1 И҆ бы́сть сло́во гд҇не ко мнѣ̀ гл҃ѧ:
2 и҆ ты̀, сы́не человѣ́чь, возмѝ на со́ръ пла́чь,
3 и҆ рече́ши со́рѹ населе́нномѹ на морстѣ́мъ вхо́дѣ, то́ржищѹ люді́й ѿ ѻ҆стровѡ́въ мно́гихъ, сїѧ҄ гл҃етъ а҆дѡнаї̀ гд҇ь со́рѹ: ты̀ ре́клъ є҆сѝ: а҆́зъ са́мъ возложи́хъ на мѧ̀ мою̀ добро́тѹ,
4 въ се́рдцы морстѣ́мъ веелі́мѹ, и҆ сы́нове твоѝ возложи́ша на тѧ̀ добро́тѹ.
5 Ке́дръ ѿ сані́ра и҆стеса́сѧ тебѣ̀, тѡ́нкїѧ до́ски кѷпарї҄сныѧ ѿ лїва́на взѧты̀ бы́ша, є҆́же сотвори́ти тебѣ̀ ѩ҆дри҄ла є҆лѡ́ва:
6 ѿ васані́тїды сотвори́ша ве́сла твоѧ҄: ст҃и҄лища твоѧ҄ состро́иша ѿ слоно́выхъ (косте́й), до́мы древѧ҄ны ѿ ѻ҆стровѡ́въ хеттїи́мскихъ:
7 вѷссо́нъ со и҆спещре́нїемъ ѿ є҆гѵ́пта бы́сть тебѣ̀ посте́лѧ, є҆́же ѡ҆бложи́ти тебѣ̀ сла́вѹ и҆ ѡ҆блещи́ тѧ въ синетѹ̀ и҆ во багрѧни́цѹ ѿ ѻ҆стровѡ́въ є҆лїссѐ, и҆ бы́сть ѻ҆де́жда твоѧ̀.
8 И҆ кнѧ҄зи твоѝ живѹ́щїи во сїдѡ́нѣ и҆ а҆раді́ане бы́ша ве́слєницы твоѝ: премѹ́дрїи твоѝ, со́ръ, и҆̀же бы́ша въ тебѣ̀, сі́и кѡ́рмчїи твоѝ.
9 Старѣ҄йшины вївлі́йстїи и҆ премѹ́дрїи и҆́хъ, и҆̀же бы́ша въ тебѣ̀, ті́и ѹ҆крѣплѧ́хѹ совѣ́тъ тво́й: и҆ всѝ корабли҄ морсті́и и҆ ве́слєницы и҆́хъ бы́ша въ тебѣ̀ ко за́падѡмъ за́падѡвъ.
10 Пе́рсѧне и҆ лѵ́дѧне и҆ лївѵ́ане бѣ́ша въ си́лѣ твое́й, мѹ́жїе до́блїи твоѝ щиты̀ и҆ шле́мы повѣ́сиша въ тебѣ̀, сі́и да́ша сла́вѹ твою̀.
11 Сы́нове а҆раді́йстїи и҆ си́ла твоѧ̀ на забра́лѣхъ твои́хъ ѡ҆́крестъ: но и҆ ми́дѧне во пѵ́ргахъ твои́хъ бы́ша стра́жїе, тѹ́лы своѧ҄ ѡ҆бѣ́сиша на забра́лѣхъ твои́хъ ѡ҆́крестъ: сі́и соверши́ша твою̀ добро́тѹ.
12 Кархидо́нѧне кѹпцы̀ твоѝ, ѿ мно́жества си́лы твоеѧ̀, сребро̀ и҆ зла́то, и҆ мѣ́дь и҆ желѣ́зо, и҆ чи́стое ѻ҆́лово и҆ свине́цъ да́ша кѹ́плю твою̀.
13 Є҆лла́да всѧ̀ и҆ бли́жнїи твоѝ продаѧ́хѹ въ тебѣ̀ дѹ́шы человѣ́чы, и҆ сосѹ́ды мѣ҄дѧны да́ша кѹ́плю твою̀.
14 Ѿ до́мѹ ѳорга́мова ко́ни и҆ ко́нники и҆ мщѧ́та да́ша кѹ́плю твою̀.
15 Сы́нове роді́йстїи кѹпцы̀ твоѝ ѡ҆ ѻ҆стровѡ́въ ѹ҆мно́жиша кѹ́плю твою̀, зѹ́бы слонѡ́вы, и҆ ввѡди́мымъ воздава́лъ є҆сѝ мзды҄ твоѧ҄.
16 Человѣ́ки кѹ́плю твою̀ ѿ мно́жества примѣ́шенца твоегѡ̀, ста҄кти и҆ пестрѡты̀ и҆ синетѹ̀ ѿ ѳарсі́са, и҆ рамо́ѳъ и҆ хорхо́ръ да́ша кѹ́плю твою̀.
17 Ї҆ѹ́да и҆ сы́нове ї҆и҃лєвы, сі́и кѹпцы̀ твоѝ: продаѧ́нїемъ пшени́цы и҆ мѵ́рѡвъ и҆ касі́и, и҆ пе́рвый ме́дъ и҆ є҆ле́й и҆ риті́нѹ да́ша примѣ́шенцѹ твоемѹ̀.
18 Дама́скъ кѹпцы̀ твоѝ ѿ мно́жества всеѧ̀ си́лы твоеѧ̀, вїно̀ ѿ хелвѡ́на, и҆ во́лнѹ блеща́щѹсѧ ѿ мїли́та, и҆ вїно̀ деда́ново и҆ ї҆ѡна́ново и҆ меѡзе́лево въ кѹ́плю твою̀ да́ша.
