бог пасьветчыў аб Сыне сваім.

¹¹ Гэнае сьветчанне ў тым, што Бог даў нам жыцьцё вечнае, а тое жыцьцё ў Ягоным Сыне.

¹² Хто мае Сына, мае жыцьцё, а хто ня мае Сына Божага, ня мае жыцьця.

¹³ Гэта напісаў я вам, каб ведалі, што маеце жыцьцё вечнае вы, веручыя ў імя Сына Божага.

¹⁴ Надзея-ж, якую да Яго маем, ёсьць у тым, што калі згодна зь Ягонай воляй чаго папросім, выслухае нас;

¹⁵ а як ведаем, што нас выслухоўвае, калі чаго, дык ведаем, што атрымоўваем прошанае ад Яго.

¹⁶ Хто бачыць брата свайго, які грэшыць не на сьмерць, то хай просіць, і Ён дасьць жыцьцё грэшачаму не на сьмерць. Ёсьць грэх наводзячы сьмерць, дык не за такога кажу маліцца.*

¹⁷ Кажная нягоднасьць грахом ёсьць, але — грахом не на сьмерць.

¹⁸ Мы ведаем, што кажны народжаны з Бога ня грэшыць*, але — дзеля нараджэння з Бога — сьцеражэ сябе і злыдзень ня сьмее крануць яго.

¹⁹ Мы ведаем, што мы з Бога, а цэлы сьвет агорнуты злом.*

²⁰ Ведаем такжа, што прыйшоў Сын Божы і даў нам розум, каб пазналі Бога праўдзівага ды былі ў праўдзівым Сыне Ягоным. Ён ёсьць праўдзівым Богам і жыцьцём вечным.*

²¹ Сыночкі, высьцерагайцеся хвальшывых багоў. Амэн.

Зноскі:

3 ...не цяжкія — Збавіцель сказаўжа «ярмо маё прыемнае, а цяжар лягонькі» (Мт. 11:30).

8 Трох бо... Тры асобы Найсьв. Тройцы сьветчаць аб Хрыстусе, што Ён ёсьць Мэсыяшам і Сынам Божым. Словы аб гэтых трох сьветках у небе ні ў вадным із старадаўных рукапісаў не натуюцца і былі мабыць пазьней прыпісаныя, згодна з вучэннем Апостала аб трох сьветчачых на зямлі: Айца пры хросьце Збавіцеля ў вадзе Ёрданскай, кроў, пралітая на крыжы пазнання. Некаторыяж эгзэгэты тлумачаць гэта прасьцей: Дух, якога аддаў Збавіцель на крыжы, вада і кроў, якія выплылі з боку Збавіцеля.

16 ...не на сьмерць — калі грэшачы яшчэ не даводзіць сябе да закамянеласьці, спрычыняючай вечную сьмерць; ...не за таго кажу маліцца — Св. Ян тут хацеў павучыць што малітва за грэшніка, ня зусім адступіўшага ад веры, будзе выслухана; нельга аднак мець гэткайжа надзеі на выслуханне малітвы за грэшніка, здэцыдавана цалком адрокшагася ад Збавіцеля.

18 ...ня грэшыць — стараецца не грашыць пакуль даражыць ласкай Божай; гэта аднак ня знача, што ён аўтаматычна стаўся няздольным да граху; ...злыдзень — шатан.

19 ...мы з Бога — праз Хрост; ...агорнуты злом — грахом.

20 ...ды былі ў праўдзівым Сыне Ягоным — праз веру, ласку і міласьць.

Знайшлі памылку ў тэксце? Вылучыце яе і націсніце: Ctrl + Enter

Сябры, вельмі патрэбныя наступныя папяровыя выданні:

Сьвятая Бібля ў перакладзе Янкі Станкевіча 1973 (і Новы Закон 1970).
Эвангельле Мацьвея, Марка, Лукі, Іоана — 1926−1930, Лодзь.
Евангелля і Дзеі ў перакладах Гадлеўскага і Татарыновіча.
Генезіс і Кніга Эклезіяста, або Прапаведніка ў перакладзе Яна Пятроўскага, 1984, 1987.

Калі вы імі валодаеце і можаце прадаць, патэлефануеце па тэлефоне +375296422269, ці напішыце — bible-man@mail.ru.

Калі вы чытаеце на беларускай мове, паспрабуйце новы праект — biblia.by:

Першы ліст сьвятога Яна апостала, 5 раздзел. Пераклад П. Татарыновіча.

Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў, паралельнымі спасылкамі, тэкстамі з нумарамі Стронг. Паспрабуйце, магчыма, вы будзеце прыемна здзіўлены.

1 Яна 5 1 Яна 5 раздзел

Зноскі:

1 Яна 5 раздзел в переводах:

1 Яна 5 раздзел, комментарии: