1 Ви́дите, ка́кѡ пра́ведный поги́бе, и҆ никто́же не прїе́млетъ се́рдцемъ, и҆ мѹ́жїе пра́веднїи взе́млютсѧ, и҆ никто́же разѹмѣ́етъ: ѿ лица́ бо непра́вды взѧ́сѧ пра́ведный.
2 Бѹ́детъ съ ми́ромъ погребе́нїе є҆гѡ̀, взѧ́сѧ ѿ среды̀.
3 Вы́ же прїиди́те сѣ́мѡ, сы́нове беззако́ннїи, сѣ́мѧ прелюбодѣ́євъ и҆ блѹдни́цы:
4 въ че́мъ ѹ҆слажда́стесѧ и҆ на кого̀ ѿверзо́сте ѹ҆ста̀ ва҄ша; и҆ на кого̀ и҆зсѹ́нѹсте ѧ҆зы́къ ва́шъ; не вы́ ли є҆стѐ ча҄да па́гѹбы, сѣ́мѧ беззако́нно,
5 молѧ́щїисѧ кѹмі́рѡмъ под̾ дре́вїемъ ча́стымъ, закала́юще ча҄да своѧ҄ въ де́брехъ посредѣ̀ ка́менїѧ;
6 То̀ твоѧ̀ ча́сть, се́й тво́й жре́бїй, и҆ тѣ҄мъ пролїѧ́лъ є҆сѝ возлїѧ҄нїѧ, и҆ тѣ҄мъ прине́слъ є҆сѝ жє́ртвы: ѿ си́хъ ѹ҆̀бо не разгнѣ́ваюсѧ ли;
7 На горѣ̀ высо́цѣ и҆ превознесе́ннѣ, та́мѡ твоѐ ло́же, и҆ та́мѡ возне́слъ є҆сѝ трє́бы твоѧ҄:
8 и҆ за подво́ѧми две́рїй твои́хъ положи́лъ є҆сѝ па́мѧть твою̀: мы́слилъ є҆сѝ, ѩ҆́кѡ а҆́ще ѿ менє̀ ѿстѹпи́ши, бо́лѣе нѣ́что воз̾имѣ́еши: возлюби́лъ є҆сѝ спѧ́щыѧ съ тобо́ю,
9 и҆ ѹ҆мно́жилъ є҆сѝ блѹже́нїе твоѐ съ ни́ми, и҆ мнѡ́ги сотвори́лъ, и҆̀же дале́че ѿ тебє̀, и҆ посла́лъ є҆сѝ послы̀ за предѣ́лы твоѧ҄, и҆ смири́лсѧ є҆сѝ да́же до а҆́да.
10 Мно́гими пѹтьмѝ твои́ми трѹди́лсѧ є҆сѝ, и҆ не ре́клъ є҆сѝ: преста́нѹ крѣпѧ́щьсѧ, ѩ҆́кѡ сотвори́лъ є҆сѝ сїѧ҄, сегѡ̀ ра́ди не помоли́лсѧ мѝ є҆сѝ ты̀.
11 Кого̀ благопоче́тъ ѹ҆боѧ́лсѧ є҆сѝ, и҆ солга́лъ мѝ, и҆ не помѧнѹ́лъ є҆сѝ менѐ, нижѐ прїѧ́лъ мѧ̀ є҆сѝ во ѹ҆́мъ, нижѐ въ се́рдце твоѐ; и҆ а҆́зъ тѧ̀ ви́дѧ, презира́ю, и҆ не ѹ҆боѧ́лсѧ є҆сѝ менѐ.
12 И҆ а҆́зъ возвѣщѹ̀ пра́вдѹ твою̀ и҆ ѕлѡ́бы твоѧ҄, ѩ҆̀же не ѹ҆спѣ́ютъ тебѣ̀:
13 є҆гда̀ возопїе́ши, да и҆зба́вѧтъ тѧ̀ во печа́лехъ твои́хъ: сїѧ҄ бо всѧ҄ вѣ́тръ во́зметъ, и҆ ѿнесе́тъ бѹ́рѧ: а҆ держа́щїисѧ менє̀ стѧ́жѹтъ зе́млю и҆ наслѣ́дѧтъ го́рѹ ст҃ѹ́ю мою̀.
14 И҆ рекѹ́тъ: ѡ҆чи́стите пред̾ лице́мъ є҆гѡ̀ пѹти҄ и҆ ѿими́те претыка҄нїѧ ѿ пѹтѝ люді́й мои́хъ.
15 Сїѧ҄ гл҃етъ гд҇ь вы́шнїй, и҆́же живе́тъ во высо́кихъ во вѣ́къ, ст҃ы́й во ст҃ы́хъ и҆́мѧ є҆мѹ̀, вы́шнїй, во ст҃ы́хъ почива́ѧй, и҆ малодѹ҄шнымъ даѧ́й долготерпѣ́нїе и҆ даѧ́й живо́тъ сокрѹшє́нымъ се́рдцемъ:
16 не во вѣ́къ ѿмщѹ̀ ва́мъ, ни всегда̀ гнѣ́ватисѧ бѹ́дѹ на вы̀: дх҃ъ бо ѿ менє̀ и҆зы́детъ, и҆ всѧ́кое дыха́нїе а҆́зъ сотвори́хъ.
17 За грѣ́хъ ма́лѡ что̀ ѡ҆печа́лихъ є҆го̀ и҆ порази́хъ є҆го̀ и҆ ѿврати́хъ лицѐ моѐ ѿ негѡ̀: и҆ ѡ҆печа́лисѧ и҆ по́йде дрѧ́хлъ во пѹте́хъ свои́хъ.
18 Пѹти҄ є҆гѡ̀ ви́дѣхъ и҆ и҆сцѣли́хъ є҆го̀, и҆ ѹ҆тѣ́шихъ є҆го̀ и҆ да́хъ є҆мѹ̀ ѹ҆тѣше́нїе и҆́стинно,
19 ми́ръ на ми́ръ дале́че и҆ бли́з̾ сѹ́щымъ: и҆ речѐ гд҇ь: и҆сцѣлю̀ ѧ҆̀.
20 Непра́веднїи же возволнѹ́ютсѧ и҆ почи́ти не возмо́гѹтъ.
21 Нѣ́сть ра́доватисѧ нечєсти́вымъ, речѐ гд҇ь бг҃ъ.
Нашли в тексте ошибку? Выделите её и нажмите:
Ctrl + Enter
Книга пророка Исаии, 57 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784