1 Вины҄ и҆́щетъ мѹ́жъ хотѧ̀ ѿлѹчи́тисѧ ѿ дрѹгѡ́въ, на всѧ́ко же вре́мѧ поноси́мь бѹ́детъ.
2 Не тре́бѹетъ премѹ́дрости мѹ́жъ скѹдоѹ́менъ, занѐ па́че во́дитсѧ безѹ́мїемъ.
3 Є҆гда̀ прїи́детъ нечести́вый во глѹбинѹ̀ ѕѡ́лъ, неради́тъ: нахо́дитъ же є҆мѹ̀ безче́стїе и҆ поноше́нїе.
4 Вода̀ глѹбока̀ сло́во въ се́рдцы мѹ́жа, рѣка́ же и҆зска́чѹщи и҆ и҆сто́чникъ жи́зни.
5 Чѹди́тисѧ лицѹ̀ нечести́вагѡ не добро̀, нижѐ преподо́бно ѹ҆кланѧ́ти првдное на сѹдѣ̀.
6 Ѹ҆стнѣ̀ безѹ́мнагѡ приво́дѧтъ є҆го̀ на ѕло̀, ѹ҆ста́ же є҆гѡ̀ де́рзѡстнаѧ призыва́ютъ сме́рть.
7 Ѹ҆ста̀ безѹ́мнагѡ сокрѹше́нїе є҆мѹ̀, ѹ҆стнѣ́ же є҆гѡ̀ сѣ́ть дѹшѝ є҆гѡ̀.
8 Лѣни҄выѧ низлага́етъ стра́хъ: дѹ́ши же мѹже́й жена́мъ подо́бныхъ вза́лчѹтъ.
9 Не и҆сцѣлѧ́ѧй себѐ во свои́хъ дѣ́лѣхъ бра́тъ є҆́сть погѹблѧ́ющемѹ себѐ сама́го.
10 И҆з̾ вели́чества крѣ́пости и҆́мѧ гд҇не, къ немѹ́же притека́юще првдницы возно́сѧтсѧ.
11 И҆мѣ́нїе бога́тѹ мѹ́жѹ гра́дъ тве́рдъ, сла́ва же є҆гѡ̀ вельмѝ присѣнѧ́етъ.
12 Пре́жде сокрѹше́нїѧ возно́ситсѧ се́рдце мѹ́жѹ и҆ пре́жде сла́вы смирѧ́етсѧ.
13 И҆́же ѿвѣща́етъ сло́во пре́жде слы́шанїѧ, безѹ́мїе є҆мѹ̀ є҆́сть и҆ поноше́нїе.
14 Гнѣ́въ мѹ́жа ѹ҆кроща́етъ ра́бъ разѹ́мный: малодѹ́шна же человѣ́ка кто̀ стерпи́тъ;
15 Се́рдце разѹ́мнагѡ стѧ́жетъ чѹ́вствїе, ѹ҆шеса́ же мѹ́дрыхъ и҆́щѹтъ смы́сла.
16 Даѧ́нїе человѣ́ка распространѧ́етъ є҆го̀ и҆ съ си́льными посажда́етъ є҆го̀.
17 Првдный себє̀ сама́гѡ ѡ҆глаго́лникъ во первосло́вїи: є҆гда́ же приложи́тъ сѹпоста́тъ, ѡ҆блича́етсѧ.
18 Прекослѡ́вїѧ ѹ҆толѧ́етъ молчали́вый и҆ во власте́хъ ѡ҆предѣлѧ́етъ.
19 Бра́тъ ѿ бра́та помога́емь, ѩ҆́кѡ гра́дъ тве́рдъ и҆ высо́къ, ѹ҆крѣплѧ́етсѧ же ѩ҆́коже ѡ҆снова́ное ца́рство.
20 Ѿ плодѡ́въ ѹ҆́стъ мѹ́жъ насыща́етъ чре́во своѐ, и҆ ѿ плодѡ́въ ѹ҆сте́нъ свои́хъ насы́титсѧ.
21 Сме́рть и҆ живо́тъ въ рѹцѣ̀ ѧ҆зы́ка: ѹ҆держава́ющїи же є҆го̀ снѣдѧ́тъ плоды̀ є҆гѡ̀.
22 И҆́же ѡ҆брѣ́те женѹ̀ добрѹ̀, ѡ҆брѣ́те благода́ть, прїѧ́лъ же є҆́сть ѿ гд҇а тишинѹ̀.
23 И҆́же и҆згонѧ́етъ женѹ̀ до́брѹю, и҆згонѧ́етъ блага҄ѧ: держа́й же прелюбодѣ́йцѹ безѹ́менъ и҆ нечести́въ.
24 Съ молє́нїи глаго́летъ ѹ҆бо́гїй, бога́тый же ѿвѣща́етъ же́стокѡ.
25 Мѹ́жъ любо́венъ къ дрѹ́жбѣ, и҆ є҆́сть дрѹ́гъ прилѣпи́выйсѧ па́че бра́та.
Нашли в тексте ошибку? Выделите её и нажмите:
Ctrl + Enter
Притчи Соломона, 18 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784