1 И҆ бѹ́сть ѩ҆́кѡ преста̀ вопїю́щи ко бг҃ѹ ї҆и҃левѹ и҆ сконча̀ всѧ҄ глаго́лы сїѧ҄,
2 и҆ воста̀ ѿ поверже́нїѧ и҆ призва̀ рабы́ню свою̀ и҆ сни́де въ до́мъ, въ не́мже пребыва́ше во дни҄ сѹббѡ҄тнїѧ и҆ въ пра́здники своѧ҄,
3 и҆ сложѝ вре́тище, и҆́мже ѡ҆дѣва́шесѧ, и҆ совлечѐ ри҄зы вдовства̀ своегѡ̀, и҆ ѡ҆бмы̀ тѣ́ло водо́ю и҆ пома́засѧ мѵ́ромъ бога́тымъ, и҆ разчеса̀ власы̀ главы̀ своеѧ̀ и҆ возложѝ ѹ҆вѧ́сло на ню̀ и҆ ѡ҆блече́сѧ въ ри҄зы весе́лїѧ своегѡ̀, и҆́миже ѡ҆дѣва́шесѧ во дни҄ живота̀ мѹ́жа своегѡ̀ манассі́и:
4 и҆ взѧ̀ санда҄лїѧ на но́ги своѧ҄, и҆ ѡ҆бложѝ мони҄ста и҆ цѣ҄пки, и҆ пє́рстни и҆ ѹ҆серѧ҄зи и҆ всѐ ѹ҆краше́нме своѐ, и҆ ѹ҆краси́сѧ ѕѣлѡ̀ на прельще́нме ѻ҆че́съ мѹ́жескихъ, є҆ли́цы а҆́ще ѹ҆ви́дѧтъ ю҆̀:
5 и҆ дадѐ рабы́ни свое́й ѡ҆плете́нъ сосѹ́дъ вїна̀ и҆ чва́нецъ є҆ле́а, и҆ мѣше́цъ напо́лни мѹко́ю и҆ плетени҄цы смо́квами и҆ хлѣ҄бы чи́стыми, и҆ ѡ҆бвѝ всѧ҄ сосѹ́ды своѧ҄, и҆ возложѝ на ню̀.
6 И҆ и҆зыдо́стѣ ко вратѡ́мъ гра́да ветѷлѹ́и и҆ ѡ҆брѣто́стѣ стоѧ́щихъ при ни́хъ ѻ҆зі́ю и҆ ста́рцєвъ гра́да хаврі́на и҆ хармі́на.
7 ѩ҆́коже ѹ҆ви́дѣша ю҆̀, и҆ бѣ̀ и҆змѣне́но лицѐ є҆ѧ̀, и҆ ри́зѹ премѣне́ннѹ є҆ѧ̀, и҆ ѹ҆диви́шасѧ ѡ҆ красотѣ̀ є҆ѧ̀ попремно́гѹ ѕѣлѡ̀ и҆ рѣ́ша є҆́й:
8 бг҃ъ, бг҃ъ ѻ҆тє́цъ на́шихъ да да́стъ тѧ̀ въ благода́ть и҆ соверши́тъ начина҄нїѧ твоѧ҄ въ вели́чїе сынѡ́въ ї҆и҃левыхъ и҆ возвыше́нїе ї҆ер҇ли́ма. И҆ поклони́сѧ бг҃ѹ
9 и҆ речѐ къ ни҄мъ: повели́те ѿве́рсти мѝ врата̀ гра́да, и҆ и҆зы́дѹ ко соверше́нїю слове́съ, и҆̀хже глаго́ласте со мно́ю. И҆ повелѣ́ша ю҆́ношамъ ѿве́рсти є҆й, ѩ҆́коже глаго́лаше.
10 И҆ сотвори́ша та́кѡ. И҆ и҆зы́де ї҆ѹді́ѳъ сама̀ и҆ рабы́нѧ є҆ѧ̀ съ не́ю: назира́хѹ же ю҆̀ мѹ́жїе гра́да, до́ндеже сни́де съ горы̀, до́ндеже пре́йде ю҆до́ль, и҆ ктомѹ̀ не ѹ҆ви́дѣша є҆ѧ̀.
