1 Но послѹ́шай, їѡве, слове́съ мои́хъ и҆ бесѣ́дѹ мою̀ внѹшѝ:
2 сѐ бо, ѿверзо́хъ ѹ҆ста̀ моѧ҄, и҆ возглаго́ла ѧ҆зы́къ мо́й:
3 чи́сто се́рдце моѐ во словесѣ́хъ, ра́зѹмъ же ѹ҆стнѹ̀ моє́ю чи҄стаѧ ѹ҆разѹмѣ́етъ:
4 дх҃ъ бж҃їй сотвори́вый мѧ̀, дыха́нїе же вседержи́телево поѹча́ющее мѧ̀:
5 а҆́ще мо́жеши, да́ждь мѝ ѿвѣ́тъ къ си҄мъ: потерпѝ, ста́ни проти́вѹ менє̀, и҆ а҆́зъ проти́вѹ тебє̀.
6 Ѿ бре́нїѧ сотворе́нъ є҆сѝ ты̀, ѩ҆́коже и҆ а҆́зъ: ѿ тогѡ́жде сотворе́нїѧ є҆смы̀:
7 не стра́хъ мо́й тѧ̀ смѧте́тъ, нижѐ рѹка̀ моѧ̀ тѧжка̀ бѹ́детъ на тѧ̀.
8 Ѻ҆ба́че ре́клъ є҆сѝ во ѹ҆́шы моѝ, и҆ гла́съ глагѡ́лъ твои́хъ ѹ҆слы́шахъ, зане́же глаго́леши:
9 чи́стъ є҆́смь а҆́зъ, не согрѣша́ѧ, непоро́ченъ же є҆́смь, и҆́бо не беззако́нновахъ:
10 зазо́ръ же на мѧ̀ ѡ҆брѣ́те и҆ мни́тъ мѧ̀, ѩ҆́кѡ проти́вника себѣ̀:
11 вложи́ же но́гѹ мою̀ въ дре́во и҆ надсмотрѧ́лъ пѹти҄ моѧ҄ всѧ҄.
12 Ка́кѡ бо глаго́леши, ѩ҆́кѡ пра́въ є҆́смь, и҆ не послѹ́ша менѐ; Вѣ́ченъ бо є҆́сть, и҆́же над̾ зємны́ми.
13 Глаго́леши бо: чесѡ̀ ра́ди пра́вды моеѧ̀ не ѹ҆слы́ша всѧ́ко сло́во;
14 Е҆ди́ною бо возглаго́летъ гд҇ь, второ́е же во снѣ̀, и҆лѝ въ поѹче́нїи нощнѣ́мъ,
15 и҆лѝ, ѩ҆́кѡ є҆гда̀ напа́даетъ стра́хъ лю́тъ на человѣ́ки, во дрема́нїихъ на ло́жи:
16 тогда̀ ѿкры́етъ ѹ҆́мъ человѣ́ческїй, видѣ́ньми стра́ха тацѣ́ми и҆̀хъ ѹ҆страши́тъ,
17 да возврати́тъ человѣ́ка ѿ непра́вды, тѣ́ло же є҆гѡ̀ѿ паде́нїѧ и҆зба́ви,
18 пощадѣ́ же дѹ́шѹ є҆гѡ̀ ѿ сме́рти, є҆́же не па́сти є҆мѹ̀ на бра́ни.
19 Па́ки же ѡ҆бличѝ є҆го̀ болѣ́знїю на ло́жи и҆ мно́жество косте́й є҆гѡ̀ разсла́би:
20 всѧ́кагѡ же бра́шна пшени́чна не возмо́жетъ прїѧ́ти, а҆ дѹша̀ є҆гѡ̀ ѩ҆́ди хо́щетъ,
21 до́ндеже согнїю́тъ плѡ́ти є҆гѡ̀, и҆ пока́жетъ кѡ́сти є҆гѡ̀ то́щѧ:
22 прибли́жисѧ же на сме́рть дѹша̀ є҆гѡ̀, и҆ живо́тъ є҆гѡ̀ во а҆́дѣ.
23 А҆́ще бѹ́детъ ты́сѧща а҆́гг҃лъ смертоно́сныхъ, є҆ди́нъ ѿ ни́хъ не ѹ҆ѧзви́тъ є҆го̀: а҆́ще помы́слитъ се́рдцемъ ѡ҆брати́тисѧ ко гд҇ѹ, повѣ́сть же человѣ́кѹ сво́й зазо́ръ, и҆ безѹ́мїе своѐ пока́жетъ,
24 застѹ́питъ є҆̀, є҆́же не впа́сти є҆мѹ̀ въ сме́рть, ѡ҆бнови́тъ же тѣ́ло є҆гѡ̀ ѩ҆́коже повапле́нїе на стѣнѣ̀, кѡ́сти же є҆гѡ̀ и҆спо́лнитъ мо́зга:
25 ѹ҆мѧгчи́тъ же є҆гѡ̀ пло́ть ѩ҆́коже младе́нца, и҆ ѹ҆стро́итъ є҆го̀ возмѹжа́вша въ человѣ́цѣхъ.
26 Помо́литсѧ же ко гд҇ѹ и҆ прїѧ́тъ и҆́мъ бѹ́детъ, вни́детъ же лице́мъ весе́лымъ со и҆сповѣ́данїемъ, возда́стъ же человѣ́кѡмъ пра́вдѹ свою̀.
27 Посе́мъ тогда̀ за́зритъ человѣ́къ са́мъ себѣ̀, глаго́лѧ: ѩ҆кова҄ѧ содѣва́хъ; и҆ не по досто́инствѹ и҆стѧза́ мѧ, ѡ҆ ни́хже согрѣши́хъ:
28 спасѝ дѹ́шѹ мою̀, є҆́же не вни́ти во и҆стлѣ́нїе, и҆ жи́знь моѧ̀ свѣ́тъ ѹ҆́зритъ.
29 Сѐ, сїѧ҄ всѧ҄ твори́тъ крѣ́пкїй (бг҃ъ) пѹти҄ трѝ съ мѹ́жемъ:
30 но и҆зба́ви дѹ́шѹ мою̀ ѿ сме́рти, да живо́тъ мо́й во свѣ́тѣ хва́литъ є҆го̀.
31 Внима́й, їѡве, и҆ послѹ́шай менѐ, премолчѝ, и҆ а҆́зъ возглаго́лю:
32 и҆ а҆́ще тебѣ̀ сѹ́ть словеса̀, ѿвѣща́й мѝ: глаго́ли, хощѹ́ бо ѡ҆правди́тисѧ тебѣ̀:
33 а҆́ще же нѝ, ты̀ послѹ́шай менѐ, ѹ҆молчѝ, и҆ наѹчѹ́ тѧ премѹ́дрости.
Нашли в тексте ошибку? Выделите её и нажмите:
Ctrl + Enter
Книга Иова, 33 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784