1 Па́ки же ѿвѣща́въ гд҇ь, речѐ ко їѡвѹ и҆з̾ ѡ҆́блака:
2 нѝ, но препоѧ́ши ѩ҆́кѡ мѹ́жъ чрє́сла твоѧ҄: вопрошѹ́ же тѧ̀, ты́ же мѝ ѿвѣща́й.
3 Не ѿверга́й сѹда̀ моегѡ̀: мни́ши ли мѧ̀ и҆на́кѡ тебѣ̀ сотво́рша, ра́звѣ да ѩ҆ви́шисѧ правди́въ;
4 Е҆да̀ мы́шца тѝ є҆́сть на гд҇а, и҆лѝ гла́сомъ на него̀ греми́ши;
5 Прїими́ же высотѹ̀ и҆ си́лѹ, въ сла́вѹ же и҆ въ че́сть ѡ҆блецы́сѧ:
6 пѹсти́ же а҆́гг҃лы гнѣ́вомъ и҆ всѧ́каго ѹ҆кори́телѧ смирѝ,
7 велича́ва же ѹ҆гасѝ и҆ согно́й нечєсти́выѧ а҆́бїе:
8 скры́й же въ зе́млю внѣ̀ вкѹ́пѣ и҆ ли́ца и҆́хъ безче́стїѧ и҆спо́лни.
9 И҆сповѣ́мъ, ѩ҆́кѡ мо́жетъ десни́ца твоѧ̀ спастѝ.
10 Но ѹ҆́бѡ сѐ, ѕвѣ́рїе ѹ҆ тебє̀, травѹ̀ а҆́ки воло́ве ѩ҆дѧ́тъ:
11 сѐ ѹ҆́бѡ, крѣ́пость є҆гѡ̀ на чре́слѣхъ, си́ла же є҆гѡ̀ на пѹ́пѣ чре́ва:
12 поста́ви ѡ҆́шибъ ѩ҆́кѡ кѷпарі́съ, жи҄лы же є҆гѡ̀ (ѩ҆́кѡ ѹ҆́же) сплетє́ны сѹ́ть,
13 ре́бра є҆гѡ̀ ре́бра мѣ҄дѧна, хребе́тъ же є҆гѡ̀ желѣ́зо слїѧ́но.
14 Сі́есть нача́ло созда́нїѧ гд҇нѧ: сотворе́нъ порѹ́ганъ бы́тиа҆́гг҃лы є҆гѡ̀:
15 возше́дъ же на го́рѹ стреми́ннѹю, сотворѝ ра́дость четверонѡ́гимъ въ та́ртарѣ:
16 под̾ всѧ́кимъ дре́вомъ спи́тъ, при ро́гозѣ и҆ тро́стїи и҆ сїто́вїи:
17 ѡ҆сѣнѧ́ютъ же над̾ ни́мъ древеса̀ вели҄ка съ лѣ́торасльми и҆ вѣ҄тви напѡ́льныѧ:
18 а҆́ще бѹ́детъ наводне́нїе, не ѡ҆щѹти́тъ: ѹ҆пова́етъ, ѩ҆́кѡ вни́детъ ї҆ѻрда́нъ во ѹ҆ста̀ є҆гѡ̀:
19 во ѻ҆́ко своѐ во́зметъ є҆го̀, ѡ҆жесточи́всѧ продира́витъ нѡ́здри.
20 И҆звлече́ши ли ѕмі́а ѹ҆́дицею, и҆лѝ ѡ҆бложи́ши ѹ҆здѹ̀ ѡ҆ ноздре́хъ є҆гѡ̀;
21 и҆лѝ вдѣ́жеши колцѐ въ нѡ́здри є҆гѡ̀; ши́ломъ же проверти́ши ли ѹ҆стнѣ̀ є҆гѡ̀;
22 возглаго́летъ же ли тѝ съ моле́нїемъ, (и҆лѝ) съ проше́нїемъ кро́ткѡ;
23 сотвори́тъ же ли завѣ́тъ съ тобо́ю; по́ймеши же ли є҆го̀ раба̀ вѣ́чна;
24 поигра́еши же ли съ ни́мъ, ѩ҆́коже со пти́цею, и҆лѝ свѧ́жеши є҆го̀ ѩ҆́кѡ вра́бїѧ дѣ́тищѹ;
25 пита́ютсѧ ли же и҆́мъ ѩ҆зы́цы, и҆ раздѣлѧ́ютъ ли є҆го̀ фїнїкі́йстїи наро́ди;
26 всѧ҄ же пла҄вающаѧ собра́вшесѧ не под̾и́мѹтъ ко́жи є҆ди́ныѧ ѡ҆́шиба є҆гѡ̀, и҆ корабли҄ ры́барей главы̀ є҆гѡ̀.
27 Возложи́ши же ли на́нь рѹ́кѹ, воспомѧнѹ́въ бра́нь быва́ющѹю на тѣ́лѣ є҆гѡ̀; и҆ ктомѹ̀ да не бѹ́детъ.
Нашли в тексте ошибку? Выделите её и нажмите:
Ctrl + Enter
Книга Иова, 40 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784