1 И҆ сїѧ҄ рождє́нїѧ а҆арѡ́на и҆ мѡѷсе́а, въ де́нь въ ѻ҆́ньже гл҃а гд҇ь мѡѷсе́ю на горѣ̀ сїна́йстѣй:
2 и҆ сїѧ҄ и҆мена̀ сынѡ́въ а҆арѡ́нихъ: пе́рвенецъ нада́въ и҆ а҆вїѹ́дъ, и҆ є҆леаза́ръ и҆ ї҆ѳама́ръ:
3 сїѧ҄ и҆мена̀ сынѡ́въ а҆арѡ́нихъ, жерцы̀ пома҄заныѧ, и҆̀мже соверши́шасѧ рѹ́цѣ и҆́хъ жре́ти:
4 и҆ сконча́шасѧ нада́въ и҆ а҆вїѹ́дъ пред̾ гд҇емъ, приносѧ́щымъ и҆̀мъ ѻ҆́гнь чѹ́ждь пред̾ гд҇емъ въ пѹсты́ни сїна́йстѣй, и҆ ча҄дъ не бѣ̀ и҆̀мъ: и҆ жре́чествовахѹ є҆леаза́ръ и҆ ї҆ѳама́ръ со а҆арѡ́номъ, ѻ҆тце́мъ свои́мъ.
5 И҆ речѐ гд҇ь къ мѡѷсе́ю, гл҃ѧ:
6 поимѝ пле́мѧ леѵі́ино, и҆ поста́виши ѧ҆̀ пред̾ а҆арѡ́номъ жерце́мъ, и҆ да слѹ́жатъ є҆мѹ̀:
7 и҆ да стрегѹ́тъ стражбы҄ є҆гѡ̀ и҆ стражбы҄ сынѡ́въ ї҆и҃левыхъ пред̾ ски́нїею свидѣ́нїѧ, дѣ́лати дѣла̀ ски́нїи:
8 и҆ да хранѧ́тъ всѧ҄ сосѹ́ды ски́нїи свидѣ́нїѧ и҆ стражбы҄ сынѡ́въ ї҆и҃левыхъ по всѣ҄мъ дѣлѡ́мъ ски́нїи:
9 и҆ да да́си леѵі́ты а҆арѡ́нѹ бра́тѹ твоемѹ̀ и҆ сынѡ́мъ є҆гѡ̀ жерцє́мъ: въ да́ръ даны̀ сі́и мнѣ̀ сѹ́ть ѿ сынѡ́въ ї҆и҃левыхъ:
10 и҆ а҆арѡ́на и҆ сы́ны є҆гѡ̀ поста́виши над̾ ски́нїею свидѣ́нїѧ, и҆ да хранѧ́тъ жре́чество своѐ, и҆ всѧ҄ ѩ҆̀же ѹ҆ ѻ҆лтарѧ̀ и҆ внѹ́трь завѣ́сы: и҆ноплеме́нникъ же прикаса́ѧйсѧ ѹ҆́мретъ.
11 И҆ речѐ гд҇ь къ мѡѷсе́ю, гл҃ѧ:
12 и҆ сѐ, а҆́зъ взѧ́хъ леѵі́ты ѿ среды̀ сынѡ́въ ї҆и҃левыхъ, вмѣ́стѡ всѧ́кагѡ пе́рвенца, ѿверза́ющагѡ ложесна̀ ѿ сынѡ́въ ї҆и҃левыхъ: и҆скѹплє́нїѧ и҆́хъ бѹ́дѹтъ, и҆ да бѹ́дѹтъ мнѣ̀ леѵі́ти:
13 мнѣ́ бо всѧ́къ пе́рвенецъ: въ ѻ҆́ньже де́нь поби́хъ всѧ́каго пе́рвенца въ землѝ є҆гѵ́петстѣй, ѡ҆ст҃и́хъ себѣ̀ всѧ́каго пе́рвенца во ї҆и҃ли, ѿ человѣ́ка до скота̀ мнѣ̀ да бѹ́дѹтъ: а҆́зъ гд҇ь.
14 И҆ речѐ гд҇ь къ мѡѷсе́ю въ пѹсты́ни сїна́йстѣй, гл҃ѧ:
15 соглѧ́дай сынѡ́въ леѵі́иныхъ по домѡ́мъ ѻ҆те́чествъ и҆́хъ по со́нмѡмъ и҆́хъ, по рожде́нїю и҆́хъ: всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше да соглѧ́даете и҆̀хъ.
16 И҆ сочтѐ и҆̀хъ мѡѷсе́й и҆ а҆арѡ́нъ повелѣ́нїемъ гд҇нимъ, ѩ҆́коже повелѣ̀ и҆̀мъ гд҇ь.
