Библия » Елизаветинская Елизаветинская Библия

Иезекииль 45 Иезекииль 45 глава

1 И҆ є҆гда̀ раздѣлѧ́ти ва́мъ зе́млю въ наслѣ́дїе, ѿлѹчи́те нача́токъ гд҇еви, ст҃о ѿ землѝ, въ долготѹ̀ двѹ́десѧти и҆ пѧтѝ ты́сѧщъ, а҆ въ широтѹ̀ десѧтѝ ты́сѧщъ, ст҃о да бѹ́детъ во всѣ́хъ предѣ́лѣхъ и҆́хъ ѡ҆́крестъ.
2 И҆ да бѹ́дѹтъ ѿ тогѡ̀ на ст҃о́е пѧ́ть сѡ́тъ, по пѧтѝ сѡ́тъ четвероѹго́лнѡ ѡ҆́крестъ, разстоѧ́нїе же и҆́хъ пѧтьдесѧ́тъ лакте́й ѡ҆́крестъ.
3 И҆ ѿ сегѡ̀ размѣре́нїѧ да размѣ́риши въ долготѹ̀ два́десѧть пѧ́ть ты́сѧщъ, а҆ въ широтѹ̀ де́сѧть ты́сѧщъ: и҆ въ то́мъ да бѹ́детъ ѡ҆свѧще́нїе, ст҃а҄ѧ ст҃ы́хъ.
4 Ст҃о ѿ землѝ да бѹ́детъ жерцє́мъ слѹжа́щымъ во ст҃ѣ́мъ и҆ да бѹ́детъ пристѹпа́ющымъ слѹжи́ти гд҇еви, и҆ бѹ́детъ и҆̀мъ мѣ́сто на до́мы ѿлѹчє́нны ѡ҆свѧще́нїю и҆́хъ,
5 два́десѧть пѧ́ть ты́сѧщъ въ долготѹ̀ и҆ два́десѧть {Є҆вр.: де́сѧть.} ты́сѧщъ въ широтѹ̀ да бѹ́детъ, леѵі́тѡмъ слѹжа́щымъ хра́мѹ, тѣ҄мъ во ѡ҆держа́нїе гра́ды ко ѡ҆бита́нїю.
6 И҆ ѡ҆держа́нїе гра́да да да́си въ широтѹ̀ пѧ́ть ты́сѧщъ, а҆ въ долготѹ̀ два́десѧть пѧ́ть ты́сѧщъ, ѩ҆́коже нача́токъ ст҃ы́хъ всемѹ̀ до́мѹ ї҆и҃левѹ да бѹ́детъ
7 и҆ старѣ́йшинѣ ѿ тогѡ̀: и҆ ѿ сегѡ̀ въ нача́тки ст҃ы́хъ, во ѡ҆держа́нїе гра́да по лицѹ̀ нача́ткѡвъ ст҃ы́нь и҆ по лицѹ̀ ѡ҆держа́нїѧ гра́да, ѩ҆̀же къ мо́рю, и҆ ѿ сѹ́щихъ къ мо́рю, ѩ҆̀же на восто́къ: долгота́ же ѩ҆́кѡ є҆ди́на ча́сть ѿ предѣ҄лъ и҆̀же къ мо́рю, и҆ долгота̀ ко предѣ́лѡмъ и҆̀же на восто́къ землѝ.
8 И҆ бѹ́детъ є҆мѹ̀ во ѡ҆держа́нїе во ї҆и҃ли, и҆ да не наси́лѹютъ ктомѹ̀ старѣ҄йшины ї҆и҃лєвы лю́демъ мои҄мъ, и҆ зе́млю да наслѣ́дѧтъ до́мъ ї҆и҃левъ по племенѡ́мъ свои҄мъ.
9 Сїѧ҄ гл҃етъ гд҇ь бг҃ъ: да довлѣ́ютъ ва́мъ, старѣ҄йшины ї҆и҃лєвы, непра́вдѹ и҆ ѡ҆ѕлобле́нїе ѿве́ржите, сѹ́дъ же и҆ пра́вдѹ сотвори́те: и҆зыми́те наси́лїе ѿ люді́й мои́хъ, гл҃етъ гд҇ь бг҃ъ.
10 Вѣ́съ пра́ведный и҆ мѣ́ра пра́ведна и҆ хі́нїѯъ пра́веденъ да бѹ́дѹтъ ва́мъ въ мѣ҄ры:
11 и҆ хі́нїѯъ та́кожде є҆ди́нъ да бѹ́детъ ва́мъ, є҆́же прїима́ти, десѧ́таѧ ча́сть гомо́ра хі́нїѯъ, и҆ десѧ́таѧ ча́сть гомо́ра є҆́фї, мѣ́ра къ гомо́рѹ да бѹ́детъ ра́вна.
12 И҆ вѣ́съ, два́десѧть ѻ҆́воли сі́кль, и҆ два́десѧть пѧ́ть сі́клей, и҆ два́десѧть сі́клей, и҆ пѧтьна́десѧть сі́клей мна́съ бѹ́детъ ва́мъ.
