1 Сы́не, мое́й премѹ́дрости внима́й, къ мои҄мъ же словесє́мъ прилага́й ѹ҆́хо твоѐ,
2 да сохрани́ши мы́сль бл҃гѹ́ю: чѹ́вство же мои́хъ ѹ҆сте́нъ заповѣ́даетъ тебѣ̀.
3 Не внима́й ѕлѣ́й женѣ̀: ме́дъ бо ка́плетъ ѿ ѹ҆сте́нъ жены̀ блѹдни́цы, ѩ҆́же на вре́мѧ наслажда́етъ тво́й горта́нь:
4 послѣди́ же горча́е же́лчи ѡ҆брѧ́щеши, и҆ и҆з̾ѡщре́ннѹ па́че меча̀ ѻ҆бою́дѹ ѻ҆́стра:
5 безѹ́мїѧ бо но́зѣ низво́дѧтъ ѹ҆потреблѧ́ющихъ ю҆̀ со сме́ртїю во а҆́дъ, стѡпы́ же є҆ѧ̀ не ѹ҆твержда́ютсѧ:
6 на пѹти҄ бо живѡ́тныѧ не нахо́дитъ, заблѹждє́нна же течє́нїѧ є҆ѧ̀ и҆ неблагоразѹ҄мна.
7 Нн҃ѣ ѹ҆̀бо, сы́не, послѹ́шай менѐ и҆ не ѿриновє́нна сотворѝ моѧ҄ словеса̀:
8 дале́че ѿ неѧ̀ сотворѝ пѹ́ть тво́й и҆ не прибли́жисѧ ко две́ремъ домѡ́въ є҆ѧ̀,
9 да не преда́стъ и҆ны҄мъ живота̀ твоегѡ̀, и҆ твоегѡ̀ житїѧ̀ неми́лѡстивымъ,
10 да не насы́тѧтсѧ и҆ні́и твоеѧ̀ крѣ́пости, твои́ же трѹды̀ въ до́мы чѹжды҄ѧ вни́дѹтъ,
11 и҆ раска́ешисѧ на послѣ́докъ тво́й, є҆гда̀ и҆стрѹ́тсѧ плѡ́ти тѣ́ла твоегѡ̀, и҆ рече́ши:
12 ка́кѡ возненави́дѣхъ наказа́нїе, и҆ ѿ ѡ҆бличе́нїй ѹ҆клони́сѧ се́рдце моѐ;
13 не послѹ́шахъ гла́са наказѹ́ющагѡ мѧ̀, и҆ ко ѹ҆ча́щемѹ мѧ̀ не прилага́хъ ѹ҆́ха моегѡ̀:
14 вма́лѣ бѣ́хъ во всѧ́цѣмъ ѕлѣ̀ посредѣ̀ цр҃кве и҆ со́нмища.
15 Сы́не, пі́й во́ды ѿ свои́хъ сосѹ́дѡвъ и҆ ѿ твои́хъ кладенцє́въ и҆сто́чника:
16 да преизлива́ютсѧ тебѣ̀ во́ды ѿ твоегѡ̀ и҆сто́чника, во твоѧ҄ же пѹти҄ да происхо́дѧтъ твоѧ҄ во́ды.
17 Да бѹ́дѹтъ тебѣ̀ є҆ди́номѹ и҆мѣ҄нїѧ, и҆ да никто́же чѹ́ждь причасти́тсѧ тебѣ̀.
18 И҆сто́чникъ твоеѧ̀ воды̀ да бѹ́детъ тебѣ̀ тво́й, и҆ весели́сѧ съ жено́ю, ѩ҆́же ѿ ю҆́ности твоеѧ̀:
19 є҆ле́нь любвѐ и҆ жребѧ̀ твои́хъ благода́тей да бесѣ́дѹетъ тебѣ̀, твоѧ́ же да пред̾и́детъ тебѣ̀ и҆ да бѹ́детъ съ тобо́ю во всѧ́ко вре́мѧ: въ дрѹ́жбѣ бо сеѧ̀ спребыва́ѧй ѹ҆мно́женъ бѹ́деши.
20 Не мно́гъ бѹ́ди къ чѹжде́й, нижѐ ѡ҆б̾ѧ́тъ бѹ́ди ѡ҆б̾ѧ҄тїи не твоеѧ̀:
21 пред̾ ѻ҆чи́ма бо сѹ́ть бж҃їима пѹтїѐ мѹ́жа, всѧ҄ же течє́нїѧ є҆гѡ̀ назира́етъ.
22 Законопрестѹплє́нїѧ мѹ́жа ѹ҆ловлѧ́ютъ: плени́цами же свои́хъ грѣхѡ́въ кі́йждо затѧза́етсѧ.
23 Се́й скончава́етсѧ съ ненака́занными: ѿ мно́жества же своегѡ̀ житїѧ̀ и҆зве́ржетсѧ и҆ погиба́етъ за безѹ́мїе.
Нашли в тексте ошибку? Выделите её и нажмите:
Ctrl + Enter
Притчи Соломона, 5 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784