1 Ско́рѡ и҆́детъ и҆ не ѹ҆ме́длитъ: и҆ поми́лѹетъ гд҇ь ї҆а́кѡва и҆ и҆збере́тъ па́ки ї҆и҃лѧ, и҆ почі́ютъ на землѝ свое́й, и҆ пришле́цъ приложи́тсѧ къ ни҄мъ и҆ приложи́тсѧ къ до́мѹ ї҆а́кѡвлю,
2 и҆ по́ймѹтъ и҆̀хъ ѩ҆зы́цы и҆ введѹ́тъ на мѣ́сто и҆́хъ, и҆ наслѣ́дѧтъ и҆ ѹ҆мно́жатсѧ на землѝ бж҃їи въ рабы҄ и҆ рабы҄ни: и҆ бѹ́дѹтъ плѣне́ни плѣни́вшїи ѧ҆̀, и҆ ѡ҆блада́ни бѹ́дѹтъ ѡ҆блада́вшїи и҆́ми.
3 И҆ бѹ́детъ въ то́й де́нь, ѹ҆поко́итъ тѧ̀ гд҇ь ѿ болѣ́зни и҆ ѩ҆́рости твоеѧ̀ и҆ ѿ рабо́ты жесто́кїѧ, є҆́юже рабо́талъ є҆сѝ и҆̀мъ.
4 И҆ прїи́меши пла́чь се́й {Є҆вр.: при́тчѹ сїю̀.} на царѧ̀ вавѷлѡ́нска и҆ рече́ши въ то́й де́нь: ка́кѡ преста̀ и҆стѧзѹ́ѧй и҆ преста̀ понѹжда́ѧй;
5 Сокрѹшѝ бг҃ъ ѩ҆ре́мъ грѣ́шникѡвъ, ѩ҆ре́мъ кнѧзе́й,
6 порази́въ ѩ҆зы́къ ѩ҆́ростїю, ѩ҆́звою неисцѣ́льною, поража́ѧй ѩ҆зы́къ ѩ҆́звою ѩ҆́рости, є҆́юже не пощадѣ̀, почѝ ѹ҆пова́ющи.
7 Всѧ̀ землѧ̀ вопїе́тъ со весе́лїемъ,
8 и҆ древа̀ лїва́нѡва возвесели́шасѧ ѡ҆ тебѣ̀ и҆ ке́дръ лїва́нскїй: ѡ҆не́лѣже ты̀ ѹ҆снѹ́лъ є҆сѝ, не взы́де посѣка́ѧй на́съ.
9 А҆́дъ до́лѣ ѡ҆горчи́сѧ, срѣ́тъ тѧ̀: воста́ша съ тобо́ю всѝ и҆споли́ни ѡ҆блада́вшїи земле́ю, подвиза́вшїи ѿ престо́лѡвъ свои́хъ всѣ́хъ царе́й ѩ҆зы́ческихъ.
10 Всѝ ѿвѣща́ютъ и҆ рекѹ́тъ тебѣ̀: и҆ ты̀ плѣне́нъ є҆сѝ, ѩ҆́коже и҆ мы̀: и҆ въ на́съ вмѣне́нъ є҆сѝ.
11 Сни́де сла́ва твоѧ̀ во а҆́дъ, мно́гое весе́лїе твоѐ: под̾ тобо́ю посте́лютъ гни́лость, и҆ покро́въ тво́й че́рвь.
12 Ка́кѡ спадѐ съ небесѐ денни́ца восходѧ́щаѧ заѹ́тра; сокрѹши́сѧ на землѝ посыла́ѧй ко всѣ҄мъ ѩ҆зы́кѡмъ.
13 Ты́ же ре́клъ є҆сѝ во ѹ҆мѣ̀ твое́мъ: на не́бо взы́дѹ, вы́ше ѕвѣ́здъ небе́сныхъ поста́влю престо́лъ мо́й, сѧ́дѹ на горѣ̀ высо́цѣ, на гора́хъ высо́кихъ, ѩ҆̀же къ сѣ́верѹ:
14 взы́дѹ вы́ше ѡ҆́блакъ, бѹ́дѹ подо́бенъ вы́шнемѹ.
15 Нн҃ѣ же во а҆́дъ сни́деши и҆ во ѡ҆снѡва́нїѧ землѝ.
16 Ви́дѣвшїи тѧ̀ ѹ҆дивѧ́тсѧ ѡ҆ тебѣ̀ и҆ рекѹ́тъ: се́й человѣ́къ раздража́ѧй зе́млю, потрѧса́ѧй цари҄,
17 положи́вый вселе́ннѹю всю̀ пѹ́стѹ и҆ гра́ды є҆ѧ̀ разсы́па, плѣне́ныхъ не разрѣшѝ.
