1 И҆ речѐ гд҇ь къ мѡѷсе́ю, гл҃ѧ:
2 заповѣ́ждь сынѡ́мъ ї҆и҃лєвымъ, и҆ рече́ши къ ни҄мъ, глаго́лѧ: да́ры моѧ҄, даѧ҄нїѧ моѧ҄, прино́сы моѧ҄, въ воню̀ благово́нїѧ соблюди́те приноси́ти мнѣ̀ на пра́здники моѧ҄.
3 И҆ да рече́ши къ ни҄мъ: сїѧ҄ приношє́нїѧ, ѩ҆̀же принесе́те гд҇ѹ, а҆́гнцєвъ є҆динолѣ́тныхъ непоро́чныхъ два̀ на де́нь во всесожже́нїе вы́нѹ:
4 а҆́гнца є҆ди́наго сотвори́те ра́нѡ, и҆ а҆́гнца втора́го сотвори́те въ ве́черъ:
5 и҆ да сотвори́ши десѧ́тѹю ча́сть є҆́фї (мѣ́ры) мѹкѝ пшени́чны на же́ртвѹ, вмѣ́шанѹ въ є҆ле́и четве́ртѹю ча́сть (мѣ́ры) їна:
6 всесожже́нїе непреста́нное, ѩ҆́коже бы́сть въ горѣ̀ сїна́йстѣй, въ воню̀ благово́нїѧ гд҇ѹ.
7 И҆ возлїѧ́нїе є҆гѡ̀ четве́ртѹю ча́сть (мѣ́ры) їна а҆́гнцѹ є҆ди́номѹ: во ст҃ѣ́мъ да возлїе́ши возлїѧ́нїе сїке́рѹ гд҇ѹ:
8 и҆ а҆́гнца втора́го сотвори́ши къ ве́черѹ: по же́ртвѣ є҆гѡ̀ и҆ по возлїѧ́нїю є҆гѡ̀ да сотвори́ши, въ воню̀ благово́нїѧ гд҇ѹ.
9 И҆ въ де́нь сѹббѡ́тъ приведе́те два̀ а҆́гнца є҆динѡлѣ́тна непорѡ́чна и҆ двѣ̀ десѧти҄ны мѹкѝ пшени́чны вмѣ́шаны въ є҆ле́и на же́ртвѹ и҆ возлїѧ́нїе,
10 всесожжє́нїѧ сѹббѡ́ты въ сѹббѡ́тахъ, на всесожже́нїе всегда́шнее и҆ возлїѧ́нїе є҆гѡ̀.
11 И҆ въ новом҇чїихъ да принесе́те во всесожже́нїе гд҇ѹ телца҄ два̀ ѿ говѧ́дъ и҆ ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь непоро́чныхъ:
12 трѝ десѧти҄ны мѹкѝ пшени́чны вмѣ́шаны въ є҆ле́и телцѹ̀ є҆ди́номѹ, и҆ двѣ̀ десѧти҄ны мѹкѝ пшени́чны вмѣ́шаны въ є҆ле́и ѻ҆внѹ̀ є҆ди́номѹ,
13 по десѧти́нѣ мѹкѝ пшени́чны вмѣ́шаны въ є҆ле́и а҆́гнцѹ є҆ди́номѹ: же́ртвѹ въ воню̀ благово́нїѧ прино́съ гд҇ѹ.
14 Возлїѧ́нїе и҆́хъ ѿ вїна̀ по́лъ (мѣ́ры) їна да бѹ́детъ телцѹ̀ є҆ди́номѹ: и҆ тре́тїѧ ча́сть (мѣ́ры) їна да бѹ́детъ ѻ҆внѹ̀ є҆ди́номѹ: и҆ четве́ртаѧ ча́сть (мѣ́ры) їна да бѹ́детъ а҆́гнцѹ є҆ди́номѹ: сїѐ всесожже́нїе ѿ мц҇а до мц҇а въ мц҇ы лѣ́та.
15 И҆ козла̀ є҆ди́наго ѿ ко́зъ грѣха̀ ра́ди гд҇ѹ на всесожже́нїе при́сное сотвори́те и҆ возлїѧ́нїе є҆гѡ̀.
16 И҆ въ мц҇ѣ пе́рвѣмъ въ четвертыйна́десѧть де́нь мц҇а па́сха гд҇ѹ:
17 и҆ въ пѧтыйна́десѧть де́нь мц҇а сегѡ̀ пра́здникъ: се́дмь дні́й ѡ҆прѣсно́ки да ѩ҆́сте.
18 И҆ де́нь пе́рвый наро́читъ ст҃ъ да бѹ́детъ ва́мъ: всѧ́кагѡ дѣ́ла слѹже́бна да не сотворитѐ.
19 И҆ принесе́те всесожжє́нїѧ прино́съ гд҇ѹ, тєлца̀ ѿ волѡ́въ два̀, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь: непоро́чни бѹ́дѹтъ ва́мъ.
20 И҆ же́ртва и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ и҆ двѣ̀ десѧти҄ны ѻ҆внѹ̀ є҆ди́номѹ да сотвори́те:
21 по десѧти́нѣ сотвори́ши а҆́гнцѹ є҆ди́номѹ, седмѝ а҆́гнцємъ:
22 и҆ козла̀ є҆ди́наго ѿ ко́зъ грѣха̀ ра́ди, во є҆́же ѹ҆моли́ти ѡ҆ ва́съ.
23 Кромѣ̀ всесожже́нїѧ всегда́шнѧгѡ ѹ҆́треннѧгѡ, є҆́же є҆́сть всесожже́нїе всегда́шнее, сотвори́те сїѧ҄.
24 По семѹ̀ сотвори́те на (всѧ́къ) де́нь, въ се́дмь дні́й, да́ръ, прино́съ въ воню̀ благово́нїѧ гд҇ѹ: на всесожже́нїе всегда́шнее сотвори́ши возлїѧ́нїе є҆гѡ̀.
25 И҆ де́нь седмы́й наро́читъ ст҃ъ да бѹ́детъ ва́мъ: всѧ́кагѡ дѣ́ла слѹже́бнагѡ да не сотворитѐ въ ѻ҆́нь.
26 И҆ де́нь но́выхъ (плодѡ́въ), є҆гда̀ принесе́те гд҇еви же́ртвѹ но́вѹ седми́цъ, наро́читъ ст҃ъ бѹ́детъ ва́мъ: всѧ́кагѡ дѣ́ла слѹже́бна да не сотворитѐ.
27 И҆ да принесе́те всесожжє́нїѧ въ воню̀ благово́нїѧ гд҇ѹ, тєлца̀ ѿ волѡ́въ два̀, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь непоро́чныхъ.
28 Же́ртва и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ и҆ двѣ̀ десѧти҄ны ѻ҆внѹ̀ є҆ди́номѹ:
29 по десѧти́нѣ а҆́гнцѹ є҆ди́номѹ, седмѝ а҆́гнцємъ:
30 и҆ козла̀ є҆ди́наго ѿ ко́зъ грѣха̀ ра́ди, во є҆́же ѹ҆моли́ти ѡ҆ ва́съ.
31 Кромѣ̀ всесожже́нїѧ всегда́шнѧгѡ, и҆ же́ртвѹ и҆́хъ сотвори́те мнѣ̀, непоро́чни да бѹ́дѹтъ ва́мъ, и҆ возлїѧ҄нїѧ и҆́хъ.
Нашли в тексте ошибку? Выделите её и нажмите: Ctrl + Enter

Числа, Пятикнижие Моисея, 28 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.