1 И҆ бы́сть въ лѣ́то шесто́е въ шесты́й мц҇ъ, въ пѧ́тый де́нь мц҇а, а҆́зъ сѣдѣ́хъ въ домѹ̀ мое́мъ, и҆ старѣ҄йшины ї҆ѹ҄дины сѣдѧ́хѹ предо мно́ю, и҆ бы́сть на мнѣ̀ рѹка̀ а҆дѡнаї̀ гд҇а.
2 И҆ ви́дѣхъ, и҆ сѐ, подо́бїе мѹ́жа, ѿ чре́слъ є҆гѡ̀ и҆ да́же до ни́зѹ ѻ҆́гнь, ѿ чре́слъ же є҆гѡ̀ въ ве́рхъ є҆гѡ̀ ѩ҆́коже видѣ́нїе зарѝ и҆ ѩ҆́кѡ взо́ръ и҆ле́ктра.
3 И҆ прострѐ подо́бїе рѹкѝ и҆ взѧ̀ мѧ̀ за ве́рхъ главы̀ моеѧ̀, и҆ взѧ̀ мѧ̀ дѹ́хъ средѣ̀ землѝ и҆ средѣ̀ небесѐ и҆ веде́ мѧ во ї҆ер҇ли́мъ въ видѣ́нїи бж҃їи на преддве́рїе вра́тъ внѹ́треннѣйшихъ зрѧ́щихъ на сѣ́веръ, и҆дѣ́же бѣ̀ сто́лпъ и҆ ѡ҆́бразъ ре́вности притѧжава́ющагѡ.
4 И҆ сѐ, тѹ̀ бѧ́ше сла́ва гд҇а бг҃а ї҆и҃лева по видѣ́нїю, є҆́же ви́дѣхъ на по́ли.
5 И҆ речѐ ко мнѣ̀: сы́не человѣ́чь, воззрѝ ѻ҆чи́ма твои́ма на сѣ́веръ. И҆ воззрѣ́хъ ѻ҆чи́ма мои́ма на сѣ́веръ, и҆ сѐ, ѿ сѣ́вера ко вратѡ́мъ зрѧ́щымъ на восто́къ тре́бника, и҆дѣ́же ѡ҆́бразъ рве́нїѧ сегѡ̀ во вхо́дѣ.
6 И҆ речѐ ко мнѣ̀: сы́не человѣ́чь, ви́дѣлъ ли є҆сѝ, что̀ сі́и творѧ́тъ; беззакѡ́нїѧ вєли́ка до́мъ ї҆и҃левъ твори́тъ здѣ̀, є҆́же ѹ҆далѧ́тисѧ ѿ ст҃ы́нь мои́хъ: є҆́же ѡ҆брати́всѧ ѹ҆́зриши бѡ́лшаѧ беззакѡ́нїѧ.
7 И҆ введе́ мѧ ко предвра́тїю двора̀, и҆ ви́дѣхъ, и҆ сѐ, сква́жнѧ є҆ди́на въ стѣнѣ̀.
8 И҆ речѐ ко мнѣ̀: сы́не человѣ́чь, раскопа́й стѣ́нѹ. И҆ раскопа́хъ, и҆ сѐ, две́рь є҆ди́на.
9 И҆ речѐ ко мнѣ̀: вни́ди и҆ ви́ждь беззакѡ́нїѧ ѕла҄ѧ, ѩ҆̀же творѧ́тъ сі́и здѣ̀.
10 И҆ внидо́хъ и҆ ви́дѣхъ, и҆ сѐ, всѧ́кое подо́бїе га́да и҆ скота̀, сѹ́єтнаѧ гнѹшє́нїѧ и҆ всѧ́цыи кѹмі́ры до́мѹ ї҆и҃лева напи́сани бы́ша на стѣнѣ̀ всю́дѹ ѡ҆́колѡ.
11 И҆ се́дмьдесѧтъ мѹже́й ѿ старѣ́йшинъ до́мѹ ї҆и҃лева, и҆ ї҆езо́нїа сы́нъ сафа́новъ посредѣ̀ и҆́хъ стоѧ́ше пред̾ лице́мъ и҆́хъ, и҆ кі́йждо кади́лницѹ свою̀ и҆мѣ́ѧше въ рѹцѣ̀ свое́й, и҆ ды́мъ кади́ла восхожда́ше.
12 И҆ речѐ ко мнѣ̀: ви́дѣлъ ли є҆сѝ, сы́не человѣ́чь, ѩ҆̀же ста́рцы до́мѹ ї҆и҃лева творѧ́тъ здѣ̀, кі́йждо и҆́хъ на ло́жи та́йнѣмъ свое́мъ, занѐ рѣ́ша: не ви́дитъ гд҇ь, ѡ҆ста́вилъ гд҇ь зе́млю.
13 И҆ речѐ ко мнѣ̀: є҆щѐ ѡ҆брати́сѧ, и҆ ѹ҆́зриши беззакѡ́нїѧ бѡ́лшаѧ, ѩ҆̀же сі́и творѧ́тъ.
14 И҆ введе́ мѧ въ преддве́рїе вра́тъ до́мѹ гд҇нѧ зрѧ́щихъ на сѣ́веръ: и҆ сѐ, та́мѡ жєны̀ сѣдѧ́щыѧ пла́чѹщѧсѧ ѡ҆ ѳаммѹ́зѣ.
15 И҆ речѐ ко мнѣ̀: сы́не человѣ́чь, ви́дѣлъ є҆сѝ, и҆ є҆щѐ ѹ҆́зриши ме́рзѡсти и҆́хъ бо́лшыѧ си́хъ.
16 И҆ введе́ мѧ во дво́ръ до́мѹ гд҇нѧ внѹ́треннїй, и҆ въ преддве́рїе хра́ма гд҇нѧ, междѹ̀ [є҆ла́момъ] и҆ междѹ̀ же́ртвенникомъ, ѩ҆́кѡ два́десѧть и҆ пѧ́ть мѹже́й, за҄днѧѧ своѧ҄ да́вшихъ ко хра́мѹ гд҇ню, и҆ ли́ца и҆́хъ прѧ́мѡ къ восто́кѹ: и҆ сі́и покланѧ́ютсѧ на восто́къ со́лнцѹ.
17 И҆ речѐ ко мнѣ̀: ви́дѣлъ є҆сѝ, сы́не человѣ́чь, є҆да̀ ма́лѡ до́мѹ ї҆ѹ́динѹ, є҆́же твори́ти беззакѡ́нїѧ, ѩ҆̀же сотвори́ша здѣ̀; поне́же напо́лниша зе́млю беззако́нїѧ, и҆ ѡ҆брати́шасѧ разгнѣ́вати мѧ̀: и҆ сѐ, сі́и простира́ютъ ло́зѹ а҆́ки рѹга́ющесѧ мнѣ̀:
18 и҆ а҆́зъ сотворю̀ и҆̀мъ съ ѩ҆́ростїю: не пощади́тъ ѻ҆́ко моѐ, и҆ не поми́лѹю: и҆ воззовѹ́тъ во ѹ҆́шы моѝ гла́сомъ вели́кимъ, и҆ не ѹ҆слы́шѹ и҆́хъ.
Нашли в тексте ошибку? Выделите её и нажмите:
Ctrl + Enter
Книга пророка Иезекииля, 8 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784