1 Тѣ́мже ты̀ премѹ́дрость проповѣ́ждь, да ра́зѹмъ послѹ́шаетъ тебѐ.
2 На высо́кихъ бо крае́хъ є҆́сть, посредѣ́ же сте́зь стои́тъ:
3 при вратѣ́хъ бо си́льныхъ присѣди́тъ, во вхо́дѣхъ же пое́тсѧ.
4 Ва́съ, ѽ, человѣ́цы, молю̀, и҆ вдаю̀ мо́й гла́съ сынѡ́мъ человѣ́чєскимъ.
5 Ѹ҆разѹмѣ́йте, неѕло́бивїи, кова́рство, ненака́заннїи же, приложи́те се́рдце.
6 Послѹ́шайте менѐ: честна҄ѧ бо рекѹ̀ и҆ и҆знесѹ̀ ѿ ѹ҆сте́нъ пра҄ваѧ.
7 ѩ҆́кѡ и҆́стинѣ поѹчи́тсѧ горта́нь мо́й, мє́рзки же предо мно́ю ѹ҆стны̀ лжи҄выѧ.
8 Съ пра́вдою всѝ глаго́лы ѹ҆́стъ мои́хъ, ничто́же въ ни́хъ стро́потно, нижѐ развраще́нно.
9 Всѧ҄ пра҄ва разѹмѣва́ющымъ, и҆ пра҄ва ѡ҆брѣта́ющымъ ра́зѹмъ.
10 Прїими́те наказа́нїе, а҆ не сребро̀, и҆ ра́зѹмъ па́че зла́та и҆скѹше́на: и҆збира́йте же вѣ́дѣнїе па́че зла́та чи́ста.
11 Лѹ́чши бо премѹ́дрость ка́менїй многоцѣ́нныхъ, всѧ́кое же честно́е недосто́йно є҆ѧ̀ є҆́сть.
12 А҆́зъ премѹ́дрость всели́хъ совѣ́тъ, и҆ ра́зѹмъ и҆ смы́слъ а҆́зъ призва́хъ.
13 Стра́хъ гд҇ень ненави́дитъ непра́вды, досажде́нїѧ же и҆ горды́ни, и҆ пѹти҄ лѹка́выхъ: возненави́дѣхъ же а҆́зъ развращє́нныѧ пѹти҄ ѕлы́хъ.
14 Мо́й совѣ́тъ и҆ ѹ҆твержде́нїе, мо́й ра́зѹмъ, моѧ́ же крѣ́пость.
15 Мно́ю ца́рїе ца́рствѹютъ, и҆ си́льнїи пи́шѹтъ пра́вдѹ:
16 мно́ю вельмѡ́жи велича́ютсѧ, и҆ власти́тилїе мно́ю держа́тъ зе́млю.
17 А҆́зъ лю́бѧщыѧ мѧ̀ люблю̀, и҆́щѹщїи же менѐ ѡ҆брѧ́щѹтъ блгдть.
18 Бога́тство и҆ сла́ва моѧ̀ є҆́сть, и҆ стѧжа́нїе мно́гихъ и҆ пра́вда.
19 Лѹ́чше є҆́сть плоди́ти менѐ, па́че зла́та и҆ ка́менїѧ дра́га: мои́ же плоды̀ лѹ́чше сребра̀ и҆збра́нна.
20 Въ пѹте́хъ пра́вды хождѹ̀ и҆ посредѣ̀ сте́зь ѡ҆правда́нїѧ живѹ̀,
21 да раздѣлю̀ лю́бѧщымъ мѧ̀ и҆мѣ́нїе, и҆ сокрѡ́вища и҆́хъ и҆спо́лню благи́хъ. А҆́ще возвѣщѹ̀ ва́мъ быва҄ющаѧ на всѧ́къ де́нь, помѧнѹ̀, ѩ҆̀же ѿ вѣ́ка, и҆счестѝ.
22 Гд҇ь созда́ мѧ {Є҆вр.: стѧжа́ мѧ.} нача́ло пѹті́й свои́хъ въ дѣла̀ своѧ҄,
23 пре́жде вѣ҄къ ѡ҆снова́ мѧ, въ нача́лѣ, пре́жде не́же зе́млю сотвори́ти,
24 и҆ пре́жде не́же бє́здны содѣ́лати, пре́жде не́же произы́ти и҆сто́чникѡмъ во́дъ,
25 пре́жде не́же гора́мъ водрѹзи́тисѧ, пре́жде же всѣ́хъ холмѡ́въ ражда́етъ мѧ̀.
26 Гд҇ь сотворѝ страны҄ и҆ ненаселє́нныѧ, и҆ концы҄ населє́нныѧ поднебе́сныѧ.
27 Є҆гда̀ гото́вѧше не́бо, съ ни́мъ бѣ́хъ, и҆ є҆гда̀ ѿлѹча́ше пр҇то́лъ сво́й на вѣ́трѣхъ,
28 и҆ є҆гда̀ крѣ҄пки творѧ́ше вы҄шнїѧ ѡ҆́блаки, и҆ є҆гда̀ твє́рды полага́ше и҆сто́чники поднебе́сныѧ,
29 и҆ є҆гда̀ полага́ше мо́рю предѣ́лъ є҆гѡ̀, да во́ды не ми́мѡ и҆́дѹтъ ѹ҆́стъ є҆гѡ̀, и҆ крѣ҄пка творѧ́ше ѡ҆снова҄нїѧ землѝ, бѣ́хъ при не́мъ ѹ҆строѧ́ющи.
30 А҆́зъ бѣ́хъ, ѡ҆ не́йже ра́довашесѧ, на всѧ́къ же де́нь веселѧ́хсѧ пред̾ лице́мъ є҆гѡ̀ на всѧ́ко вре́мѧ,
31 є҆гда̀ веселѧ́шесѧ вселе́ннѹю соверши́въ, и҆ веселѧ́шесѧ ѡ҆ сынѣ́хъ человѣ́ческихъ.
32 Нн҃ѣ ѹ҆̀бо, сы́не, послѹ́шай менѐ: и҆ блаже́ни, и҆̀же пѹти҄ моѧ҄ сохранѧ́тъ.
33 Ѹ҆слы́шите премѹ́дрость, и҆ ѹ҆мѹдри́тесѧ, и҆ не ѿмещи́те.
34 Блаже́нъ мѹ́жъ, и҆́же послѹ́шаетъ менѐ, и҆ человѣ́къ, и҆́же пѹти҄ моѧ҄ сохрани́тъ, бдѧ́й при мои́хъ две́рехъ пр҇нѡ, соблюда́ѧй пра́ги мои́хъ вхо́дѡвъ:
35 и҆схо́ди бо моѝ и҆схо́ди живота̀, и҆ ѹ҆готовлѧ́етсѧ хотѣ́нїе ѿ гд҇а:
36 согрѣша́ющїи же въ мѧ̀ нече́ствѹютъ на своѧ҄ дѹ́ши, и҆ ненави́дѧщїи мѧ̀ лю́бѧтъ сме́рть.
Нашли в тексте ошибку? Выделите её и нажмите: Ctrl + Enter

Притчи Соломона, 8 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.