1 И҆ бы́сть, є҆гда̀ преста̀ ї҆еремі́а глаго́лѧ къ лю́демъ всѧ҄ словеса̀ гд҇нѧ, ѩ҆̀же посла̀ гд҇ь къ ни҄мъ,
2 и҆ речѐ а҆зарі́а сы́нъ маасе́евъ и҆ ї҆ѡана́нъ сы́нъ карі́евъ и҆ всѝ мѹ́жїе презо́рливїи ко ї҆еремі́и, глаго́люще: лже́ши, не посла́ тѧ къ на́мъ гд҇ь бг҃ъ на́шъ глаго́лати: не входи́те во є҆гѵ́петъ жи́ти та́мѡ:
3 но варѹ́хъ сы́нъ нирі́инъ под̾ѹща́етъ тѧ̀ на на́съ, да на́съ вда́си въ рѹ́цѣ халдє́йстѣ ѹ҆мори́ти на́съ и҆ превестѝ на́съ въ вавѷлѡ́нъ.
4 И҆ не послѹ́ша ї҆ѡана́нъ и҆ всѝ воевѡ́ды си́лы и҆ всѝ лю́дїе (не послѹ́шаша) гла́са гд҇нѧ, є҆́же жи́ти на землѝ ї҆ѹ́динѣ.
5 И҆ взѧ̀ ї҆ѡана́нъ и҆ всѝ воевѡ́ды си́лы всѧ҄ ѡ҆ста́вшыѧ ї҆ѹ҄дины, возвращє́ныѧ ѿ всѣ́хъ ѩ҆зы́кѡвъ, а҆́може разсѣ́ѧни бы́ша, є҆́же жи́ти на землѝ ї҆ѹ́динѣ,
6 мѹ́жы си҄льныѧ и҆ жєны̀, и҆ младе́нцы и҆ дщє́ри царє́вы, и҆ дѹ́шы, ѩ҆̀же ѡ҆ста́ви навѹзарда́нъ воево́да си́лы со годолі́емъ сы́номъ а҆хїка́мовымъ сы́на сафа́нова, и҆ ї҆еремі́ю про҇ро́ка, и҆ варѹ́ха сы́на нирі́ина,
7 и҆ внидо́ша во є҆гѵ́петъ, ѩ҆́кѡ не послѹ́шаша гла́са гд҇нѧ, и҆ внидо́ша во тафна́съ.
8 И҆ бы́сть сло́во гд҇не ко ї҆еремі́и во тафна́сѣ гл҃ѧ:
9 возмѝ себѣ̀ ка́мєни вели҄ки и҆ скры́й ѧ҆̀ пред̾ враты̀ до́мѹ фараѡ́нѧ во тафна́сѣ пред̾ ѻ҆чи́ма мѹже́й ї҆ѹ́диныхъ, и҆ рече́ши къ ни҄мъ:
10 та́кѡ гл҃етъ гд҇ь си́лъ, бг҃ъ ї҆и҃левъ: сѐ, а҆́зъ послю̀ и҆ приведѹ̀ навѹходоно́сора царѧ̀ вавѷлѡ́нска раба̀ моего̀, и҆ поста́витъ престо́лъ сво́й на ка́менїихъ си́хъ, и҆̀хже скры́лъ є҆сѝ, и҆ воздви́гнетъ ѻ҆рѹ́жїе своѐ на нѧ̀,
11 и҆ вни́детъ и҆ порази́тъ зе́млю є҆гѵ́петскѹ: и҆̀хже на сме́рть, на сме́рть, и҆ и҆̀хже на преселе́нїе, на преселе́нїе, а҆ и҆̀хже под̾ ме́чь, под̾ ме́чь:
12 и҆ пожже́тъ ѻ҆гне́мъ до́мы богѡ́въ и҆́хъ, и҆ пожже́тъ ѧ҆̀, и҆ пресели́тъ ѧ҆̀, и҆ покры́етъ зе́млю є҆гѵ́петскѹю, ѩ҆́коже покрыва́етсѧ пастѹ́хъ ри́зою свое́ю: и҆ и҆зы́детъ ѿтѹ́дѹ съ ми́ромъ
13 и҆ сокрѹши́тъ столпы̀ и҆лїѹпо́лѧ {со́лнечнагѡ гра́да}, и҆́же во є҆гѵ́птѣ, и҆ до́мы богѡ́въ є҆гѵ́петскихъ пожже́тъ ѻ҆гне́мъ.
Нашли в тексте ошибку? Выделите её и нажмите:
Ctrl + Enter
Книга пророка Иеремии, 43 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784