1-е послание Иоанна 3 глава — Библия — Елизаветинская Библия 1751

¹ Ви́дите, каковѹ̀ любо́вь да́лъ є҆́сть ѻ҆ц҃ъ на́мъ, да ча҄да бж҃їѧ нарече́мсѧ, и҆ бѹ́демъ. Сегѡ̀ ра́ди мі́ръ не зна́етъ на́съ, занѐ не позна̀ є҆гѡ̀.

² Возлю́бленнїи, нн҃ѣ ча҄да бж҃їѧ є҆смы̀, и҆ не ѹ҆̀ ѩ҆ви́сѧ, что̀ бѹ́демъ: вѣ́мы же, ѩ҆́кѡ, є҆гда̀ ѩ҆ви́тсѧ, подо́бни є҆мѹ̀ бѹ́демъ, и҆́бо ѹ҆́зримъ є҆го̀, ѩ҆́коже є҆́сть.

³ И҆ всѧ́къ и҆мѣ́ѧй наде́ждѹ сїю̀ на́нь, ѡ҆чища́етъ себѐ, ѩ҆́коже ѻ҆́нъ чи́стъ є҆́сть.

⁴ Всѧ́къ творѧ́й грѣ́хъ, и҆ беззако́нїе твори́тъ: и҆ грѣ́хъ є҆́сть беззако́нїе.

⁵ И҆ вѣ́сте, ѩ҆́кѡ ѻ҆́нъ ѩ҆ви́сѧ, да грѣхѝ на́шѧ во́зметъ, и҆ грѣха̀ въ не́мъ нѣ́сть.

⁶ Всѧ́къ, и҆́же въ не́мъ пребыва́етъ, не согрѣша́етъ: всѧ́къ согрѣша́ѧй не ви́дѣ є҆гѡ̀, ни позна̀ є҆гѡ̀.

⁷ Ча҄дца, никто́же да льсти́тъ ва́съ. Творѧ́й пра́вдѹ првдникъ є҆́сть, ѩ҆́коже ѻ҆́нъ првднъ є҆́сть.

⁸ Творѧ́й грѣ́хъ ѿ дїа́вола є҆́сть, ѩ҆́кѡ и҆спе́рва дїа́волъ согрѣша́етъ. Сегѡ̀ ра́ди ѩ҆ви́сѧ сн҃ъ бж҃їй да разрѹши́тъ дѣла̀ дїа́вѡлѧ.

⁹ Всѧ́къ рожде́нный ѿ бг҃а грѣха̀ не твори́тъ, ѩ҆́кѡ сѣ́мѧ є҆гѡ̀ въ не́мъ пребыва́етъ: и҆ не мо́жетъ согрѣша́ти, ѩ҆́кѡ ѿ бг҃а рожде́нъ є҆́сть.

¹⁰ Сегѡ̀ ра́ди ѩ҆влє́на сѹ́ть ча҄да бж҃їѧ и҆ ча҄да дїа́вѡлѧ: (За҄ 72.) всѧ́къ не творѧ́й пра́вды нѣ́сть ѿ бг҃а, и҆ не любѧ́й бра́та своегѡ̀.

¹¹ ѩ҆́кѡ сѐ є҆́сть завѣща́нїе, є҆́же слы́шасте и҆спе́рва, да лю́бимъ дрѹ́гъ дрѹ́га,

¹² не ѩ҆́коже ка́їнъ ѿ лѹка́вагѡ бѣ̀ и҆ закла̀ бра́та своего̀. И҆ за кѹ́ю винѹ̀ закла̀ є҆го̀; ѩ҆́кѡ дѣла̀ є҆гѡ̀ лѹка҄ва бѣ́ша, а҆ бра́та є҆гѡ̀ првдна.

¹³ Не чѹди́тесѧ, бра́тїе моѧ҄, а҆́ще ненави́дитъ ва́съ мі́ръ.

¹⁴ Мы̀ вѣ́мы, ѩ҆́кѡ преидо́хомъ ѿ сме́рти въ живо́тъ, ѩ҆́кѡ лю́бимъ бра́тїю: не любѧ́й бо бра́та пребыва́етъ въ сме́рти.

¹⁵ Всѧ́къ ненави́дѧй бра́та своего̀ человѣкоѹбі́йца є҆́сть: и҆ вѣ́сте, ѩ҆́кѡ всѧ́къ человѣкоѹбі́йца не и҆́мать живота̀ вѣ́чнагѡ въ себѣ̀ пребыва́юща.

¹⁶ Ѡ҆ се́мъ позна́хомъ любо́вь, ѩ҆́кѡ ѻ҆́нъ по на́съ дш҃ѹ свою̀ положѝ: и҆ мы̀ до́лжни є҆смы̀ по бра́тїи дѹ́шы полага́ти.

¹⁷ И҆́же ѹ҆̀бо и҆́мать бога́тство мі́ра сегѡ̀, и҆ ви́дитъ бра́та своего̀ тре́бѹюща, и҆ затвори́тъ ѹ҆тро́бѹ свою̀ ѿ негѡ̀, ка́кѡ любы̀ бж҃їѧ пребыва́етъ въ не́мъ;

¹⁸ Ча҄дца моѧ҄, не лю́бимъ сло́вомъ нижѐ ѧ҆зы́комъ, но дѣ́ломъ и҆ и҆́стиною.

¹⁹ И҆ ѡ҆ се́мъ разѹмѣ́емъ, ѩ҆́кѡ ѿ и҆́стины є҆смы̀, и҆ пред̾ ни́мъ смирѧ́емъ сердца̀ на҄ша:

²⁰ занѐ а҆́ще зазира́етъ на́мъ се́рдце на́ше, ѩ҆́кѡ бо́лїй є҆́сть бг҃ъ се́рдца на́шегѡ и҆ вѣ́сть всѧ҄.

²¹ (За҄ 73.) Возлю́бленнїи, а҆́ще се́рдце на́ше не за́зритъ на́мъ, дерзнове́нїе и҆́мамы къ бг҃ѹ,

²² и҆ є҆гѡ́же а҆́ще про́симъ, прїе́млемъ ѿ негѡ̀, ѩ҆́кѡ за́пѡвѣди є҆гѡ̀ соблюда́емъ и҆ ѹ҆гѡ́днаѧ пред̾ ни́мъ твори́мъ.

²³ И҆ сїѧ̀ є҆́сть за́повѣдь є҆гѡ̀, да вѣ́рѹемъ во и҆́мѧ сн҃а є҆гѡ̀ ї҆и҃са хр҇та̀ и҆ лю́бимъ дрѹ́гъ дрѹ́га, ѩ҆́коже да́лъ є҆́сть за́повѣдь на́мъ.

²⁴ И҆ соблюда́ѧй за́пѡвѣди є҆гѡ̀ въ не́мъ пребыва́етъ, и҆ то́й въ не́мъ. И҆ ѡ҆ се́мъ разѹмѣ́емъ, ѩ҆́кѡ пребыва́етъ въ на́съ, ѿ дх҃а, є҆го́же да́лъ є҆́сть на́мъ.

Нашли в тексте ошибку? Выделите её и нажмите: Ctrl + Enter

Первое соборное послание святого апостола Иоанна, 3 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

1 Иоанна 3 1-е послание Иоанна 3 глава

1 Иоанна 3 глава в переводах:

1 Иоанна 3 глава, комментарии: