1 Бѣ́гаетъ нечести́вый ни є҆ди́номѹ же гонѧ́щѹ, првдный же ѩ҆́кѡ ле́въ ѹ҆пова́ѧ.
2 За грѣхѝ нечести́выхъ сѹ́дове востаю́тъ: мѹ́жъ же хи́трый ѹ҆гаси́тъ ѧ҆̀.
3 Проде́рзый въ нече́стїихъ ѡ҆клевета́етъ ни́щыѧ, ѩ҆́коже до́ждь си́льный не поле́зенъ:
4 та́кѡ ѡ҆ста́вившїи зако́нъ хва́лѧтъ нече́стїе, лю́бѧщїи же зако́нъ ѡ҆гражда́ютъ себѣ̀ стѣ́нѹ.
5 Мѹ́жїе ѕлі́и не ѹ҆разѹмѣ́ютъ сѹда̀, и҆́щѹщїи же гд҇а ѹ҆разѹмѣ́ютъ ѡ҆ все́мъ.
6 Лѹ́чше ни́щь ходѧ́й во и҆́стинѣ, не́жели бога́тъ ло́жь.
7 Храни́тъ зако́нъ сы́нъ разѹ́мный: а҆ и҆́же пасе́тъ несы́тость, безче́ститъ ѻ҆тца̀ своего̀.
8 Ѹ҆множа́ѧй бога́тство своѐ съ ли́хвами и҆ прибы҄тки ми́лѹющемѹ ни́щыѧ собира́етъ є҆̀.
9 Ѹ҆кланѧ́ѧй ѹ҆́хо своѐ не послѹ́шати зако́на и҆ са́мъ моли́твѹ свою̀ ѡ҆мерзи́лъ.
10 И҆́же льсти́тъ пра҄выѧ на пѹтѝ ѕлѣ́мъ, во и҆стлѣ́нїе са́мъ впаде́тъ: беззако́ннїи же минѹ́ютъ блага҄ѧ и҆ не вни́дѹтъ въ нѧ̀.
11 Премѹ́дръ ѹ҆ себє̀ мѹ́жъ бога́тый, ѹ҆бо́гїй же разѹми́въ пре́зритъ є҆го̀.
12 По́мощїю првдныхъ мно́га быва́етъ сла́ва, на мѣ́стѣхъ же нечести́выхъ погиба́ютъ человѣ́цы.
13 Покрыва́ѧй нече́стїе своѐ не ѹ҆спѣ́етъ во блага҄ѧ, повѣ́даѧ же ѡ҆бличє́нїѧ возлю́бленъ бѹ́детъ.
14 Блаже́нъ мѹ́жъ, и҆́же бои́тсѧ всѣ́хъ за благоговѣ́нїе, а҆ жестосе́рдый впа́даетъ во ѕла҄ѧ.
15 Ле́въ а҆́лченъ и҆ во́лкъ жа́жденъ, и҆́же тѷра́нствѹетъ {мѹчи́тельски ѡ҆блада́етъ}, ни́щь сы́й, над̾ ѩ҆зы́комъ ѹ҆бо́гимъ.
16 Ца́рь скѹ́денъ ѹ҆ро́комъ вели́къ клеветни́къ (быва́етъ), а҆ ненави́дѧй непра҄вды до́лгѡ лѣ́тъ поживе́тъ.
17 Мѹ́жа, и҆́же въ винѣ̀ сме́ртнѣ, вырѹча́ѧй бѣгле́цъ бѹ́детъ, а҆ не ѹ҆твержде́нъ. Наказѹ́й сы́на, и҆ возлю́битъ тѧ̀ и҆ да́стъ лѣ́потѹ твое́й дѹшѝ, не послѹ́шаетъ ѩ҆зы́ка законопрестѹ́пна.
18 Ходѧ́й пра́веднѡ по́мощь прїи́метъ, ходѧ́й же въ стро́пѡтны пѹти҄ ѹ҆вѧ́знетъ.
19 Дѣ́лаѧй свою̀ зе́млю насы́титсѧ хлѣ́бѡвъ, гонѧ́й же пра́здность насы́титсѧ нищеты̀.
20 Мѹ́жъ вѣ́ры досто́йный мно́гѡ благослови́тсѧ, ѕлы́й же не без̾ мѹче́нїѧ бѹ́детъ.
21 И҆́же не срамлѧ́етсѧ лица̀ првдныхъ, не бла́гъ: таковы́й за ѹ҆крѹ́хъ хлѣ́ба прода́стъ мѹ́жа.
22 Тщи́тсѧ ѡ҆богати́тисѧ мѹ́жъ зави́дливъ, и҆ не вѣ́сть, ѩ҆́кѡ ми́лостивый воз̾ѡблада́етъ и҆́мъ.
23 Ѡ҆блича́ѧй человѣ́чы пѹти҄ благода́ть и҆́мать па́че ѧ҆зы́комъ ласка́ющагѡ.
24 И҆́же ѿверга́етъ ѻ҆тца̀ и҆лѝ ма́терь и҆ мни́тсѧ не согрѣша́ти, се́й соприча́стникъ є҆́сть мѹ́жѹ нечести́вѹ.
25 Невѣ́рный мѹ́жъ сѹ́дитъ тѹ́не, а҆ и҆́же надѣ́етсѧ на гд҇а, въ прилѣжа́нїи бѹ́детъ.
26 И҆́же надѣ́етсѧ на де́рзо се́рдце, таковы́й безѹ́менъ: а҆ и҆́же хо́дитъ въ премѹ́дрости, спасе́тсѧ.
27 И҆́же дае́тъ ѹ҆бѡ́гимъ, не ѡ҆скѹдѣ́етъ: а҆ и҆́же ѿвраща́етъ ѻ҆́ко своѐ, въ скѹ́дости бѹ́детъ мно́зѣ.
28 На мѣ́стѣхъ нечести́выхъ стенѧ́тъ првднїи, въ поги́бели же и҆́хъ ѹ҆мно́жатсѧ првднїи.
Нашли в тексте ошибку? Выделите её и нажмите: Ctrl + Enter

Притчи Соломона, 28 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.