17 И҆ бѧ́хѹ сі́и сы́нове леѵї҄ины ѿ и҆ме́нъ и҆́хъ: гирсѡ́нъ, каа́ѳъ и҆ мера́рї.
18 И҆ сїѧ҄ и҆мена̀ сынѡ́въ гирсѡ́нихъ по со́нмѡмъ и҆́хъ: ловенї̀ и҆ семе́й.
19 И҆ сы́нове каа́ѳѡвы по со́нмѡмъ и҆́хъ: а҆мра́мъ и҆ ї҆ссаа́ръ, хеврѡ́нъ и҆ ѻ҆зїи́лъ.
20 И҆ сы́нове мера҄рїны по со́нмѡмъ и҆́хъ: моолї̀ и҆ мѹсї̀: сі́и сѹ́ть со́нми леѵі́тстїи по домѡ́мъ ѻ҆те́чествъ и҆́хъ.
21 Ѿ гирсѡ́на со́нмъ ловені́инъ и҆ со́нмъ семеи́нь: сі́и сѹ́ть со́нми гирсѡ́нѡвы.
22 Соглѧ́данїе и҆́хъ по числѹ̀ всегѡ̀ мѹ́жеска по́лѹ, ѿ мц҇а є҆ди́нагѡ и҆ вы́шше, соглѧ́данїе и҆́хъ се́дмь ты́сѧщъ и҆ пѧ́ть сѡ́тъ.
23 И҆ сы́нове гирсѡ́нѡвы за ски́нїею да ѡ҆полча́ютсѧ къ мо́рю.
24 И҆ кнѧ́зь до́мѹ ѻ҆те́чества со́нма гирсѡ́нѧ є҆лїса́фъ сы́нъ даи́ль.
25 И҆ стражба̀ сынѡ́въ гирсѡ́новыхъ въ ски́нїи свидѣ́нїѧ, ски́нїѧ и҆ покро́въ є҆ѧ̀, и҆ покро́въ две́рїй ски́нїи свидѣ́нїѧ,
26 и҆ ѻ҆пѡ́ны двора̀, и҆ завѣ́са две́рїй двора̀, и҆́же є҆́сть ѹ҆ ски́нїи, и҆ прѡ́чаѧ всѣ́хъ дѣ́лъ є҆гѡ̀.
27 Ѿ каа́ѳа со́нмъ а҆мра́мль є҆ди́нъ и҆ со́нмъ ї҆ссаа́ровъ є҆ди́нъ, и҆ со́нмъ хеврѡ́нь є҆ди́нъ и҆ со́нмъ ѻ҆зїи́ль є҆ди́нъ: сі́и сѹ́ть со́нми каа́ѳѡвы:
28 по числѹ̀ всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше ѻ҆́смь ты́сѧщъ и҆ ше́сть сѡ́тъ, стрегѹ́щїи стражбы҄ ст҃ы́хъ.
29 Со́нми сынѡ́въ каа́ѳовыхъ да ѡ҆полча́ютсѧ ѿ страны̀ ски́нїи къ ю҆́гѹ,
30 и҆ кнѧ́зь до́мѹ ѻ҆те́чествъ со́нмѡвъ каа́ѳовыхъ є҆лїсафа́нъ сы́нъ ѻ҆зїи́ль:
31 и҆ стражба̀ и҆́хъ кївѡ́тъ и҆ трапе́за, и҆ свѣти́лникъ и҆ ѻ҆лтари҄, и҆ сосѹ́ды ст҃а́гѡ, въ ни́хже слѹ́жатъ, и҆ покро́въ, и҆ всѧ҄ дѣла̀ и҆́хъ.
32 И҆ кнѧ́зь над̾ кнѧ҄зи леѵі́тскими є҆леаза́ръ сы́нъ а҆арѡ́на жерца̀, поста́вленъ стрещѝ стражбы҄ ст҃ы́хъ.
33 Ѿ мера́ра же со́нмъ моолї̀ и҆ со́нмъ мѹсї̀: сі́и сѹ́ть со́нми мера҄рїны,
34 соглѧ́данїе и҆́хъ по числѹ̀, всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше, ше́сть ты́сѧщъ и҆ двѣ́сти.
35 И҆ кнѧ́зь до́мѹ ѻ҆те́чествъ со́нма мера́рїна сѹрїи́лъ сы́нъ а҆вїхе́овъ: ѿ страны̀ ски́нїи да ѡ҆полча́ютсѧ къ сѣ́верѹ,
36 соглѧ́данїе стражбы̀ сынѡ́въ мера́рїныхъ глави҄цы ски́нїи и҆ верєѝ є҆ѧ̀, и҆ столпы̀ є҆ѧ̀ и҆ стоѧ҄ла є҆ѧ̀, и҆ всѧ҄ сосѹ́ды и҆́хъ и҆ всѧ҄ дѣла̀ и҆́хъ,
37 и҆ столпы̀ двора̀ ѡ҆́крестъ и҆ стоѧ҄ла и҆́хъ, и҆ колкѝ и҆́хъ и҆ вє́рви и҆́хъ.
