1 Падѐ ви́лъ, сокрѹши́сѧ дагѡ́нъ, бы́ша ваѧ҄нїѧ и҆́хъ во ѕвѣ҄ри и҆ ско́ты: но́сите ѧ҆̀ свѧ҄зана ѩ҆́кѡ бре́мѧ трѹжда́ющемѹсѧ и҆ разслабѣ́вшѹ,
2 и҆ а҆́лчѹщѹ и҆ не могѹ́щѹ вкѹ́пѣ, и҆̀же не возмо́гѹтъ спасти́сѧ ѿ ра́ти, са́ми же плѣне́ни приведо́шасѧ.
3 Послѹ́шайте менѐ, до́ме ї҆а́кѡвль и҆ ве́сь ѡ҆ста́нокъ ї҆и҃левъ, носи́мїи ѿ чре́ва и҆ наказѹ́емїи ѿ дѣ́тска да́же до ста́рости:
4 а҆́зъ є҆́смь, и҆ до́ндеже состарѣ́етесѧ, а҆́зъ є҆́смь, а҆́зъ терплю̀ ва́мъ, а҆́зъ сотвори́хъ и҆ а҆́зъ понесѹ̀, а҆́зъ под̾имѹ̀ и҆ сп҃сѹ́ вы.
5 Комѹ̀ мѧ̀ ѹ҆подо́бисте; ви́дите, ѹ҆хи́трите, заблѹжда́ющїи,
6 слага́ющїи зла́то и҆з̾ мѣ́ха, и҆ сребро̀ вѣ́сомъ поставлѧ́ютъ въ мѣ́рилѣ, и҆ нае́мше зла́тарѧ сотвори́ша рѹкотворє́ннаѧ, и҆ прекло́ншесѧ покланѧ́ютсѧ и҆̀мъ:
7 воздви́жѹтъ ѧ҆̀ на ра́мѣхъ и҆ хо́дѧтъ: а҆́ще же положа́тъ ѧ҆̀ на мѣ́стѣ свое́мъ, тѹ̀ лежа́тъ, нижѐ подви́жѹтсѧ: и҆ и҆́же а҆́ще возопїе́тъ къ ни҄мъ, не ѹ҆слы́шатъ, ѿ бѣ́дъ не спасѹ́тъ є҆гѡ̀.
8 Помѧни́те сїѧ҄ и҆ возстени́те, пока́йтесѧ, прельсти́вшїисѧ, ѡ҆брати́тесѧ се́рдцемъ
9 и҆ помѧни́те пє́рваѧ ѿ вѣ́ка, ѩ҆́кѡ а҆́зъ є҆́смь бг҃ъ, и҆ нѣ́сть є҆щѐ ра́звѣ менє̀:
10 возвѣща́ѧй пе́рвѣе послѣ҄днѧѧ, пре́жде не́же бы́ти и҆̀мъ, и҆ а҆́бїе сбы́шасѧ: и҆ реко́хъ: ве́сь совѣ́тъ мо́й ста́нетъ, и҆ всѧ҄, є҆ли҄ка совѣща́хъ, сотворю̀.
11 Призыва́ѧй ѿ востѡ́къ пти́цѹ, и҆ ѿ землѝ и҆здале́ча, ѡ҆ ни́хже совѣща́хъ: реко́хъ и҆ приведо́хъ, созда́хъ и҆ сотвори́хъ, приведо́хъ и҆̀ и҆ бл҃гопоспѣши́хъ пѹ́ть є҆гѡ̀.
12 Послѹ́шайте менѐ, погѹ́бльшїи се́рдце, сѹ́щїи дале́че ѿ пра́вды:
13 прибли́жихъ пра́вдѹ мою̀, и҆ не ѹ҆дали́тсѧ, и҆ сп҇нїе, є҆́же ѿ менє̀, не ѹ҆ме́длю: да́хъ въ сїѡ́нѣ сп҇нїе ї҆и҃лю во прославле́нїе.
Нашли в тексте ошибку? Выделите её и нажмите: Ctrl + Enter

Книга пророка Исаии, 46 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.