Библия » Елизаветинская Библия

Послание к Евреям 5 глава

1 Всѧ́къ бо первосвѧще́нникъ, ѿ человѣ҄къ прїе́млемь, за человѣ́ки поставлѧ́етсѧ на слѹ҄жбы ѩ҆̀же къ бг҃ѹ, да прино́ситъ да́ры же и҆ жє́ртвы ѡ҆ грѣсѣ́хъ,
2 спострада́ти могі́й невѣ́жствѹющымъ и҆ заблѹжда́ющымъ, поне́же и҆ то́й не́мощїю ѡ҆бложе́нъ є҆́сть:
3 и҆ сегѡ̀ ра́ди до́лженъ є҆́сть ѩ҆́коже ѡ҆ лю́дехъ, та́кожде и҆ ѡ҆ себѣ̀ приноси́ти за грѣхѝ.
4 (За҄.) И҆ никто́же са́мъ себѣ̀ прїе́млетъ че́сть, но зва́нный ѿ бг҃а, ѩ҆́коже и҆ а҆арѡ́нъ.
5 Та́кѡ и҆ хр҇то́съ не себѐ просла́ви бы́ти первосщ҃е́нника, но гл҃авый къ немѹ̀: сн҃ъ мо́й є҆сѝ ты̀, а҆́зъ дне́сь роди́хъ тѧ̀:
6 ѩ҆́коже и҆ и҆́ндѣ гл҃етъ: ты̀ є҆сѝ сщ҃е́нникъ во вѣ́къ по чи́нѹ мелхїседе́ковѹ.
7 И҆́же во дне́хъ пл҃ти своеѧ̀ молє́нїѧ же и҆ мл҃твы къ могѹ́щемѹ сп҇тѝ є҆го̀ ѿ сме́рти съ во́племъ крѣ́пкимъ и҆ со слеза́ми прине́съ, и҆ ѹ҆слы́шанъ бы́въ ѿ бл҃гоговѣ́инства,
8 а҆́ще и҆ сн҃ъ бѧ́ше, ѻ҆ба́че навы́че ѿ си́хъ, ѩ҆̀же пострада̀, послѹша́нїю,
9 и҆ соверши́всѧ бы́сть всѣ҄мъ послѹ́шающымъ є҆гѡ̀ вино́венъ сп҇нїѧ вѣ́чнагѡ,
10 нарѣче́нъ ѿ бг҃а первосщ҃е́нникъ по чи́нѹ мелхїседе́ковѹ.
11 (За҄ 312.) Ѡ҆ не́мже мно́гое на́мъ сло́во и҆ неѹдо́бь сказа́емое глаго́лати, поне́же не́мощни бы́сте слѹ҄хи.
12 И҆́бо, до́лжни сѹ́ще бы́ти ѹ҆чи́телїе лѣ́тъ ра́ди, па́ки тре́бѹете ѹ҆чи́тисѧ, ка҄ѧ пи́смена нача́ла слове́съ бж҃їихъ: и҆ бы́сте тре́бѹюще млека̀, а҆ не крѣ́пкїѧ пи́щи.
13 Всѧ́къ бо причаща́ѧйсѧ млека̀ неискѹ́сенъ сло́ва пра́вды, младе́нецъ бо є҆́сть:
14 соверше́нныхъ же є҆́сть тве́рдаѧ пи́ща, и҆мѹ́щихъ чѹ҄вствїѧ ѡ҆бѹчє́на до́лгимъ ѹ҆че́нїемъ въ разсѹжде́нїе добра́ же и҆ ѕла̀.
Нашли в тексте ошибку? Выделите её и нажмите: Ctrl + Enter

Послание к Евреям святого апостола Павла, 5 глава

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.


2007–2021, сделано с любовью для любящих и ищущих Бога. Если у вас есть вопросы или пожелания, то пишите: bible-man@mail.ru.