18 Всѝ ца́рїе ѩ҆зы́кѡвъ ѹ҆спо́ша въ че́сти, кі́йждо въ домѹ̀ свое́мъ.
19 Ты́ же пове́рженъ бѹ́деши въ гора́хъ, ѩ҆́кѡ мертве́цъ ме́рзкїй со мно́гими мертвєцы̀ и҆зсѣ́чеными мече́мъ, сходѧ́щими во а҆́дъ.
20 ѩ҆́коже ри́за въ кро́ви намоче́на не бѹ́детъ чиста̀, та́кожде и҆ ты̀ не бѹ́деши чи́стъ, занѐ зе́млю мою̀ погѹби́лъ є҆сѝ и҆ лю́ди моѧ҄ и҆зби́лъ є҆сѝ: не пребѹ́деши въ вѣ́чное вре́мѧ, сѣ́мѧ ѕло́е.
21 Ѹ҆гото́ви ча҄да твоѧ҄ на ѹ҆бїе́нїе грѣха́ми ѻ҆тца̀ твоегѡ̀, да воста́нѹтъ и҆ наслѣ́дѧтъ зе́млю и҆ напо́лнѧтъ зе́млю ра́тьми.
22 И҆ воста́нѹ на нѧ̀, гл҃етъ гд҇ь саваѡ́ѳъ, и҆ погѹблю̀ и҆́мѧ и҆́хъ, и҆ ѡ҆ста́нокъ, и҆ сѣ́мѧ: сїѧ҄ гл҃етъ гд҇ь.
23 И҆ положѹ̀ вавѷлѡ́на пѹ́ста, ѩ҆́кѡ вогнѣзди́тисѧ є҆жє́мъ, и҆ бѹ́детъ ни во что́же: и҆ положѹ̀ и҆̀ бре́нїѧ про́пасть въ па́гѹбѹ.
24 Сїѧ҄ гл҃етъ гд҇ь саваѡ́ѳъ: ѩ҆́коже гл҃ахъ, та́кѡ бѹ́детъ, и҆ ѩ҆́коже совѣща́хъ, та́кѡ пребѹ́детъ,
25 є҆́же погѹби́ти а҆ссѷрі́анъ на землѝ мое́й и҆ на гора́хъ мои́хъ: и҆ бѹ́дѹтъ въ попра́нїе, и҆ ѿи́метсѧ ѿ ни́хъ ѩ҆ре́мъ и҆́хъ, и҆ сла́ва {Є҆вр.: бре́мѧ.} и҆́хъ ѿ ра́менъ и҆́хъ ѿи́метсѧ.
26 Се́й совѣ́тъ, є҆го́же совѣща̀ гд҇ь на всю̀ вселе́ннѹю, и҆ сїѧ̀ рѹка̀ на всѧ҄ ѩ҆зы́ки вселе́нныѧ:
27 ѩ҆̀же бо бг҃ъ ст҃ы́й совѣща̀, кто̀ разори́тъ; и҆ рѹ́кѹ є҆гѡ̀ высо́кѹю кто̀ ѿврати́тъ;
28 Въ лѣ́то, въ не́же ѹ҆́мре а҆ха́зъ ца́рь, бы́сть глаго́лъ се́й:
29 не ра́дѹйтесѧ, всѝ и҆ноплемє́нницы, сокрѹши́сѧ бо ѩ҆ре́мъ бїю́щагѡ вы̀: ѿ сѣ́мене бо ѕмїи́на и҆зы́дѹтъ и҆сча҄дїѧ а҆́спїдѡвъ, и҆ и҆сча҄дїѧ и҆́хъ и҆зы́дѹтъ ѕмїи҄ парѧ́щїи:
30 и҆ ѹ҆пасѹ́тсѧ ѹ҆бо́зїи и҆́мъ, ни́щїи же человѣ́цы въ ми́рѣ почі́ютъ: и҆ потреби́тъ гла́домъ сѣ́мѧ твоѐ, и҆ ѡ҆ста́нокъ тво́й и҆збїе́тъ.
31 Воспла́читесѧ, врата̀ градѡ́въ, да возопїю́тъ гра́ды смѧте́ннїи, и҆ноплемє́нницы всѝ, занѐ ды́мъ ѿ сѣ́вера и҆́детъ, и҆ нѣ́сть, и҆́же пребѹ́детъ.
32 И҆ что̀ ѿвѣща́ютъ ца́рїе ѩ҆зы́кѡвъ; ѩ҆́кѡ гд҇ь ѡ҆снова̀ сїѡ́на, и҆ тѣ́мъ спасѹ́тсѧ смире́ннїи люді́й є҆гѡ̀.
Нашли в тексте ошибку? Выделите её и нажмите:
Ctrl + Enter
Книга пророка Исаии, 14 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784