1 Да не смѹща́етсѧ се́рдце ва́ше: вѣ́рѹйте въ бг҃а, и҆ въ мѧ̀ вѣ́рѹйте:
2 въ домѹ̀ ѻ҆ц҃а̀ моегѡ̀ ѡ҆би́тєли мнѡ́ги сѹ́ть: а҆́ще ли же нѝ, ре́клъ бы́хъ ва́мъ: и҆дѹ̀ ѹ҆гото́вати мѣ́сто ва́мъ:
3 и҆ а҆́ще {а҆́ще пойдѹ̀ и҆} ѹ҆гото́влю мѣ́сто ва́мъ, па́ки прїидѹ̀ и҆ поимѹ̀ вы̀ къ себѣ̀, да, и҆дѣ́же є҆́смь а҆́зъ и҆ вы̀ бѹ́дете:
4 и҆ а҆́може а҆́зъ и҆дѹ̀, вѣ́сте, и҆ пѹ́ть вѣ́сте.
5 Глаго́ла є҆мѹ̀ ѳома̀: гд҇и, не вѣ́мы, ка́мѡ и҆́деши: и҆ ка́кѡ мо́жемъ пѹ́ть вѣ́дѣти;
6 Гл҃а є҆мѹ̀ ї҆и҃съ: а҆́зъ є҆́смь пѹ́ть и҆ и҆́стина и҆ живо́тъ: никто́же прїи́детъ ко ѻ҆ц҃ѹ̀, то́кмѡ мно́ю:
7 а҆́ще мѧ̀ бы́сте зна́ли, и҆ ѻ҆ц҃а̀ моего̀ зна́ли бы́сте (ѹ҆́бѡ): и҆ ѿсе́лѣ позна́сте є҆го̀, и҆ ви́дѣсте є҆го̀.
8 Глаго́ла є҆мѹ̀ фїлі́ппъ: гд҇и, покажѝ на́мъ ѻ҆ц҃а̀, и҆ довлѣ́етъ на́мъ.
9 Гл҃а є҆мѹ̀ ї҆и҃съ: толи́ко вре́мѧ съ ва́ми є҆́смь, и҆ не позна́лъ є҆сѝ менѐ, фїлі́ппе; ви́дѣвый менѐ ви́дѣ ѻ҆ц҃а̀: и҆ ка́кѡ ты̀ глаго́леши: покажѝ на́мъ ѻ҆ц҃а̀;
10 не вѣ́рѹеши ли, ѩ҆́кѡ а҆́зъ во ѻ҆ц҃ѣ̀, и҆ ѻ҆ц҃ъ во мнѣ̀ є҆́сть; (За҄ 48.) гл҃го́лы, ѩ҆̀же а҆́зъ гл҃ю ва́мъ, ѡ҆ себѣ̀ не гл҃ю: ѻ҆ц҃ъ же во мнѣ̀ пребыва́ѧй, то́й твори́тъ дѣла̀:
11 вѣ́рѹйте мнѣ̀, ѩ҆́кѡ а҆́зъ во ѻ҆ц҃ѣ̀, и҆ ѻ҆ц҃ъ во мнѣ̀: а҆́ще ли же нѝ, за та҄ дѣла̀ вѣ́рѹ и҆ми́те мѝ.
12 А҆ми́нь, а҆ми́нь гл҃ю ва́мъ: вѣ́рѹѧй въ мѧ̀, дѣла̀, ѩ҆́же а҆́зъ творю̀, и҆ то́й сотвори́тъ, и҆ бѡ́лша си́хъ сотвори́тъ: ѩ҆́кѡ а҆́зъ ко ѻ҆ц҃ѹ̀ моемѹ̀ грѧдѹ̀:
13 и҆ є҆́же а҆́ще что̀ про́сите (ѿ ѻ҆ц҃а̀) во и҆́мѧ моѐ, то̀ сотворю̀, да просла́витсѧ ѻ҆ц҃ъ въ сн҃ѣ:
14 (и҆) а҆́ще чесѡ̀ про́сите во и҆́мѧ моѐ, а҆́зъ сотворю̀.
15 А҆́ще лю́бите мѧ̀, за́пѡвѣди моѧ҄ соблюди́те,
16 и҆ а҆́зъ ѹ҆молю̀ ѻ҆ц҃а̀, и҆ и҆но́го ѹ҆тѣ́шителѧ да́стъ ва́мъ, да бѹ́детъ съ ва́ми въ вѣ́къ,
17 дх҃ъ и҆́стины, є҆гѡ́же мі́ръ не мо́жетъ прїѧ́ти, ѩ҆́кѡ не ви́дитъ є҆гѡ̀, нижѐ зна́етъ є҆гѡ̀: вы́ же зна́ете є҆го̀, ѩ҆́кѡ въ ва́съ пребыва́етъ и҆ въ ва́съ бѹ́детъ.
