1 По сих и́де Иису́с на он пол мо́ря Галиле́и Тивериа́дска,
2 И по Нем идя́ше наро́д мног, я́ко ви́дяху зна́мения Его́, я́же творя́ше на неду́жных.
3 Взы́де же на гору́ Иису́с и ту́ седя́ше со ученики́ свои́ми.
4 Бе́ же близ Па́сха, пра́здник жидо́вский.
5 Возве́д у́бо Иису́с о́чи и ви́дев, я́ко мног наро́д гряде́т к Нему́, глаго́ла к Фили́ппу: чим ку́пим хле́бы, да ядя́т си́и?
6 Сие́ же глаго́лаше искуша́я его́, Сам бо ве́дяше, что хо́щет сотвори́ти.
7 Отвеща́ Ему́ Фили́пп: двема́ сто́ма пе́нязь хле́бы не довле́ют им, да ко́ждо их ма́ло что прии́мет.
8 Глаго́ла Ему́ еди́н от учени́к Его́, Андре́й, брат Си́мона Петра́:
9 Есть о́трочищь зде еди́н, и́же и́мать пять хлеб ячме́нных и две ры́бе, но си́и что суть в сели́ко?
10 Рече́ же Иису́с: сотвори́те челове́ки возлещи́. Бе же трава́ мно́га на ме́сте. Возлеже́ у́бо муже́й число́м я́ко пять ты́сящ.
11 Прия́т же хле́бы Иису́с и хвалу́ возда́в, подаде́ ученико́м, ученицы́ же возлежа́щим, та́кожде и от ры́бу, ели́ко хотя́ху.
12 И я́ко насы́тишася, глаго́ла ученико́м Свои́м: собери́те избы́тки укру́х, да не поги́бнет ничто́же.
13 Собра́ша же и испо́лниша двана́десяте ко́шя укру́х от пяти́х хлеб ячме́нных, и́же избы́ша я́дшим.
14 Челове́цы же ви́девше зна́мение, е́же сотвори́ Иису́с, глаго́лаху, я́ко Сей есть вои́стинну Проро́к Гряды́й в міръ.
15 Иису́с же разуме́в, я́ко хотя́т приити́, да восхи́тят Его́ и сотворя́т Его́ царя́, оты́де па́ки в го́ру еди́н.
16 Я́ко по́зде бысть, снидо́ша ученицы́ Его́ на мо́ре,
17 И влезо́ша в кора́бль, и идя́ху на он пол мо́ря в Капернау́м. И тма а́бие бысть, и не у́ бе прише́л к ним Иису́с.
18 Мо́ре же, ве́тру ве́лию дыха́ющу, воздвиза́шеся.
19 Гре́бше же я́ко ста́дий два́десять и пять, или́ три́десять, узре́ша Иису́са ходя́ща по мо́рю и близ корабля́ бы́вша, и убоя́шася.
20 Он же глаго́ла им: Аз есмь, не бо́йтеся.
21 Хотя́ху у́бо прия́ти Его́ в кора́бль, и а́бие кора́бль бысть на земли́, в ню́же идя́ху.
22 Во у́трий же наро́д, и́же стоя́ше об он пол мо́ря, ви́дев, я́ко корабля́ ино́го не бе ту, то́кмо еди́н той, во́ньже внидо́ша ученицы́ Его́, и я́ко не вни́де со ученики́ Свои́ми Иису́с в кора́бль, но еди́ни ученицы́ Его́ идо́ша,
23 И и́ни приидо́ша корабли́ от Тивериа́ды близ ме́ста, иде́же ядо́ша хле́бы, хвалу́ возда́вше Го́сподеви.
24 Егда́ же ви́деша наро́ди, я́ко Иису́са не бысть ту, ни учени́к Его́, влезо́ша са́ми в корабли́ и приидо́ша в Капернау́м, и́щуще Иису́са.
25 И обрето́ша Его́ об он пол мо́ря, ре́ша Ему́: Равви́, когда́ зде бысть? {когда́ се́мо прише́л еси́}
26 Отвеща́ им Иису́с и рече́: ами́нь, ами́нь глаго́лю вам, и́щете Мене́, не я́ко ви́десте зна́мение, но я́ко я́ли есте́ хле́бы и насы́тистеся.
27 Де́лайте не бра́шно ги́блющее, но бра́шно пребыва́ющее в животе́ ве́чнем, е́же Сын Челове́ческий вам даст, Сего́ бо Оте́ц зна́мена Бог.
28 Ре́ша же к Нему́: что сотвори́м, да де́лаем дела́ Бо́жия?
29 Отвеща́ Иису́с и рече́ им: се есть де́ло Бо́жие, да ве́руете в Того́, Его́же посла́ Он.
30 Ре́ша же Ему́: ко́е у́бо Ты твори́ши зна́мение, да ви́дим и ве́ру и́мем Тебе́? Что де́лаеши?
31 Отцы́ на́ши ядо́ша ма́нну в пусты́ни, я́коже есть пи́сано: хлеб с небесе́ даст им я́сти.
32 Рече́ у́бо им Иису́с: ами́нь, ами́нь глаго́лю вам, не Моисе́й даде́ вам хлеб с небесе́, но Оте́ц Мой даст вам хле́ба и́стиннаго с небесе́.
33 Хлеб бо Бо́жий есть сходя́й с небесе́ и дая́й живо́т міру.
34 Ре́ша у́бо к нему́: Го́споди, всегда́ даждь нам хлеб сей.