19 Ѿ а҆ссїи́ла желѣ́зо дѣ́ланое и҆ коле́са въ примѣ́сницѣхъ твои́хъ сѹ́ть.
20 Деда́нъ кѹпцы̀ твоѝ со скѡты̀ и҆збра́нными въ колєсни́цы.
21 А҆раві́а и҆ всѝ кнѧ҄зи кида́рстїи, сі́и кѹпцы̀ рѹко́ю твое́ю, велблю́ды и҆ ѻ҆вны̀ и҆ а҆́гнцы въ тебѣ̀ продадѧ́тъ, и҆́миже кѹ́плю творѧ́тъ.
22 Кѹпцы̀ са́вы и҆ раммы̀, ті́и кѹпцы̀ твоѝ съ пе́рвыми сла́достьми и҆ со ка́менїемъ драги́мъ, и҆ зла́то да́ша кѹ́плю тебѣ̀.
23 Харра́нъ, ханаа̀ и҆ деда́нъ, сі́и кѹпцы̀ твоѝ: сава̀, а҆ссѹ́ръ и҆ харма́нъ кѹпцы̀ твоѝ,
24 приносѧ́ще кѹ́плю синетѹ̀ и҆ червлени́цѹ, и҆ и҆спещрє́ннаѧ и҆ сокрѡ́вища и҆збра҄ннаѧ свѧ҄зана ѹ҆́жами, кѷпарї҄снаѧ.
25 Корабли҄, въ тѣ́хъ кѹ́плѧ твоѧ̀, (корабли҄) кархидо́нстїи кѹпцы̀ твоѝ, во мно́жествѣ смѣ҄сникъ твои́хъ, и҆ насы́тилсѧ є҆сѝ, и҆ ѡ҆тѧгча́лъ ѕѣлѡ̀ въ сердца́хъ морски́хъ.
26 Въ водѣ̀ мно́зѣ привожда́хѹ тѧ̀ ве́слєницы твоѝ: вѣ́тръ ю҆́жный сокрѹши́ тѧ въ се́рдцы морстѣ́мъ.
27 Бы́ша си҄лы твоѧ҄ и҆ мзда̀ твоѧ̀ ѿ смѣ҄сникъ твои́хъ, и҆ ве́слєницы твоѝ и҆ кѡ́рмчїи твоѝ, и҆ совѣ҄тницы твоѝ и҆ смѣ҄сницы ѿ смѣ́сникѡвъ твои́хъ, и҆ всѝ мѹ́жїе твоѝ до́блїи въ тебѣ̀ и҆ ве́сь со́нмъ тво́й падѹ́тъ средѣ̀ тебє̀ въ се́рдцы морстѣ́мъ, въ де́нь паде́нїѧ твоегѡ̀.
28 Ѿ гла́са во́плѧ твоегѡ̀ кѡ́рмчїи твоѝ стра́хомъ ѹ҆боѧ́тсѧ.
29 И҆ сни́дѹтъ съ корабле́й свои́хъ всѝ ве́слєницы твоѝ, и҆ вса́дницы и҆ ловцы̀ морсті́и на землѝ ста́нѹтъ:
30 и҆ воскли́кнѹтъ на тѧ̀ гла́сомъ свои́мъ, и҆ воскрича́тъ го́рцѣ, и҆ возложа́тъ зе́млю на главы҄ своѧ҄, и҆ пра́хъ посте́лютъ:
31 и҆ ѡ҆плѣши́вѣютъ над̾ тобо́ю плѣшьмѝ, и҆ ѡ҆блекѹ́тсѧ во вре́тище, и҆ воспла́чѹтсѧ ѡ҆ тебѣ̀ въ го́рести дѹшѝ, и҆ пла́чемъ го́рькимъ ѹ҆жа́снѹтсѧ:
32 и҆ во́змѹтъ ѡ҆ тебѣ̀ сы́нове и҆́хъ пла́чь, возрыда́ютъ пла́канїемъ ѡ҆ тебѣ̀: кто̀ ѩ҆́коже тѵ́ръ ѹ҆мо́лкнѹвый средѣ̀ мо́рѧ; коли́кѹ ѡ҆брѣ́лъ є҆сѝ мздѹ̀ ѿ мо́рѧ;
33 Напо́лнилъ є҆сѝ страны҄ ѿ мно́жества твоегѡ̀ и҆ ѿ смѣ҄сникъ твои́хъ ѡ҆богати́лъ є҆сѝ всѧ҄ цари҄ зємны́ѧ.
34 Нн҃ѣ же сокрѹши́лсѧ є҆сѝ въ мо́ри, во глѹбина́хъ во́дныхъ смѣ҄сницы твоѝ, и҆ ве́сь со́нмъ тво́й средѣ̀ тебє̀ падо́ша, и҆ всѝ ве́слєницы твоѝ.
35 Вси́ же живѹ́щїи во ѻ҆́стровѣхъ ѹ҆ны́ли по тебѣ̀, и҆ ца́рїе и҆́хъ ѹ҆́жасомъ ѹ҆жасо́шасѧ, и҆ прослези́сѧ лицѐ и҆́хъ.
36 Кѹпцы̀ ѿ ѩ҆зы҄къ позви́ждѹтъ ѡ҆ тебѣ̀, въ поги́бель бы́лъ є҆сѝ, и҆ ктомѹ̀ не бѹ́деши въ вѣ́къ, гл҃етъ гд҇ь бг҃ъ.
Нашли в тексте ошибку? Выделите её и нажмите:
Ctrl + Enter
Книга пророка Иезекииля, 27 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784