1 Сїѧ҄ гл҃етъ гд҇ь: сохрани́те сѹ́дъ и҆ сотвори́те пра́вдѹ, прибли́жисѧ бо сп҇нїе моѐ прїитѝ и҆ мл҇ть моѧ̀ ѿкры́тисѧ.
2 Блаже́нъ мѹ́жъ творѧ́й сїѧ҄, и҆ человѣ́къ держа́йсѧ и҆́хъ, и҆ хранѧ́й сѹббѡ҄ты не ѡ҆сквернѧ́ти, и҆ блюды́й рѹ́цѣ своѝ не твори́ти непра́вды.
3 Да не глаго́летъ и҆ноплеме́нникъ приложи́выйсѧ ко гд҇еви: є҆да̀ ѿлѹчи́тъ мѧ̀ гд҇ь ѿ люді́й свои́хъ; и҆ да не глаго́летъ ка́женикъ, ѩ҆́кѡ а҆́зъ є҆́смь дре́во сѹ́хо.
4 Сїѧ҄ гл҃етъ гд҇ь ка́женикѡмъ: є҆ли́цы сохранѧ́тъ сѹббѡ҄ты моѧ҄ и҆ и҆зберѹ́тъ, ѩ҆̀же а҆́зъ хощѹ̀, и҆ содержа́тъ завѣ́тъ мо́й,
5 да́мъ и҆̀мъ въ домѹ̀ мое́мъ и҆ во ѡ҆гра́дѣ мое́й мѣ́сто и҆мени́то, лѹ́чшее ѿ сынѡ́въ и҆ дще́рей, и҆́мѧ вѣ́чно да́мъ и҆̀мъ, и҆ не ѡ҆скѹдѣ́етъ:
6 и҆ и҆ноплеме́нникѡмъ приложи́вшымсѧ гд҇еви рабо́тати є҆мѹ̀ и҆ люби́ти и҆́мѧ гд҇не, є҆́же бы́ти є҆мѹ̀ въ рабы҄ и҆ рабы҄ни, и҆ всѧ҄ снабдѧ́щыѧ сѹббѡ҄ты моѧ҄ не ѡ҆сквернѧ́ти и҆ держа́щыѧ завѣ́тъ мо́й,
7 введѹ̀ ѧ҆̀ въ го́рѹ ст҃ѹ́ю мою̀ и҆ возвеселю̀ ѧ҆̀ въ домѹ̀ мл҃твы моеѧ̀: всесожжє́нїѧ и҆́хъ и҆ жє́ртвы и҆́хъ бѹ́дѹтъ прїѧ҄тны на тре́бницѣ мое́мъ: до́мъ бо мо́й до́мъ моли́твы нарече́тсѧ всѣ҄мъ ѩ҆зы́кѡмъ,
8 гл҃етъ гд҇ь, собира́ѧй разсѣ҄ѧныѧ ї҆и҃лєвы, ѩ҆́кѡ соберѹ̀ къ немѹ̀ собо́ръ.
9 Всѝ ѕвѣ́рїе ди́вїи, прїиди́те, ѩ҆ди́те, всѝ ѕвѣ́рїе дѹбра́внїи.
10 Ви́дите, ѩ҆́кѡ всѝ ѡ҆слѣпо́ша, не разѹмѣ́ша смы́слити, всѝ псѝ нѣмі́и не возмо́гѹтъ ла́ѧти, ви́дѧще сны̀ на ло́жи, лю́бѧще дрема́ти,
11 и҆ псѝ безстѹ́днїи дѹше́ю, не вѣ́дѧще сы́тости: и҆ сѹ́ть лѹка́ви, не вѣ́дѧще смы́сла, всѝ пѹтє́мъ свои҄мъ послѣ́доваша, кі́йждо ѹ҆клони́шасѧ въ лихои́мство своѐ, ѿ пе́рвагѡ и҆ до послѣ́днѧгѡ.
12 Прїиди́те, да во́змемъ вїно̀ и҆ напо́лнимсѧ пїѧ́нства, и҆ бѹ́детъ ѩ҆́кѡ дне́сь, та́кѡ и҆ заѹ́тра, и҆ мно́гѡ мно́жае.
Нашли в тексте ошибку? Выделите её и нажмите:
Ctrl + Enter
Книга пророка Исаии, 56 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784