1 Ѕмі́й же бѣ̀ мѹдрѣ́йшїй всѣ́хъ ѕвѣре́й сѹ́щихъ на землѝ, и҆̀хже сотворѝ гдⷭь бг҃ъ. И҆ речѐ ѕмі́й женѣ̀: что̀ ѩ҆́кѡ речѐ бг҃ъ: да не ѩ҆́сте ѿ всѧ́кагѡ дре́ва ра́йскагѡ;
2 И҆ речѐ жена̀ ѕмі́ю: ѿ всѧ́кагѡ дре́ва ра́йскагѡ ѩ҆́сти бѹ́демъ:
3 ѿ плода́ же дре́ва, є҆́же є҆́сть посредѣ̀ раѧ̀, речѐ бг҃ъ, да не ѩ҆́сте ѿ негѡ̀, нижѐ прикосне́тесѧ є҆мѹ̀, да не ѹ҆́мрете.
4 И҆ речѐ ѕмі́й женѣ̀: не сме́ртїю ѹ҆́мрете:
5 вѣ́дѧше бо бг҃ъ, ѩ҆́кѡ въ ѻ҆́ньже а҆́ще де́нь снѣ́сте ѿ негѡ̀, ѿве́рзѹтсѧ ѻ҆́чи ва́ши, и҆ бѹ́дете ѩ҆́кѡ бо́зи, вѣ́дѧще до́брое и҆ лѹка́вое.
6 И҆ ви́дѣ жена̀, ѩ҆́кѡ добро̀ дре́во въ снѣ́дь и҆ ѩ҆́кѡ ѹ҆го́дно ѻ҆чи́ма ви́дѣти и҆ красно̀ є҆́сть, є҆́же разѹмѣ́ти: и҆ взе́мши ѿ плода̀ є҆гѡ̀ ѩ҆дѐ, и҆ дадѐ мѹ́жѹ своемѹ̀ съ собо́ю, и҆ ѩ҆до́ста.
7 И҆ ѿверзо́шасѧ ѻ҆́чи ѻ҆бѣ́ма, и҆ разѹмѣ́ша, ѩ҆́кѡ на́зи бѣ́ша: и҆ сши́ста ли́ствїе смоко́вное, и҆ сотвори́ста себѣ̀ препоѧ҄санїѧ.
8 И҆ ѹ҆слы́шаста гла́съ гдⷭа бг҃а ходѧ́ща въ раѝ по полѹ́дни: и҆ скры́стасѧ а҆да́мъ же и҆ жена̀ є҆гѡ̀ ѿ лица̀ гдⷭа бг҃а посредѣ̀ дре́ва ра́йскагѡ.
9 И҆ призва̀ гдⷭь бг҃ъ а҆да́ма и҆ речѐ є҆мѹ̀: а҆да́ме, гдѣ̀ є҆сѝ;
10 И҆ речѐ є҆мѹ̀: гла́съ слы́шахъ тебє̀ ходѧ́ща въ раѝ, и҆ ѹ҆боѧ́хсѧ, ѩ҆́кѡ на́гъ є҆́смь, и҆ скры́хсѧ.
11 И҆ речѐ є҆мѹ̀ бг҃ъ: кто̀ возвѣстѝ тебѣ̀, ѩ҆́кѡ на́гъ є҆сѝ, а҆́ще не бы̀ ѿ дре́ва, є҆го́же заповѣ́дахъ тебѣ̀ сегѡ̀ є҆ди́нагѡ не ѩ҆́сти, ѿ негѡ̀ ѩ҆́лъ є҆сѝ;
12 И҆ речѐ а҆да́мъ: жена̀, ю҆́же да́лъ є҆сѝ со мно́ю, та̀ мѝ дадѐ ѿ дре́ва, и҆ ѩ҆до́хъ.
13 И҆ речѐ гдⷭь бг҃ъ женѣ̀: что̀ сїѐ сотвори́ла є҆сѝ; И҆ речѐ жена̀: ѕмі́й прельсти́ мѧ, и҆ ѩ҆до́хъ.
