1 Лѹ́чше и҆́мѧ до́брое, не́же бога́тство мно́го, па́че же сребра̀ и҆ зла́та блгдть бл҃га́ѧ.
2 Бога́тъ и҆ ни́щь срѣто́ста дрѹ́гъ дрѹ́га, ѻ҆бои́хъ же гд҇ь сотворѝ.
3 Хѹдо́гъ, ви́дѣвъ лѹка́ваго мѹ́чима крѣ́пкѡ, са́мъ наказѹ́етсѧ: безѹ́мнїи же мимоше́дше ѡ҆тщети́шасѧ.
4 Ро́дъ премѹ́дрости стра́хъ гд҇ень, и҆ бога́тство и҆ сла́ва и҆ живо́тъ.
5 Волчцы̀ и҆ сѣ҄ти на пѹте́хъ стро́потныхъ, хранѧ́й же свою̀ дѹ́шѹ и҆збѣжи́тъ и҆̀хъ.
6 Бога́тїи ѹ҆бо́гими и҆́мѹтъ ѡ҆блада́ти,
7 и҆ рабѝ свои҄мъ господе́мъ взаи́мъ дадѹ́тъ.
8 Сѣ́ѧвый ѕла҄ѧ по́жнетъ ѕла҄ѧ, ѩ҆́звѹ же дѣ́лъ свои́хъ соверши́тъ.
9 Мѹ́жа ти́ха и҆ даѧ́телѧ лю́битъ гд҇ь, сѹетѹ́ же дѣ́лъ є҆гѡ̀ сконча́етъ.
10 Ми́лѹѧй ни́щаго са́мъ препита́етсѧ: ѿ свои́хъ бо хлѣ́бѡвъ дадѐ ѹ҆бо́гомѹ. Побѣ́дѹ и҆ че́сть ѹ҆строѧ́етъ даѧ́й да́ры, ѻ҆ба́че дѹ́шѹ погѹблѧ́етъ стѧжа́вшихъ.
11 И҆зженѝ ѿ со́нмища гѹби́телѧ, и҆ и҆зы́детъ съ ни́мъ прѣ́нїе: є҆гда́ бо сѧ́детъ въ со́нмищи, всѣ́хъ безче́ститъ.
12 Лю́битъ гд҇ь прпдбнаѧ сердца̀, прїѧ́тни же є҆мѹ̀ всѝ непоро́чнїи въ пѹте́хъ свои́хъ: ѹ҆стна́ма пасе́тъ ца́рь (лю́ди своѧ҄).
13 Ѻ҆́чи гд҇ни соблюда́ютъ чѹ́вство: презира́етъ словеса̀ законопрестѹ́пный.
14 Вины̀ и҆́щетъ и҆ глаго́летъ лѣни́вый: ле́въ на стезѧ́хъ, на пѹте́хъ же разбѡ́йницы.
15 ѩ҆́ма глѹбока̀ ѹ҆ста̀ законопрестѹ́пныхъ: возненави́дѣный же ѿ гд҇а впаде́тсѧ въ ню̀. Сѹ́ть пѹтїѐ ѕлі́и пред̾ мѹ́жемъ, и҆ не лю́битъ возврати́тисѧ ѿ ни́хъ: возврати́тисѧ же подоба́етъ ѿ пѹтѝ стро́потна и҆ ѕла́гѡ.
16 Безѹ́мїе ви́ситъ на се́рдцы ю҆́нагѡ: же́злъ же и҆ наказа́нїе дале́че (ѿго́нитъ) ѿ негѡ̀.
17 Ѡ҆би́дѧй ѹ҆бо́гаго мнѡ́гаѧ себѣ̀ ѕла҄ твори́тъ, дае́тъ же бога́томѹ во ѡ҆скѹдѣ́нїе (себѣ̀).
18 Ко словесє́мъ мѹ́дрыхъ прилага́й твоѐ ѹ҆́хо, и҆ ѹ҆слы́ши моѧ҄ словеса̀: свое́ же се́рдце ѹ҆твердѝ (къ ни҄мъ), да разѹмѣ́еши, ѩ҆́кѡ дѡбра̀ сѹ́ть.
19 И҆ а҆́ще вложи́ши ѧ҆̀ въ се́рдце твоѐ, возвеселѧ́тъ тебѐ кѹ́пнѡ во твои́хъ ѹ҆стнѣ́хъ.
20 Да бѹ́детъ тѝ на гд҇а наде́жда, и҆ пока́жетъ тѝ пѹ́ть сво́й.
21 Ты́ же напишѝ ѧ҆̀ себѣ̀ три́жды, на совѣ́тъ и҆ смы́слъ и҆ ра́зѹмъ, на широтѣ̀ се́рдца твоегѡ̀: ѹ҆чѹ́ бо тѧ̀ и҆́стинномѹ словесѝ, и҆ ра́зѹма блага́гѡ слѹ́шати на ѿвѣ́ты словесє́мъ и҆́стиннымъ предлага́ємымъ тебѣ̀.
22 Не наси́лствѹй ни́щаго, занѐ ѹ҆бо́гъ є҆́сть, и҆ не досажда́й немощно́мѹ во вратѣ́хъ:
23 гд҇ь бо и҆́мать сѹди́ти є҆гѡ̀ сѹ́дъ, и҆ и҆зба́виши твою̀ безбѣ́днѹю дѹ́шѹ.
24 Не быва́й дрѹ́гъ мѹ́жѹ гнѣвли́вѹ и҆ со дрѹ́гомъ жестокосе́рдымъ не соводворѧ́йсѧ:
25 да не когда̀ наѹчи́шисѧ пѹтє́мъ є҆гѡ̀ и҆ прїи́меши тене́та дѹшѝ твое́й.
26 Не вдава́йсѧ въ порѹче́нїе, стыдѧ́сѧ лица̀:
27 є҆гда́ бо не бѹ́деши и҆мѣ́ти чи́мъ и҆скѹпи́тисѧ, во́змѹтъ посте́лю, ѩ҆́же под̾ ре́бры твои́ми.
28 Не прелага́й предѣ҄лъ вѣ́чныхъ, ѩ҆̀же положи́ша ѻ҆тцы̀ твоѝ.
29 Прозри́телнѹ человѣ́кѹ и҆ ѻ҆́стромѹ въ дѣ́лѣхъ свои́хъ пред̾ царьмѝ подоба́етъ стоѧ́ти, и҆ не стоѧ́ти пред̾ мѹжмѝ просты́ми.
Нашли в тексте ошибку? Выделите её и нажмите: Ctrl + Enter

Притчи Соломона, 22 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.