1 Тэсалонцам 5 глава

Першае пасланьне да Тэсалонцаў Апостала Паўла
Пераклад Антонія Бокуна → Пераклад Васіля Сёмухі

Адносна часоў і пораў, браты, няма патрэбы пісаць да вас,

А пра часы і часіны няма патрэбы пісаць вам, браты,

бо вы самі дакладна ведаеце, што дзень Госпадаў гэтак прыйдзе, як злодзей уначы.

бо самі вы дакладна ведаеце, што дзень Гасподні так прыйдзе, як злодзей уначы.

Калі вось будуць гаварыць: «Супакой і бясьпека», тады неспадзявана прыйдзе на іх зьнішчэньне, быццам мукі радзін на цяжарную, і яны не ўцякуць.

Бо, калі будуць казаць: «мір і бясьпека», тады зьнянацку спасьцігне іх пагібель, як мука родамі спасьцігае цяжарную, і ня ўнікнуць.

Вы ж, браты, ня ў цемры, каб дзень гэты захапіў вас, як злодзей:

Але вы, браты, ня ў цемры, каб дзень застаў вас, як злодзей;

усе вы — сыны сьвятла і сыны дня, мы не належым ані ночы, ані цемры.

бо ўсе вы — сыны сьвятла і сыны дня: мы — ня сыны ночы, ні цемры.

Дык ня будзем спаць, як іншыя, але чувайма і будзьма пільнымі,

Дык вось, ня будзем спаць, як іншыя, а будзем чуваць і цьвярозіцца.

бо тыя, што сьпяць, уначы сьпяць, і тыя, што ўпіваюцца, уначы ўпіваюцца.

Бо, хто сьпіць, сьпіць уночы, і хто ўпіваецца, упіваецца ўночы.

Мы ж, якія належым дню, будзьма пільнымі, апрануўшы панцыр веры і любові і шалом надзеі збаўленьня,

Мы ж як сыны дня, будзем цьвярозіцца, апрануўшыся ў браню веры і любові і ў шалом надзеі на збавеньне,

бо Бог не прызначыў нас на гнеў, але на атрыманьне збаўленьня праз Госпада нашага Ісуса Хрыста,

таму што Бог вызначыў нас не на гнеў, а на атрыманьне збавеньня праз Госпада нашага Ісуса Хрыста,

Які памёр за нас, каб мы, ці чуваем, ці сьпім, з Ім разам жылі.

Які памёр за нас, каб мы, ці то чуваем, ці то сьпім, жылі разам зь Ім.

Дзеля гэтага пацяшайце сябе ўзаемна і збудоўвайце адзін аднаго, як вы і робіце.

Таму ўмаўляйце адно аднаго і навучайце адно аднаго, як вы і робіце.

Просім жа вас, браты, ведайце тых, якія працуюць у вас, і кіруюць вамі ў Госпадзе, і настаўляюць вас,

Просім жа вас, браты, паважаць тых, якія працуюць у вас, і якія пастаўлены над вамі ў Госпадзе, і якія на розум вас настаўляюць,

і шануйце іх вельмі высока ў любові дзеля працы іхняй; жывіце ў згодзе між сабою.

і шанаваць іх пераважна зь любоўю за справу іхнюю; будзьце ў згодзе паміж сабою.

Молім вас таксама, браты, настаўляйце свавольных, пацяшайце маладушных, падтрымлівайце слабых, будзьце доўгацярплівымі да ўсіх.

Молім вас таксама, браты, настаўляйце на розум бясчынцаў, суцяшайце маладушных, падтрымлівайце слабых, будзьце цярплівыя з усімі.

Глядзіце, каб ніхто нікому не аддаваў ліхам за ліха, але заўсёды імкніцеся да дабра і адзін для аднаго, і для ўсіх.

Глядзеце, каб хто каму не плаціў злом за зло; а заўсёды шукайце дабра і адно аднаму і ўсім.

Заўсёды радуйцеся.

Несупынна маліцеся.

Бесьперастанку малецеся.

За ўсё дзякуйце, бо такая для вас воля Божая ў Хрысьце Ісусе.

За ўсё дзякуйце: бо такая за вас воля Божая ў Ісусе Хрысьце.

Духа не гасіце.

Духа не гасеце.

Прароцтвамі не пагарджайце.

Прароцтваў не прыніжайце.

Усё выпрабоўвайце; добрага трымайцеся.

Усё выпрабоўвайце, добрага трымайцеся.

Высьцерагайцеся ад усякага роду зла.

Ухіляйцеся ад ліхаты ў любым яе выглядзе.

Сам жа Бог супакою няхай асьвяціць вас у-ва ўсёй поўні, і ўвесь ваш дух, і душа, і цела няхай захаваюцца без заганы ў прыйсьце Госпада нашага Ісуса Хрыста.

Сам жа Бог міру няхай асьвеціць вас ва ўсёй поўніцы, і ваш дух і душа і цела ва ўсёй цэласьці няхай захаваюцца без пахібы ў прышэсьце Госпада нашага Ісуса Хрыста.

Верны Той, Які вас паклікаў; Ён і зробіць [гэта].

Верны Той, Хто заклікае вас, Які і зьдзейсьніць гэта.

Браты! Маліцеся за нас!

Браты! малецеся за нас.

Прывітайце ўсіх братоў пацалункам сьвятым.

Вітайце ўсіх братоў цалаваньнем сьвятым.

Заклінаю вас Госпадам прачытаць гэтае пасланьне ўсім сьвятым братам.

Заклікаю вас Госпадам прачытаць гэта пасланьне ўсім сьвятым братам.

Ласка Госпада нашага Ісуса Хрыста з вамі. Амэн.

Мілата Госпада нашага Ісуса Хрыста з вамі. Амін.

« 4 глава 1 глава »