1 Жа́ждѹщїи, и҆ди́те на во́дѹ, и҆ є҆ли́цы не и҆́мате сребра̀, ше́дше кѹпи́те, и҆ ѩ҆ди́те (и҆ пі́йте) без̾ сребра̀ и҆ цѣны̀ вїно̀ и҆ тѹ́къ.
2 Вскѹ́ю цѣнитѐ сребро̀ не въ хлѣ́бы, и҆ трѹ́дъ ва́шъ не въ сы́тость; Послѹ́шайте менѐ, и҆ снѣ́сте блага҄ѧ, и҆ наслади́тсѧ во благи́хъ дѹша̀ ва́ша.
3 Внемли́те ѹ҆ши́ма ва́шима и҆ послѣ́дѹйте пѹтє́мъ мои҄мъ: послѹ́шайте менѐ, и҆ жива̀ бѹ́детъ во благи́хъ дѹша̀ ва́ша, и҆ завѣща́ю ва́мъ завѣ́тъ вѣ́ченъ, преподѡ́бнаѧ даві́дѡва вѣ҄рнаѧ.
4 Сѐ, свидѣ́телство во ѩ҆зы́цѣхъ да́хъ є҆го̀, кнѧ́зѧ и҆ повели́телѧ ѩ҆зы́кѡмъ.
5 Сѐ, ѩ҆зы́цы, и҆̀же не вѣ́дѧхѹ тебѐ, призовѹ́тъ тѧ̀, и҆ лю́дїе, и҆̀же не позна́ша тебѐ, ко тебѣ̀ прибѣ́гнѹтъ ра́ди гд҇а бг҃а твоегѡ̀, ст҃а́гѡ ї҆и҃лева, ѩ҆́кѡ просла́ви тѧ̀.
6 Взыщи́те гд҇а, и҆ внегда̀ ѡ҆брѣстѝ ва́мъ того̀, призови́те: є҆гда́ же прибли́житсѧ къ ва́мъ,
7 да ѡ҆ста́витъ нечести́вый пѹти҄ своѧ҄, и҆ мѹ́жъ беззако́ненъ совѣ́ты своѧ҄, и҆ да ѡ҆брати́тсѧ ко гд҇ѹ, и҆ поми́лованъ бѹ́детъ, ѩ҆́кѡ попремно́гѹ ѡ҆ста́витъ грѣ́хи ва́шѧ.
8 Не сѹ́ть бо совѣ́ти моѝ ѩ҆́коже совѣ́ти ва́ши, нижѐ ѩ҆́коже пѹтїѐ ва́ши пѹтїѐ моѝ, гл҃етъ гд҇ь.
9 Но ѩ҆́коже ѿстои́тъ не́бо ѿ землѝ, та́кѡ ѿстои́тъ пѹ́ть мо́й ѿ пѹті́й ва́шихъ, и҆ помышлє́нїѧ ва҄ша ѿ мы́сли моеѧ̀.
10 ѩ҆́коже бо а҆́ще сни́детъ до́ждь и҆лѝ снѣ́гъ съ небесѐ, и҆ не возврати́тсѧ, до́ндеже напои́тъ зе́млю, и҆ роди́тъ, и҆ прозѧ́бнетъ, и҆ да́стъ сѣ́мѧ сѣ́ющемѹ и҆ хлѣ́бъ въ снѣ́дь:
11 та́кѡ бѹ́детъ гл҃го́лъ мо́й, и҆́же а҆́ще и҆зы́детъ и҆з̾ ѹ҆́стъ мои́хъ, не возврати́тсѧ ко мнѣ̀ то́щь, до́ндеже соверши́тъ (всѧ҄), є҆ли҄ка восхотѣ́хъ, и҆ поспѣшѹ̀ пѹти҄ твоѧ҄ и҆ за́пѡвѣди моѧ҄.
12 Со весе́лїемъ бо и҆зы́дете и҆ съ ра́достїю наѹчите́сѧ: го́ры бо и҆ хо́лми возска́чѹтъ ждѹ́ще ва́съ съ ра́достїю, и҆ всѧ҄ древеса̀ сє́лнаѧ воспле́щѹтъ вѣ́твьми:
13 и҆ вмѣ́стѡ дра́чїѧ взы́детъ кѷпарі́съ, и҆ вмѣ́стѡ кропи́вы взы́детъ мѷрсі́на: и҆ бѹ́детъ гд҇ь во и҆́мѧ и҆ во зна́менїе вѣ́чное, и҆ не ѡ҆скѹдѣ́етъ.
Нашли в тексте ошибку? Выделите её и нажмите: Ctrl + Enter

Книга пророка Исаии, 55 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.