1 Сы́нъ премѹ́дръ весели́тъ ѻ҆тца̀, сы́нъ же безѹ́менъ печа́ль ма́тери.
2 Не по́льзѹютъ сокрѡ́вища беззако́нныхъ, пра́вда же и҆зба́витъ ѿ сме́рти.
3 Не ѹ҆бїе́тъ гла́домъ гд҇ь дѹ́шѹ првднѹю, живо́тъ же нечести́выхъ низврати́тъ.
4 Нищета̀ мѹ́жа смирѧ́етъ: рѹ́цѣ же мѹ́жественныхъ ѡ҆богаща́ютсѧ.
5 Сы́нъ нака́занъ премѹ́дръ бѹ́детъ, безѹ́мный же слѹго́ю ѹ҆потреби́тсѧ: спасе́тсѧ ѿ зно́ѧ сы́нъ разѹ́мный, вѣтротлѣ́ненъ же быва́етъ на жа́твѣ сы́нъ беззако́нный.
6 Блг҇ве́нїе гд҇не на главѣ̀ првднагѡ: ѹ҆ста́ же нечести́выхъ покры́етъ пла́чь безвре́менный.
7 Па́мѧть првдныхъ съ похвала́ми: и҆́мѧ же нечести́выхъ ѹ҆гаса́етъ.
8 Премѹ́дръ се́рдцемъ прїи́метъ за́пѡвѣди: непокрове́нный же ѹ҆стна́ма ѡ҆строптѣва́ѧ запне́тсѧ.
9 И҆́же хо́дитъ про́стѡ, хо́дитъ надѣ́ѧсѧ: развраща́ѧ же пѹти҄ своѧ҄, позна́нъ бѹ́детъ.
10 Намиза́ѧй ѻ҆́комъ съ ле́стїю собира́етъ мѹжє́мъ печа҄ли: ѡ҆блича́ѧй же со дерзнове́нїемъ миротвори́тъ.
11 И҆сто́чникъ жи́зни въ рѹцѣ̀ првднагѡ: ѹ҆ста́ же нечести́вагѡ покры́етъ па́гѹба.
12 Не́нависть воздвиза́етъ ра́спрю: всѣ́хъ же нелюбопри́телныхъ покрыва́етъ любо́вь.
13 И҆́же ѿ ѹ҆сте́нъ произно́ситъ премѹ́дрость, жезло́мъ бїе́тъ мѹ́жа безсерде́чна.
14 Премѹ́дрїи скры́ютъ чѹ́вство, ѹ҆ста́ же проде́рзагѡ приближа́ютсѧ сокрѹше́нїю.
15 Стѧжа́нїе бога́тыхъ гра́дъ тве́рдъ, сокрѹше́нїе же нечести́выхъ нищета̀.
16 Дѣла̀ првдныхъ живо́тъ творѧ́тъ, пло́дове же нечести́выхъ грѣхѝ.
17 Пѹти҄ жи́зни храни́тъ наказа́нїе: наказа́нїемъ же не ѡ҆бличе́ный заблѹжда́етъ.
18 Покрыва́ютъ враждѹ̀ ѹ҆стнѣ̀ пра҄выѧ: и҆зносѧ́щїи же ѹ҆кори́знѹ безѹ́мнѣйшїи сѹ́ть.
19 Ѿ многосло́вїѧ не и҆збѣжи́ши грѣха̀: щадѧ́ же ѹ҆стнѣ̀, разѹ́менъ бѹ́деши.
20 Сребро̀ разжже́ное ѧ҆зы́къ првднагѡ: се́рдце же нечести́вагѡ и҆сче́знетъ.
21 Ѹ҆стнѣ̀ првдныхъ вѣ́дѧтъ высѡ́каѧ: безѹ́мнїи же въ скѹ́дости скончава́ютсѧ.
22 Блг҇ве́нїе гд҇не на главѣ̀ првднагѡ, сїѐ ѡ҆богаща́етъ, и҆ не и҆́мать приложи́тисѧ є҆мѹ̀ печа́ль въ се́рдцы.
23 Смѣ́хомъ безѹ́мный твори́тъ ѕла҄ѧ: премѹ́дрость же мѹ́жеви ражда́етъ ра́зѹмъ.
24 Въ поги́бели нечести́вый ѡ҆бно́ситсѧ: жела́нїе же првднагѡ прїѧ́тно.
25 Преходѧ́щей бѹ́ри, нечести́вый и҆счеза́етъ, првдный же ѹ҆клони́всѧ спаса́етсѧ во вѣ́ки.
26 ѩ҆́коже гро́здїе зеле́ное вре́дъ зѹбѡ́мъ и҆ ды́мъ ѻ҆чи́ма, та́кѡ законопрестѹпле́нїе творѧ́щымъ є҆̀.
27 Стра́хъ гд҇ень прилага́етъ дни҄: лѣ҄та же нечести́выхъ ѹ҆ма́лѧтсѧ.
28 Пребыва́етъ съ првдными весе́лїе, ѹ҆пова́нїе же нечести́выхъ погиба́етъ.
29 Ѹ҆твержде́нїе прпдбномѹ стра́хъ гд҇ень, сокрѹше́нїе же творѧ́щымъ ѕла҄ѧ.
30 Првдникъ во вѣ́ки не поколе́блетсѧ: нечести́вїи же не населѧ́тъ землѝ.
31 Ѹ҆ста̀ првднагѡ ка́плютъ премѹ́дрость, ѧ҆зы́къ же непра́веднагѡ поги́бнетъ:
32 ѹ҆стнѣ̀ мѹже́й првдныхъ ка́плютъ бл҃года҄ти, ѹ҆ста́ же нечести́выхъ развраща́ютсѧ.
Нашли в тексте ошибку? Выделите её и нажмите:
Ctrl + Enter
Притчи Соломона, 10 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784