1 И҆ припа́дъ ї҆ѡ́сифъ на лицѐ ѻ҆тца̀ своегѡ̀, пла́касѧ (го́рькѡ) ѡ҆ не́мъ и҆ ѡ҆блобыза̀ є҆го̀:
2 и҆ повелѣ̀ ї҆ѡ́сифъ рабѡ́мъ свои҄мъ погреба́телємъ погребстѝ ѻ҆тца̀ своего̀. И҆ погребо́ша погреба́телїе ї҆и҃лѧ.
3 И҆ и҆спо́лнишасѧ є҆мѹ̀ четы́редесѧть дні́й: та́кѡ бо и҆счислѧ́ютсѧ дні́е погребе́нїѧ: и҆ пла́касѧ є҆гѡ̀ є҆гѵ́петъ се́дмьдесѧтъ дні́й.
4 Є҆гда́ же преидо́ша дні́е пла́ча, глаго́ла ї҆ѡ́сифъ ко вельмо́жамъ фараѡ́нѡвымъ, глаго́лѧ: а҆́ще ѡ҆брѣто́хъ благода́ть пред̾ ва́ми, рцы́те ѡ҆ мнѣ̀ во ѹ҆́шы фараѡ́нѹ, глаго́люще:
5 ѻ҆те́цъ мо́й заклѧ́ мѧ пре́жде сконча́нїѧ (своегѡ̀), глаго́лѧ: во гро́бѣ, є҆го́же и҆скопа́хъ себѣ̀ въ землѝ ханаа́ни, та́мѡ мѧ̀ погребѝ: нн҃ѣ ѹ҆̀бо возше́дъ погребѹ̀ ѻ҆тца̀ моего̀ и҆ возвращѹ́сѧ. И҆ реко́ша фараѡ́нѹ по словесѝ ї҆ѡ́сифовѹ.
6 И҆ речѐ фараѡ́нъ ко ї҆ѡ́сифѹ: взы́ди, погребѝ ѻ҆тца̀ твоего̀, ѩ҆́коже заклѧ́ тѧ.
7 И҆ взы́де ї҆ѡ́сифъ погребстѝ ѻ҆тца̀ своего̀. И҆ совзыдо́ша съ ни́мъ всѝ рабѝ фараѡ҄ни и҆ старѣ҄йшины до́мѹ є҆гѡ̀, и҆ всѝ старѣ҄йшины землѝ є҆гѵ́петскїѧ,
8 и҆ ве́сь до́мъ ї҆ѡ́сифовъ и҆ бра́тїѧ є҆гѡ̀, и҆ ве́сь до́мъ ѻ҆тца̀ є҆гѡ̀ и҆ срѡ́дницы є҆гѡ̀: ѻ҆́вцы же и҆ волы̀ ѡ҆ста́виша въ землѝ гесе́мъ.
9 И҆ совзыдо́ша съ ни́мъ и҆ колєсни́цы и҆ кѡ́нницы, и҆ бы́сть по́лкъ вели́къ ѕѣлѡ̀.
10 И҆ прїидо́ша на гѹмно̀ а҆та́дово, є҆́же є҆́сть ѡ҆б̾ ѡ҆́нъ по́лъ ї҆ѻрда́на, и҆ рыда́ша є҆гѡ̀ рыда́нїемъ ве́лїимъ и҆ крѣ́пкимъ ѕѣлѡ̀: и҆ сотворѝ пла́чь ѻ҆тцѹ̀ своемѹ̀ се́дмь дні́й.
11 И҆ ви́дѣша жи́телїе землѝ ханаа́нскїѧ пла́чь на гѹмнѣ̀ а҆та́довѣ и҆ рѣ́ша: пла́чь вели́къ се́й є҆́сть є҆гѵ́птѧнѡмъ. Сегѡ̀ ра́ди нарече́сѧ и҆́мѧ мѣ́стѹ томѹ̀ [пла́чь є҆гѵ́петскъ], є҆́же є҆́сть ѡ҆б̾ ѡ҆́нъ по́лъ ї҆ѻрда́на.
12 И҆ сотвори́ша є҆мѹ̀ та́кѡ сы́нове є҆гѡ̀, ѩ҆́коже заповѣ́да и҆̀мъ.
13 И҆ взѧ́ша є҆го̀ сы́нове є҆гѡ̀ въ зе́млю ханаа́ню и҆ погребо́ша є҆го̀ въ пеще́рѣ сѹгѹ́бѣй, ю҆́же стѧжа̀ а҆враа́мъ пеще́рѹ въ стѧжа́нїе гро́ба ѿ є҆фрѡ́на хетте́анина, прѧ́мѡ мамврі́и.
