1 И бысть, егда́ соверши́ Иису́с запове́дая обемана́десяте ученико́ма Свои́ма, пре́йде отту́ду учи́ти и пропове́дати во гра́дех их.
2 Иоа́нн же слы́шав во узи́лищи дела́ Христо́ва, посла́ два от учени́к свои́х,
3 Рече́ Ему́: Ты ли еси́ Гряды́й, или́ ино́го ча́ем?
4 И отвеща́в Иису́с рече́ им: ше́дша возвести́та Иоа́ннови, я́же слы́шита и ви́дита.
5 Слепи́и прозира́ют и хро́мии хо́дят, прокаже́ннии очища́ются и глуси́и слы́шат, ме́ртвии востаю́т и ни́щии благовеству́ют.
6 И блаже́н есть, и́же а́ще не соблазни́тся о Мне.
7 Те́ма же исходя́щема, нача́т Иису́с наро́дом глаго́лати о Иоа́нне: чесо́ изыдо́сте в пусты́ню ви́дети? Трость ли ве́тром коле́блему?
8 Но чесо́ изыдо́сте ви́дети? Челове́ка ли в мя́гки ри́зы облече́нна? Се, и́же мя́гкая нося́щии, в доме́х ца́рских суть.
9 Но чесо́ изыдо́сте ви́дети? Проро́ка ли? Ей, глаго́лю вам, и ли́шше проро́ка.
10 Сей бо есть, о не́мже есть пи́сано: се Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю.
11 Ами́нь глаго́лю вам, не воста́ в рожде́нных жена́ми бо́лий Иоа́нна Крести́теля, мний же во Ца́рствии Небе́снем бо́лий его́ есть.
12 От дний же Иоа́нна Крести́теля досе́ле Ца́рствие Небе́сное ну́дится, {с ну́ждею восприе́млется} и ну́ждницы восхища́ют е́.
13 Вси бо проро́цы и зако́н до Иоа́нна прореко́ша.
14 И а́ще хо́щете прия́ти, той есть Илиа́ хотя́й приити́.
15 Име́яй у́ши слы́шати да слы́шит.
16 Кому́ же уподо́блю род сей? Подо́бен есть де́тем седя́щим на то́ржищих, и возглаша́ющим друго́м свои́м,
17 И глаго́лющим: писка́хом вам, и не пляса́сте, пла́кахом вам, и не рыда́сте.
18 Прии́де бо Иоа́нн ни яды́й, ни пия́й, и глаго́лют: бе́са и́мать.
19 Прии́де Сын Челове́ческий яды́й и пия́й, и глаго́лют: се челове́к я́дца и винопи́йца, мытаре́м друг и гре́шником. И оправди́ся прему́дрость от чад свои́х.
20 Тогда́ нача́т Иису́с поноша́ти градово́м, в ни́хже бы́ша мно́жайшия си́лы Его́, зане́ не пока́яшася:
21 Го́ре тебе́, Хорази́не, го́ре тебе́, Вифсаи́до, я́ко а́ще в Ти́ре и Сидо́не бы́ша си́лы бы́ли бы́вшия в вас, дре́вле у́бо во вре́тищи и пе́пеле пока́ялися бы́ша.
22 Оба́че глаго́лю вам Ти́ру и Сидо́ну отра́днее бу́дет в день су́дный, не́же вам.
23 И ты, Капернау́ме, и́же до небе́с вознесы́йся, до а́да сни́деши, зане́ а́ще в Содо́мех бы́ша си́лы бы́ли бы́вшия в тебе́, пребы́ли у́бо бы́ша до дне́шняго дне.
24 Оба́че глаго́лю вам, я́ко земли́ Содо́мстей отра́днее бу́дет в день су́дный, не́же тебе́.
25 В то вре́мя отвеща́в Иису́с рече́: испове́даю Ти ся, О́тче, Го́споди небесе́ и земли́, я́ко утаи́л еси́ сия́ от прему́дрых и разу́мных и откры́л еси́ та младе́нцем.
26 Ей, О́тче, я́ко та́ко бысть благоволе́ние пред Тобо́ю.
27 Вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти.
28 Прииди́те ко Мне вси тружда́ющиися и обремене́ннии, и Аз упоко́ю вы.
29 Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим.
30 И́го бо Мое́ бла́го, и бре́мя Мое́ легко́ есть.
