1 Въ лѣ́то тре́тїе ца́рства валтаса́ра царѧ̀ видѣ́нїе ѩ҆ви́сѧ мнѣ̀, а҆́зъ данїи́лъ, по ѩ҆́вльшемсѧ мнѣ̀ пре́жде.
2 И҆ бѣ́хъ въ сѹ́сѣхъ гра́дѣ, и҆́же є҆́сть во странѣ̀ є҆ла́мстѣй, и҆ ви́дѣхъ въ видѣ́нїи, и҆ бѣ́хъ на ѹ҆ва́лѣ,
3 и҆ воздвиго́хъ ѻ҆́чи моѝ и҆ ви́дѣхъ: и҆ сѐ, ѻ҆ве́нъ є҆ди́нъ стоѧ̀ пред̾ ѹ҆ва́ломъ є҆мѹ́же ро́зи, ро́зи же высо́цы, є҆ди́нъ же вы́шше дрѹга́гѡ, и҆ вы́шшїй восхожда́ше послѣдѝ.
4 И҆ ви́дѣхъ ѻ҆вна̀ бодѹ́ща на за́падъ и҆ на сѣ́веръ, и҆ на ю҆́гъ и҆ на восто́къ: и҆ всѝ ѕвѣ́рїе не ста́нѹтъ пред̾ ни́мъ, и҆ не бѣ̀ и҆збавлѧ́юща и҆з̾ рѹкѝ є҆гѡ̀, и҆ сотворѝ по во́ли свое́й, и҆ возвели́чисѧ.
5 А҆́зъ же бѣ́хъ размышлѧ́ѧ, и҆ сѐ козе́лъ ѿ ко́зъ и҆дѧ́ше ѿ лі́ва на лицѐ всеѧ̀ землѝ и҆ не бѣ̀ прикаса́ѧсѧ землѝ, и҆ козлѹ̀ томѹ̀ ро́гъ ви́димь междѹ̀ ѻ҆чи́ма є҆гѡ̀:
6 и҆ прїи́де до ѻ҆вна̀ и҆мѹ́щагѡ рога̀ є҆го́же ви́дѣхъ стоѧ́ща пред̾ ѹ҆ва́ломъ, и҆ течѐ къ немѹ̀ въ си́лѣ крѣ́пости своеѧ̀.
7 И҆ ви́дѣхъ є҆го̀ доходѧ́ща до ѻ҆вна̀, и҆ разсвирѣ́пѣ на него̀, и҆ поразѝ ѻ҆вна̀, и҆ сокрѹшѝ ѻ҆́ба рѡ́га є҆гѡ̀: и҆ не бѣ̀ си́лы ѻ҆внѹ̀, є҆́же ста́ти проти́вѹ є҆мѹ̀: и҆ пове́рже є҆го̀ на зе́млю и҆ попра̀ є҆го̀, и҆ не бѣ̀ и҆збавлѧ́ѧй ѻ҆вна̀ ѿ рѹкѝ є҆гѡ̀.
8 И҆ козе́лъ ко́зїй возвели́чисѧ до ѕѣла̀: и҆ внегда̀ ѹ҆крѣпи́сѧ, сокрѹши́сѧ ро́гъ є҆гѡ̀ вели́кїй, и҆ взыдо́ша дрѹзі́и четы́ри ро́зи под̾ ни́мъ, по четы́ремъ вѣ́трѡмъ небє́снымъ:
9 и҆ ѿ є҆ди́нагѡ и҆́хъ взы́де ро́гъ є҆ди́нъ крѣ́покъ, и҆ возвели́чисѧ вельмѝ къ ю҆́гѹ и҆ къ восто́кѹ и҆ къ си́лѣ,
10 и҆ возвели́чисѧ да́же до си́лы нб҇ныѧ: и҆ сотворѝ па́сти на зе́млю ѿ си́лы нб҇ныѧ и҆ ѿ ѕвѣ́здъ, и҆ попра̀ ѧ҆̀:
11 и҆ до́ндеже а҆рхїстрати́гъ и҆зба́витъ плѣ́нники, и҆ є҆гѡ̀ ра́ди же́ртва смѧте́сѧ, и҆ благопоспѣши́сѧ є҆мѹ̀, и҆ ст҃о́е ѡ҆пѹстѣ́етъ:
12 и҆ даде́сѧ на же́ртвѹ грѣ́хъ, и҆ пове́ржесѧ пра́вда на зе́млю: и҆ сотворѝ, и҆ благопоспѣши́сѧ.
13 И҆ слы́шахъ є҆ди́нагѡ ст҃а́гѡ глаго́люща. И҆ речѐ є҆ди́нъ ст҃ы́й дрѹго́мѹ нѣ́коемѹ глаго́лющемѹ: доко́лѣ видѣ́нїе ста́нетъ, же́ртва ѿѧ́таѧ, и҆ грѣ́хъ ѡ҆пѹстѣ́нїѧ да́нный, и҆ ст҃о́е и҆ си́ла попере́тсѧ;
14 И҆ речѐ є҆мѹ̀: да́же до ве́чера и҆ ѹ҆́тра дні́й двѣ̀ ты́сѧщы и҆ три́ста, и҆ ѡ҆чи́ститсѧ ст҃о́е.
15 И҆ бы́сть, є҆гда̀ ви́дѣхъ а҆́зъ данїи́лъ видѣ́нїе и҆ взыска́хъ вѣ́дѣнїѧ, и҆ сѐ, ста̀ предо мно́ю а҆́ки ѡ҆́бразъ мѹ́жескъ,
16 и҆ слы́шахъ гла́съ мѹ́жескъ средѣ̀ ѹ҆ва́ла, и҆ призва̀ и҆ речѐ: гаврїи́ле, скажѝ видѣ́нїе ѻ҆́номѹ.
17 И҆ прїи́де и҆ ста̀ бли́з̾ стоѧ́нїѧ моегѡ̀: и҆ є҆гда̀ прїи́де ѹ҆жасо́хсѧ и҆ падо́хъ на лицѐ моѐ. И҆ речѐ ко мнѣ̀: разѹмѣ́й, сы́не человѣ́чь, є҆ще́ бо до сконча́нїѧ вре́мене видѣ́нїе.
18 И҆ є҆гда̀ глаго́лаше со мно́ю, падо́хъ ни́цъ на землѝ, и҆ прикоснѹ́сѧ мнѣ̀, и҆ поста́ви мѧ̀ на но́ги моѧ҄, и҆ речѐ:
19 сѐ, а҆́зъ возвѣща́ю тебѣ̀ бѹ҄дѹщаѧ на послѣ́докъ гнѣ́ва (сынѡ́мъ люді́й твои́хъ): є҆ще́ бо до конца̀ вре́мене видѣ́нїе.
20 Ѻ҆ве́нъ, є҆го́же ви́дѣлъ є҆сѝ и҆мѹ́ща рога̀, ца́рь ми́дскїй и҆ пе́рсскїй:
21 а҆ козе́лъ ко́зїй ца́рь є҆́ллинскїй є҆́сть: ро́гъ же вели́кїй, и҆́же междѹ̀ ѻ҆чи́ма є҆гѡ̀, то́й є҆́сть ца́рь пе́рвый:
22 семѹ́ же сокрѹши́вшѹсѧ воста́ша четы́ри ро́зи под̾ ни́мъ: четы́ри ца́рїе воста́нѹтъ ѿ ѩ҆зы́ка є҆гѡ̀, но не въ крѣ́пости є҆гѡ̀,
23 и҆ на послѣ́докъ ца́рства и҆́хъ, и҆сполнѧ́ющымсѧ грѣхѡ́мъ и҆́хъ, воста́нетъ ца́рь безсра́менъ лице́мъ и҆ разѹмѣ́ѧ гада҄нїѧ,
24 и҆ держа́вна крѣ́пость є҆гѡ̀, не въ крѣ́пости же свое́й, и҆ чѹде́снѡ растли́тъ и҆ ѹ҆пра́витъ и҆ сотвори́тъ, и҆ разсы́плетъ крѣ҄пкїѧ и҆ лю́ди ст҃ы,
25 и҆ ѩ҆ре́мъ вери́гъ свои́хъ и҆спра́витъ: ле́сть въ рѹцѣ̀ є҆гѡ̀, и҆ въ се́рдцы свое́мъ возвели́читсѧ, и҆ ле́стїю разсы́плетъ мно́гихъ, и҆ на па́гѹбѹ мнѡ́гимъ возста́нетъ, и҆ ѩ҆́кѡ ѩ҆́ица рѹко́ю сокрѹши́тъ.
26 И҆ видѣ́нїе ве́чера и҆ ѹ҆́тра рѣче́ннагѡ и҆́стинно є҆́сть: ты́ же назна́менай видѣ́нїе, ѩ҆́кѡ на дни҄ мнѡ́ги.
27 А҆́зъ же данїи́лъ ѹ҆спо́хъ и҆ и҆знемога́хъ на дни҄ (мнѡ́ги), и҆ воста́хъ и҆ творѧ́хъ дѣла̀ царє́ва, и҆ почѹди́хсѧ видѣ́нїю, и҆ не бѧ́ше разѹмѣва́ющагѡ.
Нашли в тексте ошибку? Выделите её и нажмите:
Ctrl + Enter
Книга пророка Даниила, 8 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784