1 И҆ возглаго́ласта марїа́мъ и҆ а҆арѡ́нъ на мѡѷсе́а жены̀ ра́ди є҆ѳїо́плѧныни, ю҆́же поѧ̀ мѡѷсе́й, и҆́бо женѹ̀ поѧ̀ є҆ѳїо́плѧныню,
2 и҆ реко́ста: є҆да̀ мѡѷсе́ю є҆ди́номѹ гл҃а гд҇ь; є҆да̀ и҆ на́мъ не гл҃аше; И҆ ѹ҆слы́ша гд҇ь.
3 И҆ человѣ́къ мѡѷсе́й кро́токъ ѕѣлѡ̀ па́че всѣ́хъ человѣ҄къ сѹ́щихъ на землѝ.
4 И҆ речѐ гд҇ь внеза́пѹ къ мѡѷсе́ю и҆ а҆арѡ́нѹ и҆ марїа́мѣ: и҆зыди́те вы̀ трїѐ въ ски́нїю свидѣ́нїѧ.
5 И҆ и҆зыдо́ша трїѐ въ ски́нїю свидѣ́нїѧ. И҆ сни́де гд҇ь въ столпѣ̀ ѡ҆́блачнѣ и҆ ста̀ над̾ две́рьми ски́нїи свидѣ́нїѧ: и҆ призва̀ а҆арѡ́на и҆ марїа́мъ. И҆ и҆зыдо́ста ѻ҆́ба.
6 И҆ речѐ къ ни҄мъ: послѹ́шайте слове́съ мои́хъ: а҆́ще бѹ́детъ въ ва́съ про҇ро́къ гд҇нь, въ видѣ́нїи є҆мѹ̀ позна́юсѧ, и҆ во снѣ̀ возгл҃ю є҆мѹ̀:
7 не та́кѡ ѩ҆́коже ра́бъ мо́й мѡѷсе́й, во все́мъ домѹ̀ мое́мъ вѣ́ренъ є҆́сть:
8 ѹ҆сты҄ ко ѹ҆стѡ́мъ возгл҃ю є҆мѹ̀ ѩ҆́вѣ, и҆ не гада́нїемъ, и҆ сла́вѹ гд҇ню ви́дѣ: и҆ почто̀ не ѹ҆боѧ́стесѧ глаго́лати на раба̀ моего̀ мѡѷсе́а;
9 И҆ гнѣ́въ ѩ҆́рости гд҇ни (бы́сть) на ни́хъ. И҆ ѿи́де.
10 И҆ ѡ҆́блакъ ѿстѹпѝ ѿ ски́нїи, и҆ сѐ, марїа́мъ прокаже́на бы́сть ѩ҆́кѡ снѣ́гъ: и҆ воззрѣ̀ а҆арѡ́нъ на марїа́мъ, и҆ сѐ, прокаже́на.
11 И҆ речѐ а҆арѡ́нъ къ мѡѷсе́ю: молю́ тѧ, го́споди, не возлага́й на ны̀ грѣха̀, поне́же не вѣ́дѧхомъ, ѩ҆́кѡ согрѣши́хомъ:
12 да не бѹ́детъ сїѧ̀ ѩ҆́кѡ мертва̀, ѩ҆́кѡ и҆́звергъ и҆зве́рженъ и҆з̾ ложе́снъ ма́тернихъ, и҆ (сѐ, ѹ҆жѐ) поѧдѐ по́лъ пло́ти є҆ѧ̀.
13 И҆ возопѝ мѡѷсе́й ко гд҇ѹ, глаго́лѧ: бж҃е, молю́тисѧ, и҆сцѣлѝ ю҆̀.
14 И҆ речѐ гд҇ь къ мѡѷсе́ю: а҆́ще бы ѻ҆те́цъ є҆ѧ̀ плю́ѧ заплева́лъ въ лицѐ є҆ѧ̀, не посрами́тсѧ ли се́дмь дні́й; да ѿлѹчи́тсѧ се́дмь дні́й внѣ̀ полка̀, и҆ по си́хъ да вни́детъ.
15 И҆ ѿлѹчи́сѧ марїа́мъ внѣ̀ полка̀ на се́дмь дні́й: и҆ лю́дїе не воздвиго́шасѧ, до́ндеже ѡ҆чи́стисѧ марїа́мъ.
Нашли в тексте ошибку? Выделите её и нажмите:
Ctrl + Enter
Числа, Пятикнижие Моисея, 12 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784