Псальмаў 1 псалом

Кніга Псальмаў
Пераклад Чарняўскага 2017 → Пераклад Л. Дзекуць-Малея

Шчасны чалавек, які не ідзе за парадай бязбожных, і на дарогу грэшнікаў не ступае, і не сядзіць у зборышчы насмешнікаў,

Шчасьлівы чалавек, што ня ходзе на раду бязбожных, ня ўзыходзіць на шлях грэшнікаў і паміж насьмешнікаў не засядае,

але ў законе Божым воля яго, і пра закон Яго разважае ён днём і ноччу.

але любасьць знаходзе ў Законе Госпада і аб Законе Ягоным разважае ўдзень і ўначы.

І будзе ён, як дрэва паблізу цячэння вод, якое дае плод у свой час і лістота якога не вяне; і ўсё, што ён робіць, будзе ўдавацца яму.

Той ёсьць быццам пасаджанае ля патоку воднага дзерава, што плод дае ў сваім часе, а лісьце яго ня вяне, і ўсё, што ён робіць, удаецца яму.

Не гэтак ліхадзеі, не гэтак! Бо яны — як пыл, што вецер разносіць.

Ня гэтак бязбожныя: яны да паловы падобны, што вецер разносе.

Таму і не ўстаяць бязбожныя на судзе, ані грэшнікі на сходзе справядлівых,

Дык ня ўстояць бязбожныя на судзе, ані грэшнікі ў зграмаджэньні справядлівых,

бо Госпад рупіцца пра шлях справядлівых, а дарога бязбожных загіне.

бо Госпад ведае шлях пабожных, але дарога бязбожнікаў счэзьне.

2007–2024. Зроблена з любоўю для тых, што любяць і шукаюць Бога. Калі ў вас ёсць пытанні ці пажаданні, то пішыце нам: bible-man@mail.ru.

Наверх