13 И҆ се́й нача́токъ, є҆го́же ѿлѹчитѐ, шестѹ́ю ча́сть мѣ́ры ѿ гомо́ра пшени́цы и҆ шестѹ́ю ча́сть є҆́фї ѿ ко́ра ѩ҆чме́нѧ.
14 За́повѣдь же ѡ҆ є҆ле́и, мѣ́рѹ є҆ле́а ѿ десѧтѝ мѣ́ръ, поне́же де́сѧть мѣ́ръ сѹ́ть гомо́ръ.
15 И҆ ѻ҆вча̀ є҆ди́но ѿ десѧтѝ ѻ҆ве́цъ ѹ҆ча́стїе ѿ всѣ́хъ ѻ҆те́чествъ ї҆и҃левыхъ, на жє́ртвы и҆ на всесожжє́нїѧ и҆ на спасе́нїе, є҆́же ѹ҆моли́ти ѡ҆ ва́съ, гл҃етъ гд҇ь бг҃ъ.
16 Вси́ же лю́дїе землѝ да дадѧ́тъ се́й нача́токъ старѣ́йшинѣ ї҆и҃левѹ,
17 и҆ старѣ́йшиною да быва́ютъ всесожжє́нїѧ: и҆ жє́ртвы и҆ возлїѧ҄нїѧ бѹ́дѹтъ въ пра́здники и҆ въ новом҇чїѧ, и҆ въ сѹббѡ҄ты и҆ во всѧ҄ пра́здники до́мѹ ї҆и҃лева: то́й сотвори́тъ ѩ҆̀же за грѣхѝ и҆ же́ртвѹ, и҆ всесожжє́нїѧ и҆ ѩ҆̀же спасе́нїѧ, є҆́же ѹ҆молѧ́ти ѡ҆ до́мѣ ї҆и҃левѣ.
18 Та́кѡ гл҃етъ гд҇ь бг҃ъ: въ пе́рвый мц҇ъ, во є҆ди́нъ де́нь мц҇а, да во́змете телца̀ ѿ говѧ́дъ непоро́чна, є҆́же ѡ҆чи́стити ст҃о́е:
19 и҆ да во́зметъ жре́цъ ѿ кро́ве ѡ҆чище́нїѧ и҆ да возлїе́тъ на пра́ги хра́ма и҆ на четы́ри ѹ҆́глы ст҃и́лища, и҆ на же́ртвенникъ и҆ на пра́ги вра́тъ двора̀ внѹ́треннѧгѡ.
20 И҆ си́це да сотвори́ши въ седмы́й мц҇ъ: во є҆ди́нъ (де́нь) мц҇а во́змеши ѿ коегѡ́ждо невѣ́дѹщагѡ и҆ ѿ младе́нца, и҆ ѡ҆чи́стите хра́мъ.
21 Въ пе́рвый мц҇ъ, четвертагѡна́десѧть днѐ мц҇а, да бѹ́детъ ва́мъ па́сха пра́здникъ: се́дмь дні́й да ѩ҆́сте ѡ҆прѣсно́ки.
22 И҆ сотвори́тъ старѣ́йшина въ то́й де́нь за сѧ̀ и҆ за до́мъ и҆ за всѧ҄ лю́ди землѝ, телца̀ за грѣ́хъ:
23 въ се́дмь же дні́й пра́здника да сотвори́тъ всесожжє́нїѧ гд҇еви се́дмь телцє́въ и҆ се́дмь ѻ҆внѡ́въ непоро́чныхъ по всѧ́къ де́нь седмѝ дні́й: и҆ за грѣ́хъ ко́злище ѿ ко́зъ на всѧ́къ де́нь, и҆ же́ртвѹ,
24 и҆ ѡ҆прѣсно́ки телцѹ̀ и҆ ѡ҆прѣсно́ки ѻ҆внѹ̀ да сотвори́ши, и҆ є҆ле́а їнъ ѡ҆прѣсно́кѹ.
25 Въ седмы́й же мц҇ъ, въ пѧтыйна́десѧть де́нь мц҇а, въ пра́здницѣ сотвори́ши по томѹ́жде, се́дмь дні́й, ѩ҆́коже и҆ за грѣ́хъ, и҆ ѩ҆́коже всесожжє́нїѧ, и҆ ѩ҆́коже да́ръ, и҆ ѩ҆́коже ма́сло древѧ́ное.
Нашли в тексте ошибку? Выделите её и нажмите: Ctrl + Enter

Книга пророка Иезекииля, 45 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.