1 И҆ въ лѣ́то ѻ҆смоена́десѧть, и҆ въ два́десѧть вторы́й (де́нь) пе́рвагѡ мц҇а, бы́сть сло́во въ домѹ̀ навѹходоно́сора царѧ̀ а҆ссѷрі́йска, ѿмсти́ти всѧ́цѣй землѝ, ѩ҆́коже глаго́лаше.
2 И҆ созва̀ всѧ҄ слѹжи́тєли своѧ҄ и҆ всѧ҄ вельмо́жы своѧ҄, и҆ соѡбщѝ съ ни́ми та́йнѹ совѣ́та своегѡ̀, и҆ совершѝ всю̀ ѕло́бѹ землѝ ѿ ѩ҆́стъ свои́хъ:
3 и҆ ті́и сѹди́ша и҆стреби́ти всѧ́кѹ пло́ть, и҆̀же не послѣ́доваша словесѝ ѹ҆́стъ є҆гѡ̀.
4 И҆ бы́сть, є҆гда̀ совершѝ совѣ́тъ сво́й, призва̀ навѹходоно́соръ ца́рь а҆ссѷрі́йскїй ѻ҆лофе́рна вождонача́лника си́лы своеѧ̀, втора́го сѹ́ща по не́мъ, и҆ речѐ къ немѹ̀:
5 сїѧ҄ глаго́летъ ца́рь вели́кїй, господи́нъ всеѧ̀ землѝ: сѐ, ты̀ и҆зы́деши ѿ лица̀ моегѡ̀ и҆ во́змеши съ собо́ю мѹже́й ѹ҆пова́ющихъ въ крѣ́пости свое́й, пѣшцє́въ до ты́сѧщей сто̀ два́десѧть, и҆ мно́жество ко́ней со вса́дниками ты́сѧщей двана́десѧть,
6 и҆ и҆зы́деши бо срѣ́тенїе все́й землѝ на за́пады, ѩ҆́кѡ не повинѹ́шасѧ глаго́лѹ ѹ҆́стъ мои́хъ:
7 и҆ возвѣсти́ши и҆̀мъ ѹ҆готовлѧ́ти зе́млю и҆ во́дѹ, ѩ҆́кѡ и҆зы́дѹ въ ѩ҆́рости мое́й на ни́хъ, и҆ покры́ю всѐ лицѐ землѝ нога́ми си́лы моеѧ̀, и҆ да́мъ и҆̀хъ въ расхище́нїе и҆̀мъ:
8 и҆ ѩ҆́звеннїи и҆́хъ и҆спо́лнѧтъ дє́бри и҆ пото́ки и҆́хъ, и҆ рѣка̀ наводнѧ́ющаѧсѧ ме́ртвыми и҆́хъ напо́лнитсѧ:
9 и҆ приведѹ̀ плѣ́нъ и҆́хъ до конє́цъ всеѧ̀ землѝ:
10 ты́ же и҆зше́дъ приѡдержи́ши мнѣ̀ всѧ́къ предѣ́лъ и҆́хъ, и҆ ѿдадѹ́тъ тебѣ̀ сами́хъ себѐ, и҆ соблюде́ши мѝ и҆̀хъ на де́нь ѡ҆бличе́нїѧ и҆́хъ:
11 непокарѧ́ющихсѧ же не пощади́тъ ѻ҆́ко твоѐ, є҆́же да́ти и҆̀хъ на ѹ҆бїе́нїе и҆ расхище́нїе во все́й землѝ твое́й:
12 ѩ҆́кѡ жи́въ а҆́зъ, и҆ держа́ва ца́рства моегѡ̀: глаго́лахъ и҆ сотворю̀ сїѧ҄ рѹко́ю мое́ю:
13 ты́ же да не престѹпи́ши є҆ди́нагѡ ко́егѡ ѿ глагѡ́лъ господи́на твоегѡ̀, но соверша́ѧ да соверши́ши, ѩ҆́коже заповѣ́дахъ тебѣ̀, и҆ да не ѹ҆косни́ши сотвори́ти сїѧ҄.
