1 Го́ре вѣнцѹ̀ горды́ни, наи҄мницы є҆фре́мѡвы, цвѣ́тъ ѿпады́й ѿ сла́вы, на версѣ̀ горы̀ тѹ́чныѧ пїѧ́нїи без̾ вїна̀.
2 Сѐ, крѣпка̀ и҆ же́стока ѩ҆́рость гд҇нѧ, а҆́ки гра́дъ низпѹща́емый не и҆мы́й кро́ва, наси́льнѡ низпѹща́емый: ѩ҆́коже воды̀ мно́гое мно́жество влекѹ́щее странѹ̀, землѝ сотвори́тъ поко́й рѹка́ма,
3 и҆ нога́ма попере́тсѧ вѣне́цъ горды́ни, наи҄мницы є҆фре́мѡвы.
4 И҆ бѹ́детъ цвѣ́тъ ѿпады́й ѿ наде́жды сла́вы на версѣ̀ горы̀ высо́кїѧ, а҆́ки ра́ннїй пло́дъ смо́квинъ: ви́дѣвый є҆го̀, пре́жде взѧ́тїѧ въ рѹ́цѣ своѝ, восхо́щетъ поглоти́ти є҆го̀.
5 Въ то́й де́нь бѹ́детъ гд҇ь саваѡ́ѳъ вѣне́цъ наде́жди, сплете́ный сла́вою ѡ҆ста́вшымсѧ лю́демъ.
6 И҆ ѡ҆ста́вѧтсѧ дѹ́хомъ сѹ́днымъ на сѹ́дъ, и҆ крѣ́пость возбранѧ́ющихъ погѹблѧ́ти.
7 Сі́и бо вїно́мъ сѹ́ть прельще́ни: прельсти́шасѧ сїке́ры ра́ди, жре́цъ и҆ проро́къ и҆зстѹпи́ша ѹ҆ма̀ ѿ сїке́ры, пожє́рты бы́ша вїно́мъ, потрѧсо́шасѧ ѿ пїѧ́нства сїке́ры, прельсти́шасѧ: сїѐ є҆́сть привидѣ́нїе.
8 Проклѧ́тїе поѧ́стъ се́й совѣ́тъ, се́й бо совѣ́тъ ра́ди лихои́мства.
9 Комѹ̀ возвѣсти́хомъ ѕла҄ѧ и҆ комѹ̀ повѣ́дахомъ вѣ́сть; и҆̀же ѿдое́нїи (сѹ́ть) ѿ млека̀, ѿто́рженнїи ѿ сосца̀.
10 Печа́ли на печа́ль ѡ҆жида́й, наде́жды къ наде́жди, є҆щѐ ма́лѡ, є҆щѐ ма́лѡ,
11 ѩ҆́кѡ хѹ́достїю ѹ҆сте́нъ, ѧ҆зы́комъ и҆ны́мъ возглаго́лютъ лю́демъ си҄мъ, рекѹ́ще и҆̀мъ:
12 се́й поко́й а҆́лчномѹ и҆ сїѐ сокрѹше́нїе, и҆ не восхотѣ́ша слы́шати.
13 И҆ бѹ́детъ и҆̀мъ сло́во гд҇а бг҃а, печа́ль къ печа́ли, наде́жда къ наде́жди, є҆щѐ ма́лѡ, є҆щѐ ма́лѡ, да и҆́дѹтъ и҆ падѹ́тсѧ вспѧ́ть и҆ въ бѣдѹ̀ впадѹ́тъ, и҆ сокрѹша́тсѧ и҆ плѣне́ни бѹ́дѹтъ.
14 Сегѡ̀ ра́ди ѹ҆слы́шите сло́во гд҇не, мѹ́жїе ѡ҆ѕло́бленнїи и҆ кнѧ҄зи люді́й сѹ́щихъ во ї҆ер҇ли́мѣ.
15 ѩ҆́кѡ реко́сте: сотвори́хомъ завѣ́тъ со а҆́домъ и҆ со сме́ртїю сложе́нїе: бѹ́рѧ носи́ма а҆́ще мимои́детъ, не прїи́детъ на на́съ: положи́хомъ лжѹ̀ наде́ждѹ на́шѹ и҆ лже́ю покры́емсѧ.
