1 И҆ посла́ша къ немѹ̀ посла́нникѡвъ словесы̀ ми́рными, глаго́люще:
2 сѐ, мы̀ ѻ҆́троцы навѹходоно́сора царѧ̀ вели́кагѡ поверга́емсѧ пред̾ тобо́ю, ѹ҆потребѝ на́съ, ѩ҆́коже ѹ҆го́дно є҆́сть лицѹ̀ твоемѹ̀:
3 сѐ, се́ла на҄ша, и҆ всѧ́кое мѣ́сто на́ше, и҆ всѐ по́ле пшени́цъ, и҆ ѡ҆́вчїѧ и҆ волѡ́выѧ стада̀, и҆ всѧ҄ ѡ҆гра҄ды селе́нїй на́шихъ, сѹ́ть пред̾ лице́мъ твои́мъ, ѹ҆потребѝ, ѩ҆́коже ѹ҆го́дно тебѣ̀:
4 сѐ, и҆ гра́ди на́ши, и҆ живѹ́щїи въ ни́хъ рабѝ твоѝ сѹ́ть: ше́дъ срѣ́ти и҆̀хъ, ѩ҆́коже є҆́сть бла́го пред̾ ѻ҆чи́ма твои́ма.
5 И҆ прїидо́ша мѹ́жїе ко ѻ҆лофе́рнѹ и҆ возвѣсти́ша є҆мѹ̀ по словесе́мъ си҄мъ.
6 И҆ сни́де на помо́рїе са́мъ и҆ си́ла є҆гѡ̀, и҆ ѹ҆твердѝ стра́жею гра́ды высѡ́кїѧ и҆ взѧ̀ и҆з̾ ни́хъ на споборе́нїе мѹже́й и҆збра́нныхъ.
7 И҆ прїѧ́ша є҆го̀ ті́и и҆ всѧ҄ ѡ҆крє́стнаѧ и҆́хъ съ вѣнца́ми и҆ ли҄ки и҆ тѷмпа҄ны.
8 И҆ разорѝ всѧ҄ предѣ́лы и҆́хъ, и҆ дѹбра҄вы и҆́хъ и҆зсѣчѐ. И҆ бѣ̀ заповѣ́дано є҆мѹ̀ и҆стреби́ти всѣ́хъ богѡ́въ землѝ, ѩ҆́кѡ да самомѹ̀ є҆ди́номѹ навѹходоно́сорѹ послѹ́жатъ всѝ ро́ди и҆ всѝ ѩ҆зы́цы, и҆ всѧ҄ племена̀ и҆́хъ да призыва́ютъ є҆го̀ въ бо́га.
9 И҆ прїи́де на лицѐ є҆сдрилѡ́на бли́з̾ дѡте́и, ѩ҆́же є҆́сть проти́вѹ вели́кїѧ пилы̀ ї҆ѹде́и,
10 и҆ ѡ҆полчи́сѧ междѹ̀ гава́емъ и҆ скѵ́ѳскимъ гра́домъ, и҆ бѣ̀ та́мѡ мц҇ъ дні́й, ко є҆́же собра́ти всѧ́кїй припа́съ си́лы своеѧ̀.
Нашли в тексте ошибку? Выделите её и нажмите:
Ctrl + Enter
Книга Иудифи, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784