14 И҆ и҆зы́де ѻ҆лофе́рнъ ѿ лица̀ господи́на своегѡ̀, и҆ созва̀ всѧ҄ вельмо́жы и҆ воевѡ́ды и҆ нача́лники си́лы а҆ссѹ́рскїѧ,
15 и҆ и҆зчи́сли и҆збра́нныхъ мѹже́й на ѡ҆полче́нїе, ѩ҆́коже заповѣ́да є҆мѹ̀ господи́нъ є҆гѡ̀, до двана́десѧть те́мъ, и҆ ко́нникѡвъ стрѣлцє́въ двана́десѧть ты́сѧщей,
16 и҆ ѹ҆стро́и и҆̀хъ, и҆́мже ѡ҆́бразомъ бра́ни мно́жество ѹ҆строева́етсѧ:
17 и҆ взѧ̀ велблю́ды и҆ ѻ҆слы̀ и҆ мскѝ припа́сѡвъ ра́ди свои́хъ мно́жество мно́го ѕѣлѡ̀, и҆ ѻ҆́вцы и҆ волы̀ и҆ козлы̀ на ѹ҆гото́ванїе и҆́хъ, и҆̀мже не бѣ̀ числа̀,
18 и҆ пи́щи всѧ́комѹ мѹ́жѹ во мно́жествѣ, и҆ зла́та и҆ сребра̀ и҆з̾ до́мѹ царе́ва мно́гѡ ѕѣлѡ̀:
19 и҆ и҆зы́де са́мъ и҆ всѧ̀ си́ла є҆гѡ̀ въ пѹ́ть, є҆́же пред̾итѝ царю̀ навѹходоно́сорѹ и҆ покры́ти всѐ лицѐ землѝ къ за́падѡмъ колесни́цами и҆ ко́нницами и҆ пѣшца́ми и҆збра́нными свои́ми:
20 и҆ мно́гое примѣше́нїе ѩ҆́кѡ прѹ́зи и҆зыдо́ша съ ни́ми и҆ ѩ҆́кѡ песо́къ землѝ, не бо̀ бѣ̀ числа̀ ѿ мно́жества и҆́хъ.
21 И҆ и҆зыдо́ша и҆з̾ нїнеѵі́и пѹте́мъ трїе́хъ дні́й на лицѐ по́лѧ вектїле́ѳъ, и҆ ѡ҆полчи́шисѧ ѿ вектїле́ѳа бли́з̾ горы̀ сѹ́щїѧ ѡ҆шѹ́юю вы́шнїѧ кїлїкі́и.
22 И҆ поѧ̀ всю̀ си́лѹ свою̀, пѣшцы̀ и҆ ко́нники и҆ колєсни́цы своѧ҄, и҆ ѿи́де ѿтѹ́дѹ въ го́рнюю,
23 и҆ и҆зсѣчѐ фѹ́да и҆ лѹ́да, и҆ поплѣнѝ всѣ́хъ сынѡ́въ рассі́са и҆ сынѡ́въ ї҆сма́илевыхъ сѹ́щихъ по лицѹ̀ пѹсты́ни хеллеѡ́нскїѧ къ ю҆́гѹ.
24 И҆ пре́йде є҆ѵфра́тъ, и҆ про́йде месопота́мїю, и҆ раскопа̀ всѧ҄ гра́ды высѡ́кїѧ сѹ́щыѧ при пото́цѣ а҆врѡ́нѣ, до́ндеже прїитѝ къ мо́рю:
25 и҆ ѡ҆б̾ѧ́тъ предѣ́лы кїлїкї҄йскїѧ, и҆ посѣчѐ всѣ́хъ противостоѧ́щихъ себѣ̀: и҆ прїи́де да́же до предѣ҄лъ ї҆а́феѳовыхъ, сѹ́щихъ къ ю҆́гѹ на лицы̀ а҆раві́и,
26 и҆ ѡ҆бы́де всѣ́хъ сынѡ́въ мадїа́млихъ, и҆ пожжѐ селє́нїѧ и҆́хъ и҆ плѣнѝ стада̀ и҆́хъ:
27 и҆ сни́де на по́ле дама́сково во дне́хъ жа́твы пшени́цъ, и҆ пожжѐ всѧ҄ ни҄вы и҆́хъ, а҆ ѡ҆́вчїѧ и҆ волѡ́выѧ стада̀ дадѐ въ погѹбле́нїе, и҆ гра́ды и҆́хъ поплѣнѝ, и҆ полѧ̀ и҆́хъ ѡ҆пѹстошѝ, и҆ поразѝ всѧ҄ ю҆́ношы и҆́хъ ѻ҆́стрїемъ меча̀.
28 И҆ нападѐ стра́хъ и҆ тре́петъ є҆гѡ̀ на всѣ́хъ живѹ́щихъ въ примо́рїи, сѹ́щихъ въ сїдѡ́нѣ и҆ тѵ́рѣ и҆ ѡ҆бита́ющихъ въ сѹ́рѣ и҆ ѻ҆кі́нѣ и҆ на всѣ́хъ живѹ́щихъ во ї҆емнаа́нѣ. И҆ живѹ́щїи во а҆зѡ́тѣ и҆ а҆скалѡ́нѣ ѹ҆боѧ́шасѧ є҆гѡ̀ ѕѣлѡ̀.
Нашли в тексте ошибку? Выделите её и нажмите:
Ctrl + Enter
Книга Иудифи, 2 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784