1 И҆ въ мц҇ъ седмы́й, пе́рвый (де́нь) мц҇а наро́читъ ст҃ъ да бѹ́детъ ва́мъ: всѧ́кагѡ дѣ́ла слѹже́бна да не сотворитѐ: де́нь зна́менїѧ бѹ́детъ ва́мъ.
2 И҆ сотвори́те всесожжє́нїѧ въ воню̀ благово́нїѧ гд҇ѹ, телца̀ ѿ волѡ́въ є҆ди́наго, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь непоро́чныхъ:
3 же́ртва и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ и҆ двѣ̀ десѧти҄ны ѻ҆внѹ̀ є҆ди́номѹ:
4 по десѧти́нѣ а҆́гнцѹ є҆ди́номѹ, седмѝ а҆́гнцємъ:
5 и҆ козла̀ ѿ ко́зъ є҆ди́наго грѣха̀ ра́ди, во є҆́же ѹ҆моли́ти ѡ҆ ва́съ:
6 кромѣ̀ всесожже́нїй новом҇чїѧ и҆ жє́ртвы и҆́хъ, и҆ возлїѧ҄нїѧ и҆́хъ, и҆ всесожже́нїе всегда́шнее: и҆ жє́ртвы и҆́хъ и҆ возлїѧ҄нїѧ и҆́хъ, по ѹ҆ста́вѹ и҆́хъ, въ воню̀ благово́нїѧ гд҇ѹ.
7 И҆ десѧ́тый де́нь мц҇а сегѡ̀ наро́читъ ст҃ъ да бѹ́детъ ва́мъ: и҆ ѡ҆ѕло́бите дѹ́шы ва́шѧ, и҆ всѧ́кагѡ дѣ́ла слѹже́бна да не сотворитѐ,
8 и҆ принесе́те всесожже́нїе въ воню̀ благово́нїѧ гд҇ѹ, прино́сы гд҇ѹ: телца̀ є҆ди́наго ѿ говѧ́дъ, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь: непорѡ́чны да бѹ́дѹтъ ва́мъ:
9 же́ртва и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ и҆ двѣ̀ десѧти҄ны ѻ҆внѹ̀ є҆ди́номѹ:
10 по десѧти́нѣ а҆́гнцѹ є҆ди́номѹ, на се́дмь а҆́гнцєвъ:
11 и҆ козла̀ є҆ди́наго ѿ ко́зъ грѣха̀ ра́ди, во є҆́же ѹ҆моли́ти ѡ҆ ва́съ: кромѣ̀ є҆́же грѣха̀ ра́ди ѡ҆чище́нїѧ, и҆ всесожже́нїе всегда́шнее: же́ртва є҆гѡ̀ и҆ возлїѧ́нїе є҆гѡ̀, по ѹ҆ста́вѹ є҆гѡ̀ въ воню̀ благово́нїѧ прино́съ гд҇ѹ.
12 И҆ пѧтыйна́десѧть де́нь седма́гѡ мц҇а сегѡ̀ наро́читъ ст҃ъ да бѹ́детъ ва́мъ: всѧ́кагѡ дѣ́ла слѹже́бна да не сотворитѐ, и҆ пра́зднѹйте то́й пра́здникъ гд҇еви се́дмь дні́й,
13 и҆ принеси́те всесожжє́нїѧ прино́съ въ воню̀ благово́нїѧ гд҇ѹ: въ пе́рвый де́нь телцє́въ ѿ говѧ́дъ трина́десѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть: непорѡ́чны да бѹ́дѹтъ ва́мъ:
14 жє́ртвы и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ, тремна́десѧти телцє́мъ, и҆ двѣ̀ десѧти҄ны ѻ҆внѹ̀ є҆ди́номѹ, на два̀ ѻ҆вна҄:
15 по десѧти́нѣ а҆́гнцѹ є҆ди́номѹ, на четырена́десѧть а҆́гнцєвъ:
16 и҆ козла̀ є҆ди́наго ѿ ко́зъ грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
17 И҆ въ де́нь вторы́й телцє́въ двана́десѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:
18 же́ртва и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:
19 и҆ козла̀ є҆ди́наго ѿ ко́зъ грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
20 Въ де́нь тре́тїй телцє́въ є҆динна́десѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:
21 же́ртва и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:
22 и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
23 Въ де́нь четве́ртый телцє́въ де́сѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:
24 жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:
25 и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
26 Въ де́нь пѧ́тый телцє́въ де́вѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:
27 жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ но числѹ̀ и҆́хъ, по ѹ҆ста́вѹ и҆́хъ:
28 и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
29 Въ де́нь шесты́й телцє́въ ѻ҆́смь, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:
30 жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:
31 и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
32 Въ де́нь седмы́й телцє́въ се́дмь, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:
33 жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:
34 и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
35 И҆ въ де́нь ѻ҆смы́й и҆схо́дъ бѹ́детъ ва́мъ: всѧ́кагѡ дѣ́ла слѹже́бна да не сотворитѐ въ ѻ҆́нь,
36 и҆ да принесе́те всесожжє́нїѧ въ воню̀ благово́нїѧ гд҇ѹ, телца̀ є҆ди́наго, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь непоро́чныхъ:
37 жє́ртвы и҆́хъ и҆ возлїѧ҄нїѧ и҆́хъ телцѹ̀ и҆ ѻ҆внѹ̀ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:
38 и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.
39 Сїѧ҄ сотвори́те гд҇ѹ въ пра́здники ва́шѧ, кромѣ̀ ѡ҆бѣ́тѡвъ ва́шихъ, и҆ вѡ́льнаѧ ва҄ша, и҆ всесожжє́нїѧ ва҄ша, и҆ жє́ртвы ва́шѧ, и҆ возлїѧ҄нїѧ ва҄ша, и҆ спаси́тєлнаѧ ва҄ша.
Нашли в тексте ошибку? Выделите её и нажмите:
Ctrl + Enter
Числа, Пятикнижие Моисея, 29 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784