14 И҆ речѐ гдⷭь бг҃ъ ѕмі́ю: ѩ҆́кѡ сотвори́лъ є҆сѝ сїѐ, про́клѧтъ ты̀ ѿ {па́че} всѣ́хъ скотѡ́въ и҆ ѿ всѣ́хъ ѕвѣре́й земны́хъ: на пе́рсехъ твои́хъ и҆ чре́вѣ ходи́ти бѹ́деши, и҆ зе́млю снѣ́си всѧ҄ дни҄ живота̀ твоегѡ̀:
15 и҆ враждѹ̀ положѹ̀ междѹ̀ тобо́ю и҆ междѹ̀ жено́ю, и҆ междѹ̀ сѣ́менемъ твои́мъ и҆ междѹ̀ сѣ́менемъ тоѧ̀: то́й твою̀ блюстѝ бѹ́детъ {Є҆вр.: сотре́тъ} главѹ̀, и҆ ты̀ блюстѝ бѹ́деши є҆гѡ̀ пѧ́тѹ.
16 И҆ женѣ̀ речѐ: ѹ҆множа́ѧ ѹ҆мно́жѹ печа҄ли твоѧ҄ и҆ воздыха҄нїѧ твоѧ҄: въ болѣ́знехъ роди́ши ча҄да, и҆ къ мѹ́жѹ твоемѹ̀ ѡ҆браще́нїе твоѐ, и҆ то́й тобо́ю ѡ҆блада́ти бѹ́детъ.
17 И҆ а҆да́мѹ речѐ: ѩ҆́кѡ послѹ́шалъ є҆сѝ гла́са жены̀ твоеѧ̀ и҆ ѩ҆́лъ є҆сѝ ѿ дре́ва, є҆го́же заповѣ́дахъ тебѣ̀ сегѡ̀ є҆ди́нагѡ не ѩ҆́сти, ѿ негѡ̀ ѩ҆́лъ є҆сѝ: проклѧта̀ землѧ̀ въ дѣ́лѣхъ твои́хъ, въ печа́лехъ снѣ́си тѹ́ю всѧ҄ дни҄ живота̀ твоегѡ̀:
18 тє́рнїѧ и҆ волчцы̀ возрасти́тъ тебѣ̀, и҆ снѣ́си травѹ̀ се́лнѹю:
19 въ по́тѣ лица̀ твоегѡ̀ снѣ́си хлѣ́бъ тво́й, до́ндеже возврати́шисѧ въ зе́млю, ѿ неѧ́же взѧ́тъ є҆сѝ: ѩ҆́кѡ землѧ̀ є҆сѝ, и҆ въ зе́млю ѿи́деши.
20 И҆ наречѐ а҆да́мъ и҆́мѧ женѣ̀ свое́й [жи́знь], ѩ҆́кѡ та̀ ма́ти всѣ́хъ живѹ́щихъ.
21 И҆ сотворѝ гдⷭь бг҃ъ а҆да́мѹ и҆ женѣ̀ є҆гѡ̀ ри҄зы кѡ́жаны, и҆ ѡ҆блечѐ и҆̀хъ.
22 И҆ речѐ бг҃ъ: сѐ, а҆да́мъ бы́сть ѩ҆́кѡ є҆ди́нъ ѿ на́съ, є҆́же разѹмѣ́ти до́брое и҆ лѹка́вое: и҆ нн҃ѣ да не когда̀ простре́тъ рѹ́кѹ свою̀ и҆ во́зметъ ѿ дре́ва жи́зни и҆ снѣ́стъ, и҆ жи́въ бѹ́детъ во вѣ́къ.
23 И҆ и҆згна̀ є҆го̀ гдⷭь бг҃ъ и҆з̾ раѧ̀ сла́дости дѣ́лати зе́млю, ѿ неѧ́же взѧ́тъ бы́сть.
24 И҆ и҆зри́нѹ а҆да́ма, и҆ вселѝ є҆го̀ прѧ́мѡ раѧ̀ сла́дости: и҆ приста́ви херѹві́ма, и҆ пла́менное ѻ҆рѹ́жїе ѡ҆браща́емое, храни́ти пѹ́ть дре́ва жи́зни.
Нашли в тексте ошибку? Выделите её и нажмите:
Ctrl + Enter
Бытие, Пятикнижие Моисея, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784