11 И҆ и҆дѧ́стѣ ю҆до́лїю прѧ́мѡ. И҆ срѣ́те ю҆̀ пе́рваѧ стра́жа а҆ссѷрі́йскаѧ,
12 и҆ взѧ́ша ю҆̀ и҆ вопроси́ша: ѿ ко́ихъ є҆сѝ; и҆ ѿкѹ́дѹ грѧде́ши; и҆ ка́мѡ и҆́деши; И҆ речѐ: дщѝ є҆́смь є҆вре́ѡвъ и҆ ѹ҆бѣга́ю ѿ лица̀ и҆́хъ, ѩ҆́кѡ и҆́мѹтъ пре́дани бы́ти ва́мъ на поглоще́нїе:
13 и҆ а҆́зъ грѧдѹ̀ пред̾ лицѐ ѻ҆лофе́рна вождонача́лника си́лы ва́шеѧ, є҆́же возвѣсти́ти глаго́лы и҆́стины, и҆ покажѹ̀ пред̾ лице́мъ є҆гѡ̀ пѹ́ть, по немѹ́же по́йдетъ и҆ воз̾ѡблада́етъ все́ю го́рнею, и҆ не поги́бнетъ ѿ мѹже́й є҆гѡ̀ пло́ть є҆ди́на,нижѐ дѹ́хъ жи́зни.
14 ѩ҆́коже ѹ҆слы́шаша мѹ́жїе глаго́лы є҆ѧ̀ и҆ ѹ҆смотри́ша лицѐ є҆ѧ̀, и҆ бѧ́ше пред̾ ни́ми чѹдна̀ красото́ю ѕѣлѡ̀, и҆ рѣ́ша къ не́й:
15 спасла̀ є҆сѝ дѹ́шѹ твою̀, потща́вшисѧ сни́ти пред̾ лицѐ господи́на на́шегѡ: и҆ нн҃ѣ пристѹпѝ ко шатрѹ̀ є҆гѡ̀, и҆ ѿ на́съ прово́дѧтъ тѧ̀, до́ндеже предадѹ́тъ тѧ̀ въ рѹ́цѣ є҆гѡ̀:
16 а҆́ще же ста́неши пред̾ ни́мъ, да не ѹ҆бои́шисѧ се́рдцемъ твои́мъ, но возвѣстѝ по глаго́лѡмъ твои҄мъ, и҆ бла́го тебѣ̀ сотвори́тъ.
17 И҆ и҆збра́ша ѿ себє̀ мѹже́й сто̀ и҆ присовокѹпи́ша є҆́й и҆ рабы́ни є҆ѧ̀, и҆ ведо́ша ѧ҆̀ ко шатрѹ̀ ѻ҆лофе́рновѹ.
18 И҆ бы́сть стече́нїе во все́мъ ѡ҆полче́нїи, разгласи́сѧ бо по шатрѡ́мъ прише́ствїе є҆ѧ̀: и҆ прише́дше ѡ҆крѹжа́хѹ ю҆̀, ѩ҆́кѡ стоѧ́ше внѣ̀ шатра̀ ѻ҆лофе́рнова, до́ндеже возвѣсти́ша є҆мѹ̀ ѡ҆ ней.
19 И҆ чѹдѧ́хѹсѧ ѡ҆ красотѣ̀ є҆ѧ̀ и҆ ѹ҆дивлѧ́хѹсѧ сынѡ́мъ ї҆и҃лєвымъ ѡ҆ не́й, и҆ рѣ́ша кі́йждо ко бли́жнемѹ ссвемѹ̀: кто̀ пре́зритъ люді́й си́хъ, и҆̀же и҆́мѹтъ ѹ҆ себє̀ же́нъ таковы́хъ; ѩ҆́кѡ не добро̀ є҆́сть ѡ҆ста́вити и҆з̾ ни́хъ мѹ́жа є҆ди́наго, и҆̀же ѡ҆ста́влени бы́вше возмо́гѹтъ прехи́трити всю̀ зе́млю.
20 И҆ и҆зыдо́ша спѧ́щїи при ѻ҆лофе́рнѣ и҆ всѝ слѹжи́телїе є҆гѡ̀ и҆ введо́ша ю҆̀ въ шате́ръ.
21 И҆ бѣ̀ ѻ҆лофе́рнъ ѡ҆почива́ѧ на ѻ҆дрѣ̀ свое́мъ под̾ завѣ́сою, ѩ҆́же бѣ̀ ѿ порфѵ́ры и҆ зла́та и҆ смара́гда и҆ ка́менїй многоцѣ́нныхъ втка́нныхъ.
22 И҆ возвѣсти́ша є҆мѹ̀ ѡ҆ не́й, и҆ и҆зы́де въ предсѣ́нїе, и҆ лампа҄ды срє́брѧныѧ пред̾идѧ́хѹ є҆мѹ̀.
23 Е҆гда́ же прїи́де пред̾ лицѐ є҆гѡ̀ ї҆ѹді́ѳъ и҆ слѹ́гъ є҆гѡ̀, диви́шасѧ всѝ ѡ҆ красотѣ̀ лица̀ є҆ѧ̀. И҆ па́дши на лицѐ поклони́сѧ є҆мѹ̀: и҆ воздвиго́ша ю҆̀ рабѝ є҆гѡ̀.
Нашли в тексте ошибку? Выделите её и нажмите: Ctrl + Enter

Книга Иудифи, 10 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.