Библия » Елизаветинская Елизаветинская Библия

Иезекииль 9 Иезекииль 9 глава

1 И҆ возопѝ во ѹ҆́шы моѝ гла́сомъ вели́кимъ, гл҃ѧ: прибли́жисѧ ѿмще́нїе гра́да: и҆ кі́йждо и҆мѣ́ѧше сосѹ́ды и҆стребле́нїѧ въ рѹцѣ̀ свое́й.
2 И҆ сѐ, ше́сть мѹже́й и҆до́ша ѿ пѹтѝ вра́тъ высо́кихъ зрѧ́щихъ на сѣ́веръ, и҆ коемѹ́ждо сѣки́ра (погѹбле́нїѧ) въ рѹцѣ̀ є҆гѡ̀: и҆ мѹ́жъ є҆ди́нъ посредѣ̀ и҆́хъ ѡ҆блече́нъ въ поди́ръ, и҆ по́ѧсъ ѿ сапфі́ра ѡ҆ чре́слѣхъ є҆гѡ̀: и҆ внидо́ша и҆ ста́ша бли́з̾ же́ртвенника мѣ́дѧнагѡ.
3 И҆ сла́ва бг҃а ї҆и҃лева взы́де ѿ херѹві́мѡвъ сѹ́щаѧ на ни́хъ въ непокрове́нное до́мѹ: и҆ призва̀ мѹ́жа ѡ҆болче́на въ поди́ръ, и҆́же и҆мѣ́ѧше на чре́слѣхъ свои́хъ по́ѧсъ.
4 И҆ речѐ гд҇ь къ немѹ̀: пройдѝ средѣ̀ гра́да ї҆ер҇ли́ма и҆ да́ждь зна́мєнїѧ на ли́ца мѹже́й стенѧ́щихъ и҆ болѣ́знѹющихъ ѡ҆ всѣ́хъ беззако́нїихъ быва́ющихъ средѣ̀ и҆́хъ.
5 И҆ си҄мъ речѐ, слы́шащѹ мнѣ̀: и҆ди́те во гра́дъ в̾слѣ́дъ є҆гѡ̀, и҆зсѣцы́те и҆ не пощади́те ѻ҆чи́ма ва́шима и҆ не поми́лѹйте:
6 ста́рца и҆ ю҆́ношѹ и҆ дѣ́вѹ, и҆ младе́нцы и҆ жєны̀ и҆збі́йте въ потребле́нїе: а҆ ко всѣ҄мъ, на ни́хже є҆́сть зна́менїе, не прикаса́йтесѧ: ѿ ѡ҆свѧще́нныхъ мои́хъ начни́те. И҆ нача́ша ѿ мѹже́й ста́рыхъ, и҆̀же бѣ́ша внѹ́трь въ домѹ̀.
7 И҆ речѐ къ ни҄мъ: ѡ҆скверни́те до́мъ, и҆ напо́лните пѹти҄ мертвецє́въ и҆сходѧ́ще, и҆ и҆зсѣцы́те (сѹ́щихъ во гра́дѣ).
8 И҆ бы́сть внегда̀ сѣча́хѹ и҆̀хъ, ѡ҆ста́хъ а҆́зъ и҆ падо́хъ ни́цъ, и҆ возопи́хъ и҆ рѣ́хъ: го́ре, (го́ре,) ѽ, лю́тѣ мнѣ̀, а҆дѡнаю̀ гд҇и! є҆да̀ потреблѧ́еши ты̀ ѡ҆ста́нки ї҆и҃лєвы, є҆гда̀ разлива́еши ѩ҆́рость твою̀ на ї҆ер҇ли́мъ;
9 И҆ речѐ ко мнѣ̀: непра́вда до́мѹ ї҆и҃лева и҆ ї҆ѹ́дина возвели́чисѧ ѕѣлѡ̀ ѕѣлѡ̀, ѩ҆́кѡ напо́лнисѧ землѧ̀ люді́й мно́гихъ, и҆ гра́дъ напо́лнисѧ непра́вдъ и҆ нечисто́тъ, ѩ҆́кѡ рѣ́ша: ѡ҆ста́вилъ є҆́сть гд҇ь зе́млю и҆ не ви́дитъ гд҇ь.
10 И҆ а҆́зъ є҆́смь, и҆ не пощади́тъ ѻ҆́ко моѐ, ни поми́лѹю, пѹти҄ и҆́хъ на главы҄ и҆́хъ да́хъ.
11 И҆ сѐ, мѹ́жъ, ѡ҆болче́ный въ поди́ръ и҆ препоѧ́санъ по́ѧсомъ ѡ҆ чре́слѣхъ свои́хъ, ѿвѣщава́ше, глаго́лѧ: сотвори́хъ, ѩ҆́коже заповѣ́далъ мѝ є҆сѝ.
Нашли в тексте ошибку? Выделите её и нажмите: Ctrl + Enter

Книга пророка Иезекииля, 9 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.