16 Сегѡ̀ ра́ди та́кѡ гл҃етъ гд҇ь: сѐ, а҆́зъ полага́ю во ѡ҆снова́нїе сїѡ́нѹ ка́мень многоцѣ́ненъ, и҆збра́нъ, краеѹго́ленъ, чт҇енъ, во ѡ҆снова́нїе є҆мѹ̀, и҆ вѣ́рѹѧй въ ѻ҆́нь не постыди́тсѧ:
17 и҆ положѹ̀ сѹ́дъ въ наде́ждѹ, мл҇ть же моѧ̀ на мѣ́рилѣхъ, и҆ ѹ҆пова́вшїи вотщѐ на лжѹ̀, ѩ҆́кѡ не мине́тъ ва́съ бѹ́рѧ:
18 и҆ не ѿи́метъ ѿ ва́съ завѣ́та сме́ртнагѡ, и҆ наде́жда ва́ша, ѩ҆́же ко а҆́дѹ, не пребѹ́детъ. Бѹ́рѧ и҆дѹ́щаѧ а҆́ще на́йдетъ, бѹ́дете є҆́й въ попра́нїе:
19 є҆гда̀ мимои́детъ, во́зметъ ва́съ: ѩ҆́кѡ по всѧ́ко ѹ҆́тро преходи́ти бѹ́детъ въ де́нь, и҆ въ нощѝ бѹ́детъ наде́жда ѕла̀. Наѹчи́тесѧ слы́шати, ѹ҆тѣснѧ́емїи:
20 не мо́жемъ ра́товати, са́ми же и҆знемога́емъ, є҆́же собра́тисѧ на́мъ.
21 ѩ҆́коже гора̀ на нечести́выхъ воста́нетъ гд҇ь, и҆ бѹ́детъ (ѩ҆́коже) въ де́бри гаваѡ́нстѣй, съ ѩ҆́ростїю сотвори́тъ дѣла̀ своѧ҄, го́рести дѣ́ло: ѩ҆́рость же є҆гѡ̀ чѹ́ждѡ ѹ҆потреби́тсѧ, и҆ погѹбле́нїе є҆гѡ̀ стра́нно.
22 И҆ вы̀ не ра́дѹйтесѧ, нижѐ да возмо́гѹтъ ва́ши ѹ҆́зы: занѐ сконча҄ны и҆ сокращє́ны вє́щи слы́шахъ ѿ гд҇а саваѡ́ѳа, ѩ҆̀же сотвори́тъ над̾ все́ю земле́ю.
23 Внѹши́те и҆ слы́шите гла́съ мо́й, внемли́те и҆ слы́шите словеса̀ моѧ҄.
24 Є҆да̀ ве́сь де́нь бѹ́детъ ѡ҆рѧ́й ѡ҆ра́ти; и҆лѝ сѣ́мѧ ѹ҆гото́витъ пре́жде воздѣ́ланїѧ землѝ;
25 Не є҆гда́ ли ѹ҆мѧгчи́тъ {ѹ҆равни́тъ} лицѐ є҆ѧ̀, тогда̀ всѣ́етъ ма́лѡ чернѹ́хи и҆ кѷмі́на, пото́мъ же сѣ́етъ пшени́цѹ и҆ ѩ҆чме́нь и҆ про́со въ предѣ́лѣхъ твои́хъ;
26 И҆ наѹчи́шисѧ сѹдѹ̀ бг҃а твоегѡ̀ и҆ возра́дѹешисѧ.
27 И҆́бо не съ же́стокостїю ѡ҆чища́етсѧ чернѹ́ха, нижѐ ко́ло колесни́чное ѡ҆бы́детъ кѷмі́на, но жезло́мъ и҆стрѧса́етсѧ чернѹ́ха, кѷмі́нъ же со хлѣ́бомъ снѣ́стсѧ.
28 Не во вѣ́къ бо а҆́зъ разгнѣ́ваюсѧ на вы̀, нижѐ гла́съ гнѣ́ва моегѡ̀ попере́тъ ва́съ.
29 И҆ сїѧ҄ ѿ гд҇а саваѡ́ѳа и҆зыдо́ша чѹдеса̀: совѣ́тѹйте, вознеси́те тще́тное ѹ҆тѣше́нїе.
Нашли в тексте ошибку? Выделите её и нажмите:
Ctrl + Enter
Книга пророка Исаии, 28 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784