38 Ѡ҆полча́ющїисѧ сопредѝ ски́нїи свидѣ́нїѧ на восто́ки мѡѷсе́й и҆ а҆арѡ́нъ и҆ сы́нове є҆гѡ̀, стрегѹ́ще стражбы҄ ст҃а́гѡ, въ стражба́хъ сынѡ́въ ї҆и҃левыхъ: и҆ и҆ноплеме́нникъ прикаса́ѧйсѧ да ѹ҆́мретъ.
39 Всѐ соглѧ́данїе леѵі́тѡвъ, и҆̀хже соглѧ́да мѡѷсе́й и҆ а҆арѡ́нъ повелѣ́нїемъ гд҇нимъ по со́нмѡмъ и҆́хъ, всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше, два́десѧть и҆ двѣ̀ ты́сѧщы.
40 И҆ речѐ гд҇ь къ мѡѷсе́ю, гл҃ѧ: соглѧ́дай всѧ́каго пе́рвенца мѹ́жеска по́лѹ сынѡ́въ ї҆и҃левыхъ ѿ мц҇а є҆ди́нагѡ и҆ вы́шше, и҆ возмѝ число̀ и҆́хъ по и҆́мени,
41 и҆ да по́ймеши мнѣ̀ леѵі́ты за всѧ҄ пе́рвенцы сынѡ́въ ї҆и҃левыхъ: а҆́зъ гд҇ь: и҆ скоты̀ леѵї҄тски вмѣ́стѡ всѣ́хъ пе́рвенцєвъ въ скотѣ́хъ сынѡ́въ ї҆и҃левыхъ.
42 И҆ соглѧ́да мѡѷсе́й, ѩ҆́коже заповѣ́да є҆мѹ̀ гд҇ь, всѧ́каго пе́рвенца въ сынѣ́хъ ї҆и҃левыхъ.
43 И҆ бы́ша всѝ пе́рвенцы мѹ́жескагѡ по́лѹ, по числѹ̀ и҆ме́нъ ѿ мц҇а є҆ди́нагѡ и҆ вы́шше, ѿ соглѧ́данїѧ и҆́хъ два́десѧть двѣ̀ ты́сѧщы двѣ́сти и҆ се́дмьдесѧтъ трѝ.
44 И҆ речѐ гд҇ь къ мѡѷсе́ю, гл҃ѧ:
45 поимѝ леѵі́ты вмѣ́стѡ всѣ́хъ пе́рвенцєвъ сынѡ́въ ї҆и҃левыхъ, и҆ скоты̀ леѵї҄тски вмѣ́стѡ скотѡ́въ и҆́хъ, и҆ бѹ́дѹтъ мнѣ̀ леѵі́ты: а҆́зъ гд҇ь:
46 и҆ и҆скѹ́пъ двѹ̀ сѡ́тъ седми́десѧти тре́хъ, и҆̀же преизбыва́ютъ све́рхъ леѵі́тѡвъ ѿ пе́рвенцѡвъ сынѡ́въ ї҆и҃левыхъ:
47 и҆ да во́змеши по пѧтѝ сї҄кль на главѹ̀, по сі́клю ст҃о́мѹ во́змеши два́десѧть пѣ́нѧзей сі́кль,
48 и҆ да́си сребро̀ а҆арѡ́нѹ и҆ сынѡ́мъ є҆гѡ̀ и҆скѹ́пъ ѿ преизбыва́ющихъ въ ни́хъ.
49 И҆ взѧ̀ мѡѷсе́й сребро̀ и҆скѹ́пное ѿ преизбыва́ющихъ въ ни́хъ на и҆скѹ́пъ леѵі́тѡмъ:
50 ѿ пе́рвенєцъ сынѡ́въ ї҆и҃левыхъ взѧ̀ сребра̀ ты́сѧщѹ трѝ ста҄ шестьдесѧ́тъ пѧ́ть сі́клєвъ, по сі́клю ст҃о́мѹ.
51 И҆ дадѐ мѡѷсе́й ѡ҆́кѹпъ ѿ преизбы́вшихъ а҆арѡ́нѹ и҆ сынѡ́мъ є҆гѡ̀, повелѣ́нїемъ гд҇нимъ, ѩ҆́коже заповѣ́да гд҇ь мѡѷсе́ю.
Нашли в тексте ошибку? Выделите её и нажмите:
Ctrl + Enter
Числа, Пятикнижие Моисея, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784