1 Пристѹпи́те, ѩ҆зы́цы, и҆ ѹ҆слы́шите, кнѧ҄зи: да слы́шитъ землѧ̀ и҆ живѹ́щїи на не́й, вселе́ннаѧ и҆ лю́дїе, и҆̀же на не́й.
2 Занѐ ѩ҆́рость гд҇нѧ на всѧ҄ ѩ҆зы́ки и҆ гнѣ́въ на число̀ и҆́хъ, є҆́же погѹби́ти и҆̀хъ и҆ преда́ти ѧ҆̀ на закла́нїе.
3 И҆ ѩ҆́звенїи и҆́хъ пове́ргнѹтсѧ и҆ мертвецы̀, и҆ взы́детъ и҆́хъ смра́дъ, и҆ намо́кнѹтъ го́ры кро́вїю и҆́хъ:
4 и҆ и҆ста́ютъ всѧ҄ си҄лы небє́сныѧ, и҆ свїе́тсѧ не́бо а҆́ки сви́токъ, и҆ всѧ҄ ѕвѣ́зды спадѹ́тъ ѩ҆́кѡ ли́ствїе съ лозы̀, и҆ ѩ҆́коже спа́даетъ ли́ствїе смоко́вницы.
5 Ѹ҆пи́сѧ ме́чь мо́й на небесѝ: сѐ, на ї҆дѹме́ю сни́детъ и҆ на лю́ди па҄гѹбныѧ съ сѹдо́мъ.
6 Ме́чь гд҇ень напо́лнисѧ кро́ве, растолстѣ̀ тѹ́комъ, ѿ кро́ве козлѡ́въ и҆ а҆́гнцєвъ и҆ ѿ тѹ́ка козлѡ́въ и҆ ѻ҆внѡ́въ: ѩ҆́кѡ же́ртва гд҇еви въ восо́рѣ, и҆ закла́нїе ве́лїе во ї҆дѹме́и.
7 И҆ падѹ́тъ съ ни́ми си́льнїи, и҆ ѻ҆вны̀ и҆ ю҆нцы̀, и҆ ѹ҆пїе́тсѧ землѧ̀ ѿ кро́ве и҆ ѿ тѹ́ка и҆́хъ насы́титсѧ:
8 де́нь бо сѹда̀ гд҇нѧ, и҆ лѣ́то воздаѧ́нїѧ сѹда̀ сїѡ́нѧ.
9 И҆ ѡ҆братѧ́тсѧ дє́бри є҆гѡ̀ въ смолѹ̀, и҆ землѧ̀ є҆гѡ̀ въ жѹ́пелъ,
10 и҆ бѹ́детъ землѧ̀ є҆гѡ̀ горѧ́щи ѩ҆́кѡ смола̀ дне́мъ и҆ но́щїю, и҆ не ѹ҆га́снетъ въ вѣ́чное вре́мѧ, и҆ взы́детъ ды́мъ є҆ѧ̀ высо́цѣ, въ ро́ды своѧ҄ ѡ҆пѹстѣ́етъ.
11 И҆ во вре́мѧ мно́го пти҄цы и҆ є҆́жеве, сѡвы̀ и҆ вра́нове возгнѣздѧ́тсѧ въ не́мъ: и҆ возложа́тъ на́нь ѹ҆́же землемѣ́рно пѹсты́ни, и҆ ѻ҆нокента́ѵри вселѧ́тсѧ въ не́мъ.
12 Кнѧ҄зи є҆гѡ̀ не бѹ́дѹтъ: ца́рїе бо и҆ вельмѡ́жи є҆гѡ̀ бѹ́дѹтъ въ па́гѹбѹ.
13 И҆ возни́кнѹтъ во градѣ́хъ и҆́хъ тернѡ́ваѧ древеса̀ и҆ во тверды́нехъ є҆гѡ̀, и҆ бѹ́дѹтъ селє́нїѧ сі́ринѡмъ сели҄ща стрѹѳїо́нѡмъ:
14 и҆ срѧ́щѹтсѧ бѣ́си со ѻ҆нокента҄ѵры и҆ возопїю́тъ дрѹ́гъ ко дрѹ́гѹ, тѹ̀ почі́ютъ ѻ҆нокента́ѵри, ѡ҆брѣ́тше себѣ̀ покѡ́ища:
15 та́мѡ возгнѣзди́тсѧ є҆́жь, и҆ сохрани́тъ землѧ̀ дѣ́ти є҆гѡ̀ со ѹ҆твержде́нїемъ: та́мѡ є҆лє́ни срѣто́шасѧ и҆ ѹ҆ви́дѣша ли́ца дрѹ́гъ дрѹ́га.
16 Число́мъ преидо́ша, и҆ є҆ди́нъ ѿ ни́хъ не поги́бе, дрѹ́гъ дрѹ́га не взыска̀, ѩ҆́кѡ гд҇ь заповѣ́да и҆̀мъ, и҆ дх҃ъ є҆гѡ̀ собра̀ ѧ҆̀.
17 И҆ то́й ве́ржетъ и҆̀мъ жрє́бїѧ, и҆ рѹка̀ є҆гѡ̀ раздѣлѝ пасти́сѧ: въ вѣ́чное вре́мѧ наслѣ́дите, въ ро́ды родѡ́въ почі́ютъ въ не́мъ.
Нашли в тексте ошибку? Выделите её и нажмите:
Ctrl + Enter
Книга пророка Исаии, 34 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784