18 Не ѡ҆ста́влю ва́съ си҄ры: прїидѹ̀ къ ва́мъ:
19 є҆щѐ ма́лѡ, и҆ мі́ръ ктомѹ̀ не ѹ҆ви́дитъ менѐ, вы́ же ѹ҆ви́дите мѧ̀, ѩ҆́кѡ а҆́зъ живѹ̀, и҆ вы̀ жи́ви бѹ́дете:
20 въ то́й де́нь ѹ҆разѹмѣ́ете вы̀, ѩ҆́кѡ а҆́зъ во ѻ҆ц҃ѣ̀ мое́мъ, и҆ вы̀ во мнѣ̀, и҆ а҆́зъ въ ва́съ.
21 (За҄.) И҆мѣ́ѧй за́пѡвѣди моѧ҄ и҆ соблюда́ѧй и҆̀хъ, то́й є҆́сть любѧ́й мѧ̀: а҆ любѧ́й мѧ̀ возлю́бленъ бѹ́детъ ѻ҆ц҃е́мъ мои́мъ, и҆ а҆́зъ возлюблю̀ є҆го̀, и҆ ѩ҆влю́сѧ є҆мѹ̀ са́мъ.
22 Глаго́ла є҆мѹ̀ ї҆ѹ́да не ї҆скарїѡ́тскїй: гд҇и, и҆ что̀ бы́сть, ѩ҆́кѡ на́мъ хо́щеши ѩ҆ви́тисѧ, а҆ не мі́рови;
23 Ѿвѣща̀ ї҆и҃съ и҆ речѐ є҆мѹ̀: а҆́ще кто̀ лю́битъ мѧ̀, сло́во моѐ соблюде́тъ: и҆ ѻ҆ц҃ъ мо́й возлю́битъ є҆го̀, и҆ къ немѹ̀ прїи́дема, и҆ ѡ҆би́тель ѹ҆ негѡ̀ сотвори́ма:
24 не любѧ́й мѧ̀ слове́съ мои́хъ не соблюда́етъ: и҆ сло́во, є҆́же слы́шасте, нѣ́сть моѐ, но посла́вшагѡ мѧ̀ ѻ҆ц҃а̀.
25 Сїѧ҄ гл҃ахъ ва́мъ въ ва́съ сы́й:
26 ѹ҆тѣ́шитель же, дх҃ъ ст҃ы́й, є҆го́же по́слетъ ѻ҆ц҃ъ во и҆́мѧ моѐ, то́й вы̀ наѹчи́тъ всемѹ̀, и҆ воспомѧне́тъ ва́мъ всѧ҄, ѩ҆̀же рѣ́хъ ва́мъ.
27 Ми́ръ ѡ҆ставлѧ́ю ва́мъ, ми́ръ мо́й даю̀ ва́мъ: не ѩ҆́коже мі́ръ дае́тъ, а҆́зъ даю̀ ва́мъ. (За҄ 49.) Да не смѹща́етсѧ се́рдце ва́ше, ни ѹ҆страша́етъ.
28 Слы́шасте, ѩ҆́кѡ а҆́зъ рѣ́хъ ва́мъ: и҆дѹ̀ и҆ прїидѹ̀ къ ва́мъ. А҆́ще бы́сте люби́ли мѧ̀, возра́довалисѧ бы́сте (ѹ҆́бѡ), ѩ҆́кѡ рѣ́хъ: и҆дѹ̀ ко ѻ҆ц҃ѹ̀: ѩ҆́кѡ ѻ҆ц҃ъ мо́й бо́лїй менє̀ є҆́сть.
29 И҆ нн҃ѣ рѣ́хъ ва́мъ, пре́жде да́же не бѹ́детъ, да, є҆гда̀ бѹ́детъ, вѣ́рѹ и҆́мете.
30 Ктомѹ̀ не мно́гѡ гл҃ю съ ва́ми: грѧде́тъ бо сегѡ̀ мі́ра кнѧ́зь, и҆ во мнѣ̀ не и҆́мать ничесѡ́же.
31 Но да разѹмѣ́етъ мі́ръ, ѩ҆́кѡ люблю̀ ѻ҆ц҃а̀, и҆ ѩ҆́коже заповѣ́да мнѣ̀ ѻ҆ц҃ъ, та́кѡ творю̀: воста́ните, и҆́демъ ѿсю́дѹ.
Нашли в тексте ошибку? Выделите её и нажмите:
Ctrl + Enter
Евангелие от Иоанна святое благовествование, 14 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784