1 Дх҃ъ гд҇ень на мнѣ̀, є҆гѡ́же ра́ди пома́за мѧ̀, бл҃говѣсти́ти ни́щымъ посла́ мѧ, и҆сцѣли́ти сокрѹшє́нныѧ се́рдцемъ, проповѣ́дати плѣ́нникѡмъ ѿпѹще́нїе и҆ слѣпы҄мъ прозрѣ́нїе,
2 нарещѝ лѣ́то гд҇не прїѧ́тно и҆ де́нь воздаѧ́нїѧ, ѹ҆тѣ́шити всѧ҄ пла́чѹщыѧ,
3 да́ти пла́чѹщымъ сїѡ́на сла́вѹ вмѣ́стѡ пе́пела, пома́занїе весе́лїѧ пла́чѹщымъ, ѹ҆краше́нїе сла́вы вмѣ́стѡ дѹ́ха ѹ҆ны́нїѧ: и҆ нарекѹ́тсѧ ро́дове пра́вды, насажде́нїе гд҇не во сла́вѹ.
4 И҆ сози́ждѹтъ пѹсты҄ни вѣ҄чныѧ, запѹстѣ́вшыѧ пре́жде воздви́гнѹтъ: и҆ ѡ҆бновѧ́тъ гра́ды пѹсты҄ѧ, ѡ҆пѹстошє́нныѧ въ ро́ды.
5 И҆ прїи́дѹтъ и҆норо́днїи, пасѹ́щїи ѻ҆́вцы твоѧ҄, и҆ и҆ноплемє́нницы ѡ҆ра́телїе и҆ вїногра́дарїе ва́ши:
6 вы́ же свѧще́нницы гд҇ни нарече́тесѧ, слѹжи́телїе бг҃а ва́шегѡ, рече́тсѧ ва́мъ: крѣ́пость ѩ҆зы҄къ снѣ́сте и҆ въ бога́тствѣ и҆́хъ чѹ́дни бѹ́дете.
7 Си́це зе́млю свою̀ втори́цею наслѣ́дѧтъ, и҆ весе́лїе вѣ́чное над̾ главо́ю и҆́хъ.
8 А҆́зъ бо є҆́смь гд҇ь любѧ́й пра́вдѹ и҆ ненави́дѧй граблє́нїѧ ѿ непра́вды: и҆ да́мъ трѹ́дъ и҆́хъ пра́ведникѡмъ и҆ завѣ́тъ вѣ́ченъ завѣща́ю и҆̀мъ.
9 И҆ позна́етсѧ во ѩ҆зы́цѣхъ сѣ́мѧ и҆́хъ, и҆ внѹ́цы и҆́хъ посредѣ̀ люді́й: всѧ́къ ви́дѧй ѧ҆̀ позна́етъ ѧ҆̀, ѩ҆́кѡ сі́и сѹ́ть сѣ́мѧ блг҇ве́но ѿ бг҃а, и҆ ра́достїю возра́дѹютсѧ ѡ҆ гд҇ѣ.
10 Да возра́дѹетсѧ дѹша̀ моѧ̀ ѡ҆ гд҇ѣ: ѡ҆блече́ бо мѧ̀ въ ри́зѹ сп҇нїѧ и҆ ѻ҆де́ждею весе́лїѧ (ѡ҆дѣ́ѧ мѧ̀): ѩ҆́кѡ на жениха̀ возложѝ на мѧ̀ вѣне́цъ, и҆ ѩ҆́кѡ невѣ́стѹ ѹ҆краси́ мѧ красото́ю.
11 И҆ ѩ҆́кѡ землѧ̀ растѧ́щаѧ цвѣ́тъ сво́й, и҆ ѩ҆́кѡ вертогра́дъ сѣ́мена своѧ҄ прозѧба́етъ: та́кѡ возрасти́тъ гд҇ь гд҇ь пра́вдѹ и҆ весе́лїе пред̾ всѣ́ми ѩ҆зы҄ки.
Нашли в тексте ошибку? Выделите её и нажмите:
Ctrl + Enter
Книга пророка Исаии, 61 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784