1 Гд҇и бж҃е мо́й, просла́влю тѧ̀, воспою̀ и҆́мѧ твоѐ, ѩ҆́кѡ сотвори́лъ є҆сѝ чѹ҄днаѧ дѣла̀, совѣ́тъ дре́внїй и҆́стинный: да бѹ́детъ, гд҇и.
2 ѩ҆́кѡ положи́лъ є҆сѝ гра́ды въ пе́рсть, гра́ды твє́рдыѧ, є҆́же па́сти ѡ҆снова́нїємъ и҆́хъ, нечести́выхъ гра́дъ да же сози́ждетсѧ во вѣ́къ.
3 Сегѡ̀ ра́ди благословѧ́тъ тѧ̀ лю́дїе ни́щїи, и҆ гра́ди человѣ́кѡвъ ѡ҆би́димыхъ возблагословѧ́тъ тѧ̀.
4 Бы́лъ бо є҆сѝ всѧ́комѹ гра́дѹ смире́нномѹ помо́щникъ, и҆ и҆знемога́ющымъ за ѡ҆скѹдѣ́нїе покро́въ, ѿ человѣ҄къ ѕлы́хъ и҆зба́виши и҆̀хъ: покро́въ жа́ждѹщихъ, и҆ дѹ́хъ человѣ́кѡвъ ѡ҆би́димыхъ.
5 А҆́ки человѣ́цы малодѹ́шнїи жа́ждѹщїи въ сїѡ́нѣ, ѩ҆́кѡ и҆зба́виши и҆̀хъ ѿ человѣ҄къ нечести́выхъ, и҆̀мже на́съ пре́далъ є҆сѝ.
6 И҆ сотвори́тъ гд҇ь саваѡ́ѳъ всѣ҄мъ ѩ҆зы́кѡмъ: на горѣ̀ се́й и҆спїю́тъ ра́дость, и҆спїю́тъ вїно̀,
7 пома́жѹтсѧ мѵ́ромъ на горѣ̀ се́й: преда́ждь сїѧ҄ всѧ҄ ѩ҆зы́кѡмъ: то́й бо совѣ́тъ на всѧ҄ ѩ҆зы́ки.
8 Пожрѐ сме́рть {Є҆вр.: поже́рта бѹ́детъ сме́рть} возмо́гши, и҆ па́ки ѿѧ́тъ гд҇ь бг҃ъ всѧ́кѹю сле́зѹ ѿ всѧ́кагѡ лица̀: поноше́нїе люді́й ѿѧ́тъ ѿ всеѧ̀ землѝ, ѹ҆ста́ бо гд҇нѧ гл҃аша (сїѧ҄).
9 И҆ рекѹ́тъ въ де́нь ѻ҆́ный: сѐ, бг҃ъ на́шъ, на́ньже ѹ҆пова́хомъ, и҆ сп҃се́тъ на́съ: се́й гд҇ь, потерпѣ́хомъ є҆го̀, и҆ возра́довахомсѧ и҆ возвесели́хомсѧ ѡ҆ сп҇нїи на́шемъ.
10 Поко́й да́стъ бг҃ъ на горѣ̀ се́й, и҆ попере́тсѧ мѡаві́тїда, ѩ҆́коже то́пчѹтъ то́къ колесни́цами.
11 И҆ воздви́гнетъ рѹ́цѣ своѝ, ѩ҆́коже и҆ то́й смирѝ, є҆́же погѹби́ти: и҆ смири́тъ горды́ню є҆гѡ̀, на нѧ́же рѹ́цѣ возложѝ.
12 И҆ высотѹ̀ ѹ҆бѣ́жища ѡ҆гра́ды твоеѧ̀ смири́тъ, и҆ ѡ҆бни́зитсѧ да́же до землѝ.
Нашли в тексте ошибку? Выделите её и нажмите: Ctrl + Enter

Книга пророка Исаии, 25 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.