1 Возопі́й крѣ́постїю и҆ не пощадѝ: ѩ҆́кѡ трѹбѹ̀ возвы́си гла́съ тво́й и҆ возвѣстѝ лю́демъ мои҄мъ грѣхѝ и҆́хъ и҆ до́мѹ ї҆а́кѡвлю беззакѡ́нїѧ и҆́хъ.
2 Менѐ де́нь ѿ днѐ и҆́щѹтъ и҆ разѹмѣ́ти пѹти҄ моѧ҄ жела́ютъ, ѩ҆́кѡ лю́дїе пра́вдѹ сотвори́вшїи и҆ сѹда̀ бг҃а своегѡ̀ не ѡ҆ста́вившїи: про́сѧтъ нн҃ѣ ѹ҆ менє̀ сѹда̀ првдна и҆ прибли́житисѧ ко гд҇ѹ жела́ютъ, глаго́люще:
3 что̀ ѩ҆́кѡ пости́хомсѧ, и҆ не ѹ҆ви́дѣлъ є҆сѝ; смири́хомъ дѹ́шы на́шѧ, и҆ не ѹ҆вѣ́дѣлъ є҆сѝ; Во дни҄ бо поще́нїй ва́шихъ ѡ҆брѣта́ете вѡ́ли ва́шѧ, и҆ всѧ҄ подрѹ҄чныѧ ва́шѧ томитѐ:
4 а҆́ще въ сѹдѣ́хъ и҆ сва́рѣхъ постите́сѧ и҆ бїе́те пѧстьмѝ смире́ннаго, вскѹ́ю мнѣ̀ постите́сѧ ѩ҆́коже дне́сь, є҆́же ѹ҆слы́шанѹ бы́ти съ во́племъ гла́сѹ ва́шемѹ;
5 Не сицева́гѡ поста̀ а҆́зъ и҆збра́хъ, и҆ днѐ, є҆́же смири́ти человѣ́кѹ дѹ́шѹ свою̀: нижѐ а҆́ще слѧче́ши ѩ҆́кѡ се́рпъ вы́ю твою̀, и҆ вре́тище и҆ пе́пелъ посте́леши, нижѐ та́кѡ нарече́те по́стъ прїѧ́тенъ.
6 Не такова́гѡ (бо) поста̀ а҆́зъ и҆збра́хъ, гл҃етъ гд҇ь: но разрѣша́й всѧ́къ соѹ́зъ непра́вды, разрѹша́й ѡ҆бдолжє́нїѧ наси́льныхъ писа́нїй, ѿпѹстѝ сокрѹшє́нныѧ во свобо́дѹ и҆ всѧ́кое писа́нїе непра́ведное раздерѝ:
7 раздроблѧ́й а҆́лчѹщымъ хлѣ́бъ тво́й и҆ ни́щыѧ безкрѡ́вныѧ введѝ въ до́мъ тво́й: а҆́ще ви́диши на́га, ѡ҆дѣ́й, и҆ ѿ сво́йственныхъ пле́мене твоегѡ̀ не пре́зри.
8 Тогда̀ разве́рзетсѧ ра́нѡ свѣ́тъ тво́й, и҆ и҆сцѣлє́нїѧ твоѧ҄ ско́рѡ возсїѧ́ютъ, и҆ пред̾и́детъ пред̾ тобо́ю пра́вда твоѧ̀, и҆ сла́ва бж҃їѧ ѡ҆б̾и́метъ тѧ̀.
9 Тогда̀ воззове́ши, и҆ бг҃ъ ѹ҆слы́шитъ тѧ̀, и҆ є҆щѐ глаго́лющѹ тѝ, рече́тъ: сѐ, прїидо́хъ. А҆́ще ѿи́меши ѿ себє̀ соѹ́зъ и҆ рѹкобїе́нїе и҆ глаго́лъ ропта́нїѧ
10 и҆ да́си а҆́лчѹщемѹ хлѣ́бъ ѿ дѹшѝ твоеѧ̀ и҆ дѹ́шѹ смире́ннѹю насы́тиши, тогда̀ возсїѧ́етъ во тмѣ̀ свѣ́тъ тво́й, и҆ тма̀ твоѧ̀ бѹ́детъ ѩ҆́кѡ полѹ́дне,
11 и҆ бѹ́детъ бг҃ъ тво́й съ тобо́ю пр҇нѡ: и҆ насы́тишисѧ, ѩ҆́коже жела́етъ дѹша̀ твоѧ̀, и҆ кѡ́сти твоѧ҄ ѹ҆тѹчнѣ́ютъ, и҆ бѹ́дѹтъ ѩ҆́кѡ вертогра́дъ напое́нъ, и҆ ѩ҆́кѡ и҆сто́чникъ, є҆мѹ́же не ѡ҆скѹдѣ̀ вода̀: и҆ кѡ́сти твоѧ҄ прозѧ́бнѹтъ ѩ҆́кѡ трава̀, и҆ разботѣ́ютъ, и҆ наслѣ́дѧтъ ро́ды родѡ́въ.
12 И҆ сози́ждѹтсѧ пѹсты҄ни твоѧ҄ вѣ҄чныѧ, и҆ бѹ́дѹтъ ѡ҆снова҄нїѧ твоѧ҄ вѣ҄чнаѧ родѡ́мъ родѡ́въ: и҆ прозове́шисѧ зда́тель ѡ҆гра́дъ, и҆ стєзѝ твоѧ҄ посредѣ̀ ѹ҆поко́иши.
13 А҆́ще ѿврати́ши но́гѹ твою̀ ѿ сѹббѡ́тъ, є҆́же не твори́ти хотѣ́нїй твои́хъ въ де́нь ст҃ы́й, и҆ прозове́ши сѹббѡ҄ты сла́дѡстны, ст҃ы бг҃ови твоемѹ̀: не воздви́гнеши ногѝ своеѧ̀ на дѣ́ло, нижѐ возглаго́леши словесѐ во гнѣ́вѣ и҆з̾ ѹ҆́стъ твои́хъ,
14 и҆ бѹ́деши ѹ҆пова́ѧ на гд҇а, и҆ возведе́тъ тѧ̀ на благѡты̀ зємны́ѧ, и҆ ѹ҆хлѣ́битъ тѧ̀ наслѣ́дїемъ ї҆а́кѡва ѻ҆тца̀ твоегѡ̀: ѹ҆ста́ бо гд҇нѧ гл҃аша сїѧ҄.
Нашли в тексте ошибку? Выделите её и нажмите:
Ctrl + Enter
Книга пророка Исаии, 58 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784