1 Адкрыццё Ісуса Хрыста, якое Яму даў Бог, каб аб’явіў слугам Сваім, што павінна стацца ў хуткім часе, і, паслаўшы праз анёла Свайго, даў знак слузе Свайму Яну,
2 які засведчыў слова Божае і сведчанне Ісуса Хрыста пра ўсё, што бачыў.
3 Шчасны той, хто чытае і чуе словы прароцтваў ды захавае тое, што ў іх напісана; бо час блізкі.
4 Ян сямі цэрквам у Азіі: ласка вам і супакой ад Таго, Які ёсць, Які быў і Які прыйдзе, і ад сямі духаў, што перад пасадам Яго,
5 і ад Ісуса Хрыста, Які ёсць сведка верны, Першародны з памёршых і Валадар валадароў зямных. Яму, Які ўзлюбіў нас, і абмыў нас ад грахоў нашых крывёю Сваёй,
6 і зрабіў нас царамі і святарамі Богу і Айцу Свайму, Яму хвала і валадарства на векі вечныя. Амін.
7 Вось жа, прыходзіць у аблоках, і ўбачыць Яго ўсякае вока, і тыя, што Яго пракалолі, і залямантуюць над Ім усе плямёны зямлі. Так, амін.
8 Я — Альфа і Амега, кажа Госпад Бог, Які ёсць, Які быў і Які прыйдзе, Усемагутны.
9 Я, Ян, брат ваш і сутрывалец у прыгнёце, і ў Валадарстве і ў цярпенні Ісуса Хрыста, быў на востраве, які называецца Патмас, дзеля слова Божага і сведчання аб Ісусе.
10 Я быў у захапленні духа ў дзень Госпадаў, і пачуў за сабою зычны голас, быццам трубы,
11 які казаў: «Што бачыш, запішы ў кнізе і пашлі сямі цэрквам: у Эфес, і ў Смірну, і ў Пергам, і ў Тыятыру, і ў Сарды, і ў Філадэльфію, і ў Лаадыцэю».
12 Я павярнуўся, каб зірнуць, адкуль быў голас, што да мяне гаварыў; і, павярнуўшыся, убачыў сем залатых светачаў,
13 і паміж светачаў залатых Кагосьці, быццам Сына Чалавечага; Ён апрануты ў доўгую шату і падперазаны пад грудзі залатым поясам;
14 галава ж Яго і валасы былі белыя, як белая воўна, быццам снег, і вочы Яго як полымя агню,
15 і ногі Яго падобны да бронзы, распаленай у печы, і голас Яго падобны на гук бурных вод,
16 і Ён трымаў у правай руцэ Сваёй сем зорак, з вуснаў жа Яго вытыркаўся меч двусечны востры, і твар Яго зіхацеў, як сонца ў магутнасці сваёй.
17 І, убачыўшы Яго, паў я да ног Яго, быццам нежывы. А Ён паклаў правую руку Сваю на мяне, кажучы: «Не бойся! Я — Першы, і Апошні,
18 і жывы; і быў мёртвым, і вось жывы на векі вечныя, і маю ключы смерці і пекла.
19 Дык напішы, што ты ўбачыў, што ёсць і што павінна стацца пасля.
20 Таямніца сямі зорак, якія ты бачыў у маёй правай руцэ, і сямі светачаў залатых: сем зорак — гэта сем анёлаў сямі цэркваў, а сем светачаў — гэта сем цэркваў.