1 И҆ бы́сть сло́во гд҇не ко мнѣ̀, въ девѧ́тое лѣ́то, въ мц҇ъ десѧ́тый, въ десѧ́тый де́нь мц҇а, гл҃ѧ:
2 сы́не человѣ́чь, напишѝ себѣ̀ и҆́мѧ днѐ сегѡ̀, ѿ негѡ́же ѹ҆крѣпи́сѧ ца́рь вавѷлѡ́нскїй на ї҆ер҇ли́мъ, ѿ сегѡ̀ днѐ, и҆́же дне́сь,
3 и҆ рцы̀ при́тчѹ къ до́мѹ прогнѣвлѧ́ющемѹ, и҆ рече́ши къ ни҄мъ: сїѧ҄ гл҃етъ а҆дѡнаї̀ гд҇ь: наста́ви коно́бъ, наста́ви и҆ влі́й въ ѻ҆́нь во́дѹ,
4 и҆ ве́рзи въ ѻ҆́нь на дво́е разсѣчє́наѧ, всѧ́кое разсѣче́нїе до́брое, го́лень и҆ ра́мо, ѡ҆брѣ҄зана ѿ косте́й,
5 ѡ҆ и҆збра́нныхъ скотѡ́въ взѧ҄таѧ, и҆ подгнѣща́й костьмѝ под̾ нимѝ: возврѣ̀ и҆ воскипѣ̀, и҆ свари́шасѧ кѡ́сти є҆гѡ̀ посредѣ̀ є҆гѡ̀.
6 Тогѡ̀ ра́ди сїѧ҄ гл҃етъ а҆дѡнаї̀ гд҇ь: ѽ, градѐ крове́й! коно́бе, въ не́мже є҆́сть ѩ҆́дъ, и҆ ѩ҆́дъ не и҆зы́де и҆з̾ негѡ̀: по ѹ҆́дѡмъ є҆гѡ̀ и҆знесѐ, не падѐ на не́мъ жре́бїй.
7 ѩ҆́кѡ кро́вь є҆гѡ̀ средѣ̀ є҆гѡ̀ є҆́сть, на гла́дцѣмъ ка́мени вчини́хъ ю҆̀: не пролїѧ́хъ є҆ѧ̀ на зе́млю, є҆́же покры́ти ю҆̀ земле́ю,
8 є҆́же навестѝ ѩ҆́рость мою̀ (на ню̀), во ѿмще́нїе є҆́же ѿмсти́ти: да́хъ кро́вь є҆гѡ̀ на гла́дцѣмъ ка́мени, є҆́же не покры́ти є҆ѧ̀.
9 Тогѡ̀ ра́ди сїѧ҄ гл҃етъ а҆дѡнаї̀ гд҇ь: ѽ, лю́тѣ, градѐ крове́й! а҆́зъ же возвели́чѹ главню̀
10 и҆ ѹ҆мно́жѹ дрова̀ и҆ возгнѣщѹ̀ ѻ҆́гнь, ѩ҆́кѡ да и҆ста́ютъ мѧса̀, и҆ ѡ҆скѹдѣ́етъ ю҆ха̀, и҆ кѡ́сти и҆ста́ютъ,
11 и҆ ста́нетъ на главнѧ́хъ є҆гѡ̀, (то́щь) разгорѣ́сѧ, ѩ҆́кѡ да и҆згори́тъ, и҆ распали́тсѧ и҆ сгори́тъ мѣ́дь є҆гѡ̀, и҆ и҆ста́етъ средѣ̀ є҆гѡ̀ нечистота̀ є҆гѡ̀, и҆ ѡ҆скѹдѣ́етъ ѩ҆́дъ є҆гѡ̀:
12 да смири́тсѧ ѩ҆́дъ є҆гѡ̀, и҆ не и҆зы́детъ и҆з̾ негѡ̀ мно́гїй ѩ҆́дъ є҆гѡ̀, и҆ посрами́тсѧ ѩ҆́дъ є҆гѡ̀:
13 въ нечистотѣ̀ твое́й ѹ҆кро́пъ, поне́же ѡ҆сквернѧ́лсѧ є҆сѝ ты̀ и҆ не ѡ҆чи́стилсѧ ѿ нечистоты̀ твоеѧ̀: и҆ что̀ бѹ́детъ а҆́ще не ѡ҆чи́стишисѧ по се́мъ, до́ндеже и҆спо́лню ѩ҆́рость мою̀ въ тебѣ̀;
14 А҆́зъ гд҇ь гл҃ахъ, и҆ прїи́детъ, и҆ сотворю̀, и҆ не ѹ҆косню̀, и҆ не пощажѹ̀, и҆ не бѹ́дѹ ѹ҆моле́нъ: по пѹтє́мъ твои҄мъ и҆ по помыслѡ́мъ твои҄мъ сѹждѹ̀ тебѣ̀, гл҃етъ а҆дѡнаї̀ гд҇ь: сегѡ̀ ра́ди, сѐ, а҆́зъ сѹждѹ̀ тебѣ̀ по кро́вемъ твои҄мъ и҆ по помыслѡ́мъ твои҄мъ сѹждѹ̀ тебѣ̀, нечи́сте, пресловѹ́те и҆ вели́кїй на разгнѣ́ванїе.