35 Рече́ же им Иису́с: Аз есмь хлеб живо́тный, гряды́й ко Мне не и́мать взалка́тися, и ве́руяй в Мя не и́мать вжажда́тися никогда́же.
36 Но рех вам, я́ко и ви́десте Мя, и не ве́руете.
37 Все е́же даст Мне Оте́ц, ко Мне прии́дет, и гряду́щаго ко Мне не изжену́ вон.
38 Я́ко снидо́х с небесе́, не да творю́ во́лю Мою́, но во́лю посла́вшаго Мя Отца́.
39 Се же есть во́ля посла́вшаго Мя Отца́, да все е́же даде́ Ми, не погублю́ от Него́, но воскрешу́ е́ в после́дний день.
40 Се же есть во́ля Посла́вшаго Мя, да всяк ви́дяй Сы́на и ве́руяй в Него́ и́мать живо́т ве́чный, и воскрешу́ его́ Аз в после́дний день.
41 Ропта́ху у́бо иуде́е о Нем, я́ко рече́: Аз есмь хлеб сше́дый с небесе́.
42 И глаго́лаху: не Сей ли есть Иису́с сын Ио́сифов, Ему́же мы зна́ем отца́ и Ма́терь? Ка́ко у́бо глаго́лет Сей, я́ко с небесе́ снидо́х?
43 Отвеща́ у́бо Иису́с и рече́ им: не ропщи́те между́ собо́ю,
44 Никто́же мо́жет приити́ ко Мне, а́ще не Оте́ц посла́вый Мя привлече́т его́, и Аз воскрешу́ его́ в после́дний день.
45 Есть пи́сано во проро́цех: и бу́дут вси науче́ни Бо́гом. Всяк слы́шавый от Отца́ и навы́к, прии́дет ко Мне.
46 Не я́ко Отца́ ви́дел есть кто, то́кмо Сый от Бо́га, Сей ви́де Отца́.
47 Ами́нь, ами́нь глаго́лю вам: ве́руяй в мя и́мать живо́т ве́чный.
48 Аз есмь хлеб живо́тный.
49 Отцы́ ва́ши ядо́ша ма́нну в пусты́ни и умро́ша.
50 Сей есть хлеб сходя́й с небесе́, да а́ще кто от него́ яст, не у́мрет.
51 Аз есмь хлеб живо́тный, и́же сше́дый с небесе́, а́ще кто снесть от хле́ба сего́, жив бу́дет во ве́ки, и хлеб, его́же Аз дам, Плоть Моя́ есть, ю́же Аз дам за живо́т міра.
52 Пря́хуся же между́ собо́ю жи́дове, глаго́люще: ка́ко мо́жет Сей нам да́ти Плоть Свою́ я́сти?
53 Рече́ же им Иису́с: ами́нь, ами́нь глаго́лю вам, а́ще не сне́сте Пло́ти Сы́на Челове́ческаго, ни пие́те Кро́ве Его́, живота́ не и́мате в себе́.
54 Яды́й Мою́ Плоть и пия́й Мою́ Кровь и́мать живо́т ве́чный, и Аз воскрешу́ его́ в после́дний день.
55 Плоть бо моя́ и́стинно есть бра́шно, и кровь моя́ и́стинно есть пи́во.
56 Яды́й Мою́ Плоть и пия́й Мою́ Кровь во Мне пребыва́ет, и Аз в нем.
57 Я́коже посла́ Мя живы́й Оте́ц, и Аз живу́ Отца́ ра́ди, и яды́й Мя, и той жив бу́дет Мене́ ра́ди.
58 Сей есть хлеб сше́дый с небесе́, не я́коже ядо́ша отцы́ ва́ши ма́нну и умро́ша, яды́й хлеб сей жив бу́дет во ве́ки.
59 Сия́ рече́ на со́нмищи, учя́ в Капернау́ме.
60 Мно́зи у́бо слы́шавше от учени́к Его́, ре́ша: же́стоко есть сло́во сие́, и кто мо́жет Его́ послу́шати?
61 Ве́дый же Иису́с в Себе́, я́ко ро́пщут о сем ученицы́ Его́, рече́ им: сие́ ли вы блазни́т?
62 А́ще у́бо у́зрите Сы́на Челове́ческаго восходя́ща, иде́же бе пре́жде?
63 Дух есть, и́же оживля́ет, плоть не по́льзует ничто́же. Глаго́лы, я́же Аз глаго́лах вам, дух суть и живо́т суть.
64 Но суть от вас не́цыи, и́же не ве́руют. Ве́дяше бо искони́ Иису́с, кто суть неве́рующии, и кто есть предая́й Его́.
65 И глаго́лаше: сего́ ра́ди рех вам, я́ко никто́же мо́жет приити́ ко Мне, а́ще не бу́дет ему́ дано́ от Отца́ Моего́.
66 От сего́ мно́зи от учени́к Его́ идо́ша вспять и ктому́ не хожда́ху с Ним.
67 Рече́ же Иису́с обемана́десяте: еда́ и вы хо́щете ити́?
68 Отвеща́ у́бо Ему́ Си́мон Петр: Го́споди, к кому́ и́дем? Глаго́лы живота́ ве́чнаго и́маши.
69 И мы ве́ровахом и позна́хом, я́ко Ты еси́ Христо́с, Сын Бо́га жива́го.
70 Отвеща́ им: не Аз ли вас двана́десяте избра́х? И еди́н от вас диа́вол есть.
71 Глаго́лаше же Иу́ду Си́монова Искарио́та: сей бо хотя́ше преда́ти Его́, еди́н сый от обоюна́десяте.
