1 Послѹ́шайте, дѣ́ти, наказа́нїѧ ѻ҆́тча и҆ внемли́те разѹмѣ́ти помышле́нїе,
2 да́ръ бо бл҃гі́й да́рѹю ва́мъ: моегѡ̀ зако́на не ѡ҆ставлѧ́йте.
3 Сы́нъ бо бы́хъ и҆ а҆́зъ ѻ҆тцѹ̀ послѹшли́вый, и҆ люби́мый пред̾ лице́мъ ма́тере,
4 и҆̀же глаго́лаша и҆ ѹ҆чи́ша мѧ̀: да ѹ҆твержда́етсѧ на́ше сло́во въ твое́мъ се́рдцы: хранѝ за́пѡвѣди, не забыва́й:
5 стѧжѝ премѹ́дрость, стѧжѝ ра́зѹмъ: не забѹ́ди, нижѐ пре́зри рѣчє́нїѧ мои́хъ ѹ҆́стъ, нижѐ ѹ҆клони́сѧ ѿ глагѡ́лъ ѹ҆́стъ мои́хъ.
6 Не ѡ҆ста́ви є҆ѧ̀, и҆ и҆́метсѧ тебє̀: возжелѣ́й є҆ѧ̀, и҆ соблюде́тъ тѧ̀.
7 Нача́ло премѹ́дрости: стѧжа́ти премѹ́дрость, и҆ во все́мъ стѧжа́нїи твое́мъ стѧжѝ ра́зѹмъ.
8 Ѡ҆градѝ ю҆̀, и҆ вознесе́тъ тѧ̀: почтѝ ю҆̀, да тѧ̀ ѡ҆б̾и́метъ,
9 да да́стъ главѣ̀ твое́й вѣне́цъ благода́тей, вѣнце́мъ же сла́дости защи́титъ тѧ̀.
10 Слы́ши, сы́не, и҆ прїимѝ моѧ҄ словеса̀, и҆ ѹ҆мно́жатсѧ лѣ҄та живота̀ твоегѡ̀, да тѝ бѹ́дѹтъ мно́зи пѹтїѐ житїѧ̀.
11 Пѹтє́мъ бо премѹ́дрости ѹ҆чѹ́ тѧ, наставлѧ́ю же тебѐ на течє́нїѧ пра҄ваѧ:
12 а҆́ще бо хо́диши, не за́пнѹтсѧ стѡпы̀ твоѧ҄: а҆́ще ли тече́ши, не ѹ҆трѹди́шисѧ.
13 И҆ми́сѧ моегѡ̀ наказа́нїѧ, не ѡ҆ста́ви, но сохранѝ є҆̀ себѣ̀ въ жи́знь твою̀.
14 На пѹти҄ нечести́выхъ не и҆дѝ, нижѐ возревнѹ́й пѹтє́мъ законопрестѹ́пныхъ.
15 На не́мже а҆́ще мѣ́стѣ вѡ́ѧ соберѹ́тъ, не и҆дѝ та́мѡ: ѹ҆клони́сѧ же ѿ ни́хъ и҆ и҆змѣнѝ:
16 не ѹ҆́снѹтъ бо, а҆́ще ѕла̀ не сотворѧ́тъ: ѿи́метсѧ со́нъ ѿ ни́хъ, и҆ не спѧ́тъ:
17 ті́и бо пита́ютсѧ пи́щею нече́стїѧ, вїно́мъ же законопрестѹ́пнымъ ѹ҆пива́ютсѧ.
18 Пѹті́е же првдныхъ подо́бнѣ свѣ́тѹ свѣ́тѧтсѧ: предхо́дѧтъ и҆ просвѣща́ютъ, до́ндеже и҆спра́витсѧ де́нь.
19 Пѹтїе́ же нечести́выхъ те́мни: не вѣ́дѧтъ, ка́кѡ претыка́ютсѧ.
20 Сы́не, мои҄мъ глаго́лѡмъ внима́й, къ мои҄мъ же словесє́мъ прилага́й ѹ҆́хо твоѐ:
21 да не ѡ҆скѹдѣ́ютъ тѝ и҆сто́чницы твоѝ, хранѝ ѧ҆̀ въ се́рдцы твое́мъ:
22 живо́тъ бо сѹ́ть всѣ҄мъ ѡ҆брѣта́ющымъ ѧ҆̀ и҆ все́й пло́ти и҆́хъ и҆сцѣле́нїе.
23 Всѧ́цѣмъ хране́нїемъ блюдѝ твоѐ се́рдце: ѿ си́хъ бо и҆схѡ́дища живота̀.
24 Ѿимѝ ѿ себє̀ стропти҄ва ѹ҆ста̀, и҆ ѡ҆би҄дливы ѹ҆стнѣ̀ дале́че ѿ тебє̀ ѿри́ни.
25 Ѻ҆́чи твоѝ пра́вѡ да зрѧ́тъ, и҆ вѣ҄жди твоѝ да помава́ютъ пра́вєднаѧ.
26 Пра҄ва течє́нїѧ творѝ твои́ма нога́ма и҆ пѹти҄ твоѧ҄ и҆справлѧ́й.
27 Не ѹ҆клони́сѧ ни на де́сно, ни на шѹ́е: ѿврати́ же но́гѹ твою̀ ѿ пѹтѝ ѕла̀:
28 пѹти҄ бо десны҄ѧ вѣ́сть гд҇ь, развраще́ни же сѹ́ть, и҆̀же ѡ҆шѹ́юю.
29 То́й же пра҄ва сотвори́тъ течє́нїѧ твоѧ҄, и҆ хождє́нїѧ твоѧ҄ въ ми́рѣ поспѣши́тъ.
Нашли в тексте ошибку? Выделите её и нажмите: Ctrl + Enter

Притчи Соломона, 4 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.