1 И҆ бы́сть сло́во гд҇не ко мнѣ̀ гл҃ѧ:
2 сы́не человѣ́чь, ѡ҆братѝ лицѐ твоѐ къ горѣ̀ сеі́ръ и҆ прорцы̀ на ню̀ и҆ рцы̀ є҆́й:
3 сїѧ҄ гл҃етъ а҆дѡнаї̀ гд҇ь: сѐ, а҆́зъ на тѧ̀, горо̀ сеі́ръ, и҆ прострѹ̀ рѹ́кѹ мою̀ на тѧ̀ и҆ поста́влю тѧ̀ пѹ́стѹ, и҆ ѡ҆пѹстѣ́еши,
4 и҆ во градѣ́хъ твои́хъ пѹсты́ню сотворю̀, и҆ ты̀ въ пѹсты́ню бѹ́деши, и҆ ѹ҆разѹмѣ́еши, ѩ҆́кѡ а҆́зъ є҆́смь гд҇ь.
5 Поне́же бы́сть въ тебѣ̀ вражда̀ вѣ́чнаѧ, и҆ присѣдѣ́ла є҆сѝ до́мѹ ї҆и҃левѹ лѹка́вствомъ, рѹко́ю врагѡ́въ съ мече́мъ во вре́мѧ печа́ли и҆́хъ и҆ во вре́мѧ непра́вды, на послѣ́докъ:
6 сегѡ̀ ра́ди живѹ̀ а҆́зъ, гл҃етъ а҆дѡнаї̀ гд҇ь, поне́же въ кро́ви согрѣши́ла є҆сѝ, и҆ кро́вь пожене́тъ тѧ̀, кро́вь возненави́дѣла є҆сѝ, и҆ кро́вь и҆ждене́тъ тѧ̀.
7 И҆ поста́влю го́рѹ сеі́ръ пѹ́стѹ и҆ ѡ҆пѹстѣ́вшѹ, и҆ погѹблю̀ ѿ неѧ̀ человѣ́ки и҆ скоты̀, (и҆ приходѧ́ша и҆ ѿходѧ́ща:)
8 и҆ напо́лню ѩ҆́звеными твои́ми хо́лмы твоѧ҄ и҆ дє́бри твоѧ҄, и҆ на всѣ́хъ по́лехъ твои́хъ ѩ҆́звенїи мече́мъ падѹ́тъ въ тебѣ̀:
9 и҆ пѹ́стѹ во вѣ́къ поста́влю тѧ̀, и҆ гра́ди твоѝ не населѧ́тсѧ ктомѹ̀, и҆ ѹ҆разѹмѣ́еши, ѩ҆́кѡ а҆́зъ є҆́смь гд҇ь.
10 Поне́же рекла̀ є҆сѝ: ѻ҆́ба ѩ҆зы҄ка и҆ ѻ҆́бѣ странѣ҄ моѝ бѹ́дѹтъ, и҆ возмѹ̀ и҆̀хъ въ наслѣ́дїе, а҆ гд҇ь та́мѡ є҆́сть:
11 сегѡ̀ ра́ди живѹ̀ а҆́зъ, гл҃етъ а҆дѡнаї̀ гд҇ь, и҆ сотворю̀ тебѣ̀ по враждѣ̀ твое́й и҆ по ре́вности твое́й, ю҆́же сотвори́ла є҆сѝ ѿ ненавидѣ́нїѧ къ ни҄мъ, и҆ позна́нъ бѹ́дѹ тобо́ю, є҆гда̀ и҆́мамъ тебѐ сѹди́ти, и҆ ѹ҆разѹмѣ́еши, ѩ҆́кѡ а҆́зъ є҆́смь гд҇ь.
12 Слы́шахъ гла́съ всѣ́хъ хѹле́нїй твои́хъ, ѩ҆̀же глаго́лала є҆сѝ: го́ры ї҆и҃лєвы пѹ҄сты даны̀ на́мъ во снѣ́дь:
13 и҆ велерѣ́чила є҆сѝ на мѧ̀ ѹ҆сты̀ твои́ми и҆ ѹ҆мно́жила на мѧ̀ словеса̀, а҆́зъ же ѹ҆слы́шахъ.
14 Сегѡ̀ ра́ди та́кѡ гл҃етъ а҆дѡнаї̀ гд҇ь: во весе́лїи всеѧ̀ землѝ пѹ́стѹ тѧ̀ сотворю̀:
15 ѩ҆́коже пора́доваласѧ є҆сѝ ѡ҆ наслѣ́дїй до́мѹ ї҆и҃лева, ѩ҆́кѡ поги́бе, та́кѡ сотворю̀ тебѣ̀: пѹста̀ бѹ́деши, горо̀ сеі́ръ, и҆ всѧ̀ ї҆дѹме́а потреби́тсѧ, и҆ ѹ҆вѣ́дѧтъ, ѩ҆́кѡ а҆́зъ є҆́смь гд҇ь бг҃ъ и҆́хъ.
Нашли в тексте ошибку? Выделите её и нажмите:
Ctrl + Enter
Книга пророка Иезекииля, 35 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784