14 И҆ возврати́сѧ ї҆ѡ́сифъ во є҆гѵ́петъ, са́мъ и҆ бра́тїѧ є҆гѡ̀ и҆ всѝ совозше́дшїи погребстѝ ѻ҆тца̀ є҆гѡ̀.
15 Ви́дѣвше же бра́тїѧ ї҆ѡ́сифѡвы, ѩ҆́кѡ ѹ҆́мре ѻ҆те́цъ и҆́хъ, рѣ́ша: да не когда̀ воспомѧне́тъ ѕло́бѹ на́шѹ ї҆ѡ́сифъ и҆ воздаѧ́нїемъ возда́стъ на́мъ за всѧ҄ ѕла҄ѧ, ѩ҆̀же показа́хомъ є҆мѹ̀.
16 И҆ прише́дше ко ї҆ѡ́сифѹ реко́ша: ѻ҆те́цъ тво́й заклѧ̀ пре́жде кончи́ны своеѧ̀, глаго́лѧ:
17 та́кѡ рцы́те ї҆ѡ́сифѹ: ѡ҆ста́ви и҆̀мъ непра́вдѹ и҆ грѣ́хъ и҆́хъ, ѩ҆́кѡ лѹка҄ваѧ тебѣ̀ показа́ша: и҆ нн҃ѣ прїимѝ непра́вдѹ рабѡ́въ бг҃а ѻ҆тца̀ твоегѡ̀. И҆ пла́касѧ ї҆ѡ́сифъ, глаго́лющымъ и҆̀мъ къ немѹ̀.
18 И҆ прише́дше къ немѹ̀ реко́ша: сѐ, мы̀ тебѣ̀ рабѝ.
19 И҆ речѐ къ ни҄мъ ї҆ѡ́сифъ: не бо́йтесѧ, бж҃їй бо є҆́смь а҆́зъ:
20 вы̀ совѣща́сте на мѧ̀ ѕла҄ѧ, бг҃ъ же совѣща̀ ѡ҆ мнѣ̀ во бл҃га҄ѧ, дабы̀ бы́ло ѩ҆́коже дне́сь, и҆ препита́лисѧ бы лю́дїе мно́зи.
21 И҆ речѐ и҆̀мъ: не бо́йтесѧ, а҆́зъ препита́ю ва́съ и҆ до́мы ва́шѧ. И҆ ѹ҆тѣ́ши и҆̀хъ, и҆ глаго́ла и҆̀мъ по се́рдцѹ и҆́хъ.
22 И҆ всели́сѧ ї҆ѡ́сифъ во є҆гѵ́птѣ са́мъ и҆ бра́тїѧ є҆гѡ̀ и҆ ве́сь до́мъ ѻ҆тца̀ є҆гѡ̀: и҆ поживѐ ї҆ѡ́сифъ лѣ́тъ сто̀ де́сѧть.
23 И҆ ви́дѣ ї҆ѡ́сифъ є҆фрє́мли дѣ́ти до тре́тїѧгѡ ро́да: и҆ сы́нове махі́ра сы́на манассі́ина роди́шасѧ при бе́дрѣхъ ї҆ѡ́сифовыхъ.
24 И҆ речѐ ї҆ѡ́сифъ бра́тїи свое́й, глаго́лѧ: а҆́зъ ѹ҆мира́ю, посѣще́нїемъ же посѣти́тъ ва́съ бг҃ъ и҆ и҆зведе́тъ ва́съ ѿ землѝ сеѧ̀ въ зе́млю, ѡ҆ не́йже клѧ́тсѧ бг҃ъ ѻ҆тцє́мъ на́шымъ а҆враа́мѹ, ї҆саа́кѹ и҆ ї҆а́кѡвѹ.
25 И҆ заклѧ̀ ї҆ѡ́сифъ сы́ны ї҆и҃лєвы, глаго́лѧ: въ посѣще́нїи, и҆́мже посѣти́тъ ва́съ бг҃ъ, совознеси́те и҆ кѡ́сти моѧ҄ ѿсю́дѹ съ ва́ми.
26 И҆ сконча́сѧ ї҆ѡ́сифъ сы́й лѣ́тъ ста̀ десѧтѝ: и҆ погребо́ша є҆го̀, и҆ положи́ша въ ра́цѣ во є҆гѵ́птѣ.
Нашли в тексте ошибку? Выделите её и нажмите: Ctrl + Enter

Бытие, Пятикнижие Моисея, 50 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.