1 Сы́нъ бл҃горазѹ́мный послѹшли́въ ѻ҆тцѹ̀, сы́нъ же непокорли́вый въ поги́бель.
2 Ѿ плодѡ́въ пра́вды снѣ́сть бл҃гі́й: дѹ́шы же беззако́нныхъ погиба́ютъ безвре́меннѡ.
3 И҆́же храни́тъ своѧ҄ ѹ҆ста̀, соблюда́етъ свою̀ дѹ́шѹ: проде́рзивый же ѹ҆стна́ма ѹ҆страши́тъ себѐ.
4 Въ по́хотехъ є҆́сть всѧ́къ пра́здный: рѹ́ки же мѹ́жественныхъ въ прилѣжа́нїи.
5 Словесѐ непра́ведна ненави́дитъ првдникъ: нечести́вый же стыди́тсѧ и҆ не воз̾имѣ́тъ дерзнове́нїѧ.
6 Пра́вда храни́тъ неѕлѡ́бивыѧ: нечести҄выѧ же ѕлы҄ твори́тъ грѣ́хъ.
7 Сѹ́ть богатѧ́ще себѐ, ничесѡ́же и҆мѹ́ще: и҆ сѹ́ть смирѧ́ющесѧ во мно́зѣ бога́тствѣ.
8 И҆збавле́нїе мѹ́жа дѹшѝ своѐ є҆мѹ̀ бога́тство: ни́щїй же не терпи́тъ преще́нїѧ.
9 Свѣ́тъ првднымъ всегда̀, свѣ́тъ же нечести́выхъ ѹ҆гаса́етъ: дѹ́ши льсти҄выѧ заблѹжда́ютъ во грѣсѣ́хъ, првднїи же ще́дрѧтъ и҆ ми́лѹютъ.
10 Ѕлы́й съ досажде́нїемъ твори́тъ ѕла҄ѧ: себе́ же зна́ющїи премѹ́дри (сѹ́ть).
11 И҆мѣ́нїе поспѣша́емо со беззако́нїемъ ѹ҆ма́лено быва́етъ, собира́ѧй же себѣ̀ со бл҃гоче́стїемъ и҆зѡби́лствовати бѹ́детъ: првдный ще́дритъ и҆ дае́тъ.
12 Лѹ́чше начина́ѧй помога́ти се́рдцемъ ѡ҆бѣща́ющагѡ и҆ въ наде́ждѹ ведѹ́щагѡ: дре́во бо жи́зни жела́нїе до́брое.
13 И҆́же презира́етъ ве́щь, презрѣ́нъ бѹ́детъ ѿ неѧ̀: а҆ боѧ́йсѧ за́повѣди, се́й здра́вствѹетъ.
14 Сы́нѹ лѹка́вомѹ ничто́же є҆́сть бла́го: рабѹ́ же мѹ́дрѹ благопоспѣ҄шна бѹ́дѹтъ дѣла̀, и҆ и҆спра́витсѧ пѹ́ть є҆гѡ̀.
15 Зако́нъ мѹ́дромѹ и҆сто́чникъ жи́зни: безѹ́мный же ѿ сѣ́ти ѹ҆́мретъ.
16 Ра́зѹмъ бл҃гъ дае́тъ блгдть: разѹмѣ́ти же зако́нъ, мы́сли є҆́сть благі́ѧ: пѹтїе́ же презира́ющихъ въ поги́бели.
17 Всѧ́къ хи́трый твори́тъ съ ра́зѹмомъ, безѹ́мный же простре́тъ свою̀ ѕло́бѹ.
18 Ца́рь де́рзостенъ впаде́тъ во ѕла҄ѧ, вѣ́стникъ же мѹ́дръ и҆зба́витъ є҆го̀.
19 Нищетѹ̀ и҆ безче́стїе ѿе́млетъ наказа́нїе: хранѧ́й же ѡ҆бличє́нїѧ просла́витсѧ.
20 Жела҄нїѧ бл҃гочести́выхъ наслажда́ютъ дѹ́шѹ, дѣла́ же нечести́выхъ дале́че ѿ ра́зѹма.
21 Ходѧ́й съ премѹ́дрыми премѹ́дръ бѹ́детъ, ходѧ́й же съ безѹ́мными позна́нъ бѹ́детъ.
22 Согрѣша́ющихъ пости́гнѹтъ ѕла҄ѧ, првдныхъ же пости́гнѹтъ бл҃га҄ѧ.
23 Бл҃гъ мѹ́жъ наслѣ́дитъ сы́ны сынѡ́въ: сокро́вищствѹетсѧ же првднымъ бога́тство нечести́выхъ.
24 Првднїи насладѧ́тсѧ въ бога́тствѣ лѣ҄та мнѡ́га: непра́веднїи же поги́бнѹтъ вско́рѣ.
25 И҆́же щади́тъ же́злъ (сво́й), ненави́дитъ сы́на своего̀: любѧ́й же наказѹ́етъ прилѣ́жнѡ.
26 Првдный ѩ҆ды́й насыща́етъ дѹ́шѹ свою̀: дѹ́шы же нечести́выхъ скѹ҄дны.
Нашли в тексте ошибку? Выделите её и нажмите: Ctrl + Enter

Притчи Соломона, 13 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.