1 И҆ введе́ мѧ во дво́ръ внѣ́шнїй на восто́ки, прѧ́мѡ вра́тъ ѩ҆̀же къ сѣ́верѹ, и҆ введе́ мѧ (внѹ́трь), и҆ сѐ, прегра́дъ пѧ́ть держа́щыѧсѧ про́чагѡ и҆ держа́щыѧсѧ предѣ́ла къ сѣ́верѹ,
2 проти́вѹ лица̀ ста̀ лакте́й долгота̀ къ сѣ́верѹ, а҆ широта̀ пѧтьдесѧ́тъ лакте́й,
3 распи҄саны ѩ҆́коже врата̀ двора̀ внѹ́треннѧгѡ, и҆ ѩ҆́коже междѹстѡ́лпїѧ внѣ́шнѧгѡ двора̀ чинорасполо́жєны, прѧмоли҄чны притво́ры трѝ.
4 И҆ прѧ́мѡ прегра́дамъ прохо́дъ десѧтѝ лакте́й въ широтѹ̀, во внѹ́трєннѧѧ пѹтѝ є҆ди́нагѡ ла́ктѧ на сто̀ лакте́й долгота̀, и҆ двє́ри и҆́хъ къ сѣ́верѹ.
5 И҆ прохо́ди го́рничнїи та́кожде, ѩ҆́кѡ и҆зница́ше междѹсто́лпїе и҆з̾ негѡ̀, ѿ до́лнагѡ междѹсто́лпїѧ, и҆ разстоѧ́нїе: си́це междѹсто́лпїе и҆ разстоѧ́нїе,
6 и҆ си́це притво́ры: поне́же трегѹ҄бы бѧ́хѹ и҆ столпѡ́въ не и҆мѣ́ша, ѩ҆́коже столпѝ прегра́дъ: тогѡ̀ ра́ди и҆зница́хѹ и҆з̾ ни́жнихъ и҆ сре́днихъ ѿ землѝ.
7 И҆ свѣ́тъ внѣѹ́дѹ, ѩ҆́коже прегра҄ды двора̀ внѣ́шнѧгѡ, зрѧ́щыѧ проти́вѹ прегра́дамъ, ѩ҆̀же къ сѣ́верѹ, долгота̀ пѧти́десѧти лакте́й.
8 Занѐ долгота̀ прегра́дъ зрѧ́щихъ во дво́ръ внѣ́шнїй бѧ́ше пѧти́десѧти лакте́й, и҆ ты҄ѧ сѹ́ть прѧмоли҄чны тѣ҄мъ: все́ же (бѣ̀) ста̀ лакте́й.
9 Двє́ри же прегра́дъ тѣ́хъ вхо́да, и҆̀же на восто́ки, є҆́же входи́ти и҆́ми ѿ двора̀ внѣ́шнѧгѡ,
10 по свѣ́тѹ сѹ́щагѡ въ нача́лѣ прохо́да: и҆ къ ю҆́гѹ на лицѐ ю҆́га, и҆ прѧ́мѡ про́чемѹ, и҆ прѧ́мѡ раздѣле́нїѧ, и҆ прегра҄ды,
11 и҆ прохо́дъ проти́вѹ лицѹ̀ и҆́хъ, по мѣ́рамъ прегра́дъ ѩ҆̀же къ сѣ́верѹ и҆ по долготѣ̀ и҆́хъ и҆ по широтѣ̀ и҆́хъ, и҆ по всѣ҄мъ и҆схо́дѡмъ и҆́хъ и҆ по всѣ҄мъ враще́нїємъ и҆́хъ, и҆ по свѣ́тѡмъ и҆́хъ и҆ по две́ремъ и҆́хъ,
12 прегра́дъ ѩ҆̀же къ ю҆́гѹ, и҆ по две́ремъ ѿ нача́ла прохо́да а҆́ки къ свѣ́тѹ разстоѧ́нїѧ тро́сти, и҆ на восто́къ є҆́же входи́ти и҆́ми.
13 И҆ речѐ ко мнѣ̀: прегра҄ды, ѩ҆̀же къ сѣ́верѹ, и҆ прегра҄ды, ѩ҆̀же къ ю҆́гѹ, сѹ́щыѧ проти́вѹ лицѹ̀ разстоѧ́нїй, сїѧ҄ сѹ́ть прегра҄ды ст҃а́гѡ, въ ни́хже ѩ҆дѧ́тъ жерцы̀ сы́нове садѹ́кѡвы, и҆̀же пристѹпа́ютъ ко гд҇еви, ст҃а҄ѧ ст҃ы́хъ, и҆ та́мѡ положа́тъ ст҃а҄ѧ ст҃ы́хъ и҆ же́ртвѹ, и҆ ѩ҆̀же за грѣхѝ и҆ ѩ҆̀же за невѣ́дѣнїе, поне́же мѣ́сто ст҃о є҆́сть.
14 Да не вхо́дѧтъ та́мѡ, кромѣ̀ жерцє́въ, и҆ да не и҆схо́дѧтъ ѿ ст҃а́гѡ во дво́ръ внѣ́шнїй, ѩ҆́кѡ да пр҇нѡ ст҃и бѹ́дѹтъ приносѧ́щїи, и҆ да не прикаса́ютсѧ ри́замъ и҆́хъ, въ ни́хже слѹ́жатъ, поне́же ст҃а сѹ́ть, но да ѡ҆блекѹ́тсѧ въ ри҄зы и҆́ны, є҆гда̀ прикаса́ютсѧ лю́демъ.
15 И҆ соверши́сѧ размѣ́ренїе хра́ма внѹтрьѹ́дѹ. И҆ и҆зведе́ мѧ по пѹтѝ вра́тъ зрѧ́щихъ на восто́къ, и҆ размѣ́ри подо́бїе хра́ма ѡ҆́крестъ чинорасположе́нїемъ.
16 И҆ ста̀ созадѝ вра́тъ зрѧ́щихъ на восто́къ, и҆ размѣ́ри пѧ́ть сѡ́тъ тро́стїю мѣ́рною.
17 И҆ ѡ҆брати́сѧ на сѣ́веръ, и҆ размѣ́ри на лицѐ сѣ́вера лакте́й пѧ́ть сѡ́тъ тро́стїю мѣ́рною.
18 И҆ ѡ҆брати́сѧ къ мо́рю, и҆ размѣ́ри на лицѐ мо́рѧ пѧ́ть сѡ́тъ лакте́й тро́стїю мѣ́рною.
19 И҆ ѡ҆брати́сѧ на ю҆́гъ, и҆ размѣ́ри проти́вѹ ю҆́гѹ пѧ́ть сѡ́тъ тро́стїю мѣ́рною.
20 Четы́ри страны҄ то́южде тро́стїю: и҆ расположѝ є҆го̀, и҆ ѡ҆гра́дѹ ѡ҆́крестъ є҆мѹ̀, пѧ́ть сѡ́тъ лакте́й (долготѹ̀) на восто́къ, и҆ пѧ́ть сѡ́тъ лакте́й широтѹ̀, є҆́же разлѹча́ти междѹ̀ ст҃ы́ми и҆ междѹ̀ предстѣ́нїемъ сѹ́щимъ въ чиноположе́нїи хра́ма.
Нашли в тексте ошибку? Выделите её и нажмите:
Ctrl + Enter
Книга пророка Иезекииля, 42 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784