15 И҆ бы́сть сло́во гд҇не ко мнѣ̀ гл҃ѧ:
16 сы́не человѣ́чь, сѐ, а҆́зъ взе́млю ѿ тебє̀ жела҄нїѧ ѻ҆че́съ твои́хъ въ пораже́нїи, не воспла́чи, нижѐ возрыда́й, нижѐ да прїи́дѹтъ тебѣ̀ сле́зы,
17 возстенѝ молчѧ̀: стена́нїе кро́ве, чре́слъ пла́чь є҆́сть: да бѹ́дѹтъ вла́си твоѝ сплете́ни на тебѣ̀, и҆ сапо́зи твоѝ на нога́хъ твои́хъ, и҆ да не ѹ҆тѣ́шишисѧ ѹ҆стна́ми и҆́хъ, и҆ хлѣ́ба мѹже́й да не снѣ́си.
18 И҆ глаго́лахъ къ лю́демъ заѹ́тра, ѩ҆́коже заповѣ́да мѝ, и҆ ѹ҆́мре жена̀ моѧ̀ въ ве́черъ, и҆ сотвори́хъ заѹ́тра, ѩ҆́коже повелѣ́сѧ мѝ.
19 И҆ реко́ша ко мнѣ̀ лю́дїе: не возвѣсти́ши ли на́мъ, что̀ сѹ́ть сїѧ҄, ѩ҆̀же ты̀ твори́ши;
20 И҆ реко́хъ къ ни҄мъ: сло́во гд҇не бы́сть ко мнѣ̀ гл҃ѧ:
21 рцы̀ къ до́мѹ ї҆и҃левѹ, сїѧ҄ гл҃етъ а҆дѡнаї̀ гд҇ь: сѐ, а҆́зъ ѡ҆скверню̀ ст҃а҄ѧ моѧ҄, велича҄нїѧ крѣ́пости ва́шеѧ, жела҄нїѧ ѻ҆че́съ ва́шихъ, и҆ и҆́хже щадѧ́тъ дѹ́ши ва́шѧ: и҆ сы́нове ва́ши и҆ дщє́ри ва́шѧ, ѩ҆̀же ѡ҆ста́висте, мече́мъ падѹ́тъ:
22 и҆ сотворитѐ, ѩ҆́коже а҆́зъ сотвори́хъ: ѿ ѹ҆́стъ и҆́хъ не ѹ҆тѣ́шитесѧ и҆ хлѣ́ба мѹже́й не снѣ́сте,
23 и҆ вла́си ва́ши на глава́хъ ва́шихъ, и҆ сапо́зи ва́ши на нога́хъ ва́шихъ: не бѹ́дете терза́тисѧ, нижѐ пла́кати, и҆ и҆ста́ете въ непра́вдахъ ва́шихъ, и҆ не ѹ҆тѣ́шите кі́йждо бра́та своегѡ̀.
24 И҆ бѹ́детъ ва́мъ ї҆езекі́иль въ чѹ́до: по всемѹ̀ є҆ли҄ка сотвори́хъ, сотворитѐ: є҆гда̀ прїи́дѹтъ сїѧ҄, и҆ ѹ҆разѹмѣ́ете, ѩ҆́кѡ а҆́зъ а҆дѡнаї̀ гд҇ь.
25 И҆ ты̀, сы́не человѣ́чь, не въ де́нь ли то́й, є҆гда̀ возмѹ̀ ѿ ни́хъ крѣ́пость и҆́хъ, вознесе́нїе хвальбы̀ и҆́хъ, жела҄нїѧ ѻ҆́чїю и҆́хъ и҆ возноше́нїе дѹшѝ и҆́хъ, сы́ны и҆́хъ и҆ дщє́ри и҆́хъ:
26 въ то́й де́нь прїи́детъ ѹ҆цѣлѣ́вый къ тебѣ̀ возвѣсти́ти тебѣ̀ во ѹ҆́шы,
27 въ то́й де́нь ѿве́рзѹтсѧ ѹ҆ста̀ твоѧ҄ ко ѹ҆цѣлѣ́вшемѹ, и҆ возглаго́леши и҆ не премолчи́ши ктомѹ̀, и҆ бѹ́деши и҆̀мъ въ чѹ́до: и҆ ѹ҆вѣ́дѧтъ, ѩ҆́кѡ а҆́зъ а҆дѡнаї̀ гд҇ь.
Нашли в тексте ошибку? Выделите её и нажмите:
Ctrl + Enter
Книга пророка Иезекииля, 24 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784